Aya erieen̄ Sayọn obokaan̄
62
Bak me lek Sayọn, emi m̀kpariaan̄ ere,mije Jeruselem, emi m̀kpachit otu,
mege ata irọrọ kan̄ môkibum
itoon̄ inu kubọk utoon̄ egwe,
mege unyan̄a kan̄ môkisak kubọk ukan̄ nlak.
2 Owu Jeruselem, ebi ido geelek mêmun̄ ata irọrọ kwun̄,
otutuuk ebi ubọọn̄ geelek mêmun̄ umin kwun̄.
Mêkigwen owu aya erieen̄,
eyi Okumugwem obosan̄a owu.
3 Owu môbet lek okpibot ubọọn̄
òkup òrirọ òrirọ me ubọk Okumugwem,
mè ibet lek ọgbọn ubọọn̄ me akajit ubọk Awaji kwun̄.
4 Kpebeyaka ikpọk igwen owu Ama Ejijit,
kpebeyaka ikpọk igwen si ijọn̄ kwun̄ Ijọn̄ Eyayat Itele.
Ire, ebekigwen owu Ama Òbebele Awaji Ejit,a
mè igwen ijọn̄ kwun̄ Ogwu Òkaan̄ Olom,b
mije, Okumugwem îbele ejit me lek kwun̄,
ijọn̄ kwun̄ si môkukup kubọk nwa òkaan̄ olom me lek.
5 Ike gwun̄ enerieen̄ okido obaak enenwaan̄,
mè ikana ogwukaan̄,
ikeya ke bọn kwun̄ ebere ebikaan̄ kwun̄;
Ike aya olom okibele ejit me lek aya nwa kan̄,
ikeya si ke Okumugwem obobele ejit me lek kwun̄.
6 Owu Jeruselem, nra iria ebi mbem
igwook me inyọn̄ mgban kwun̄;
ikarek mè eririeen̄, otu kiban̄ ìkpochit.
Enyi ebi ìkiriaak uriaak igwen Okumugwem,
ikasiki efuuk.
7 Ikachechieek ibe ọmọ isiki si efuuk
mege ọmọ orọ Jeruselem ikeke inye,
mè ikana ere ebi linyọn̄ ebekitọtọn̄.
8 Okumugwem îsa ubọk ulom kan̄ inyan̄a ibot,
mè isa si unye eyi ubọk kan̄
înyanabe inyan̄a si ibot ibe:
“Emi m̀kpayaka isa akpa kinyi
inyi ebi ochicha kinyi esa erọ inorie;
m̀kpayaka isa si aya miin̄ enyi ekwukwulube me lek
ikana inyi ebi ofifi ido ibe enwọ.
9 Ire, enyi ebi ìwowop, mè irọkọ, eberie,
mè itọn̄ Okumugwem,
enyi ebi ìtititiin̄ gerep cha
ebenwọ miin̄ ònan̄a me lek me emen oyet egep n̄a.”
10 Ìje ìtibi, ìje ìtibi me otunchit!
Ìnen̄e oniin̄ ìsun̄ ìnyi ebi ene.
Ìbum, ìbum uga oniin̄!
Ìteen̄ okpọkọ ewuuk ìsan̄a.
Ìtaba egop ìbene ìnyi ebi ido geelek.
11 Okumugwem înyi ulook ikana
ire ntutun̄ ere geelek me linyọn̄ ibe,
“Ìtumu ìnyi ebi ama Sayọn ibe,
‘Kpọ, ogwu Unyan̄a kinyi òkinu!
Kpọ, mkpukpe kan̄ me ubọk kan̄,
îsa inu ìbosa iniwaak enyi ubọk igbaalek ikinu.’ ”
12 Mêkigwen ema Ebi Mbuban,
ebi Okumugwem Ofakabe Isibi;
mè ikigwen owu Ama Ekiweweek,
mè Ama Kpejijit Itele.