Ata ijin-otu
58
“Bene ida taan̄ ukpo nye, kamen efuuk.Bene ida taan̄ ukpo kubọk otita.
Tumu nlilọ inu ebi n̄a erọbe nyi ema,
mè tumu ijo inu ebi uwu kè Jekọp erọbe nyi ema.
2 Egwe geelek òwele me inyọn̄, ema ekiweweek emi;
mè ikirọ kubọk ema mîkaan̄ ulọk irọriọọn̄ oniin̄ n̄a,
kubọk ema ìre ido òkirọ inu òtatat,
eyi ikadage ikọ Awaji kiban̄ otọbe ìto.
Ema ekibeek ibe emi ǹsibi unen oyerebet ǹnyi ema,
mè ikirọ kubọk ema mîma ibe Awaji ije igbet ema lek.”
3 Ema ekibe, “Keke orọ eji ejinbe otu,
ire, owu òkamun̄?
Keke orọ eji ekinyi lek kiji osusut,
ire, owu òkakọọn̄ chieen̄ ìkpọ?”
Okumugwem ofọfọọk ibe, “Ìkpọ,
me usen ijin-otu kinyi, enyi ekirọrọ mbubeek kinyi,
mè ikisa unye ikwaan̄ ikpan̄ ebi enyi egwenbe me ọkọ.
4 Ijin-otu kinyi ìkire melek ibaak mè etim,
mè igogoon̄ ene akpọ me ikpak.
Mije mbet lek ijin-otu enyi ekijin chereyi,
ida uriaak kinyi ìkpokọt ire emen inyọn̄!
5 Ìre ijin-otu òkup ikeyi ke mbe ekerọ?
Gaalek usen ge ene okinyi lek kan̄ osusut?
Ìre gaalek inenikana ibot ikwuun̄ kubọk anyiaan̄,
mè ilalaak me inyọn̄ ekwut ufieejit mè emen ntọn̄?
Ìre eya ke enyi ekigwen ijin-otu?
Ìre eyi ke enyi ekigwen usen
Okumugwem obọkọbe itap?
6 “Ijin-otu eyi emi mweekbe ìre ikeyi:
isasan̄a ebi enyi esabe me
oyerebet ikpak itap mkpọn isibi,
mè itọtọn̄ọ mkpọn eyi tukutuku isan̄a me lek ene,
mè itetele ebi ekitutuku efon me utelelek,
mè isọsọp olik akpan geelek esabe ikeme ene isan̄a;
7 icheche inorie kinyi inyi ebi ìkup me uraafiọọn̄,
mè isasa ebi ugbọọn̄ kpekaan̄
ere iluluk initap me uwu kinyi.
Enyi isimun̄ ebi ìkup njak, ìnyi ema ekwut,
mè ikada isi ìsan̄a me lek bọn ulọk kinyi.
8 Mgbọ ya, utoon̄ kinyi
mônenibum isibi kubọk utoon̄ egwe,
igwagwa kinyi môkakana isibi ugwat ugwat,
mgbọ ya si, ata irọrọ kinyi môkije enyi me isi,
ujamgbugbo Okumugwem
môkekigọọk enyi me udun̄.
9 Mgbọ ya, enyi mêgwen Okumugwem,
ọmọ môbọbọkọ enyi otu;
enyi mêtaan̄ ukpo ibe inyan̄a enyi,
ọmọ môfọfọọk enyi ibe, ‘Kpọ emi ire ogwu.’
“Ire enyi itele ikekisa akpan eyi tukutuku ikeme ene,
mè itele inyanyana ene ubọk me isi,
mè itele si usem ikpak,
10 ire enyi iyaka inorie kinyi inyi ebi uraafiọọn̄,
mè inyi ebi ekitutuku inu òkilọk ema,
mgbọ ya, utoon̄ kinyi mônenibum isibi me emen udun,
eririeen̄ kinyi mônenikana ejit ikarek.
11 Okumugwem môkekisa enyi ije mgbọ geelek,
mè ikinyi enyi inu geelek òkup me uyọt
me lek ijọn̄ ya uyok ura owọpbe ikpan̄,
mè irọ mè otu ukwuuk kinyi inye.
Enyi mênenikup kubọk uko ere mun̄ omembe ijọn̄ ijaan̄,
mè ikup kubọk ogbuuruk mun̄ eyi ìkakichiaak.
12 Ebi kinyi mênenikpọk inama ama cha
egbugbọbe igwook me ukot ikaan̄,
mè inama ọdọ etọbọbe karake akat cha ibene.
Mênenikigwen owu ogwu
òkiraan̄ mgban ògbugbugbọ,
mè ogwu òkinama oniin̄ ere ebi ene ekiluk.
13 “Ire enyi itet ukot kinyi ikaan̄,
kpeyaka ikichichaka Usen Mbuban,
mè ijit ikekirọ ubọk înemebe enyi me Usen Mbuban n̄a,
ire Usen Mbuban ikitop enyi me lek,
mè usen ya òkup mbuban inyi Okumugwem
imin enyi me lek,
mè ire enyi imin usen ya,
mè itele ikpọkpọ ikirọ inu geelek enyi emabe,
mè ire enyi kpeyaka irọ inu òneme enyi,
mè itele ikekitumu ikọ ikakaan̄ge oruru,
14 mgbọ ya, enyi mêkaan̄ unwọọn̄ me emen Okumugwem.
Emi mânenirọ inyi enyi
ekekpulu me ere òbebene me lek ijọn̄ yi,
mè isa ìrot kè Jekọp nte kinyi inyi enyi erie.
Emi Okumugwem nsa otu n̄a itumu.”