64
Jei, mebe owu môbum akpa isinyọn̄, mè igbugbọ isibi inu,inyi ebi kè ogoon̄ mêsisik me isi kwun̄!
2 Ike ukan̄ okinin̄ me lek nkirika,
mè ikirọ mun̄ iriak,
ikeya si, owu sibi na,
na rọ ebi ochicha kwun̄ eriọọn̄ erieen̄ kwun̄,
mè ebi ido geelek eriran me isi kwun̄.
3 Mgbọ owu orọbe inu ukechieen̄
echi eji kpekpọ chieen̄ ibe môrọ cha,
owu onan̄a isibi inu,
ebi kè ogoon̄ esisisik me isi kwun̄.
4 Karake ukot ikaan̄, ene geege ìkararak ìnọ,
ìkaninin̄ si utọn̄ ene geege,
chieen̄ ene geege ìkararak ìmun̄ Awaji geege,
ilọ me lek kwun̄,
ogwu òkirọ ikwaan̄ me ibot
ebi ìkukup ikikpọ ọmọ.
5 Owu okitap ubọk inyi ebi ìkisa me ubelejit irọ inu òtatat,
ebi ìkikeek oniin̄ kwun̄ geelek.
Ire, mgbọ eji etetbe lek inye ikirọ ijo inu ikeme owu,
owu onanaan̄ ejit.
Ìre kpa ubọk ke eji ebeyaka ikaan̄ unyan̄a?
6 Otutuuk kiji enikup okpa okpa,
kubọk ogwu mbuban okupbe me lek,
otutuuk ata irọrọ kiji îkana oka ekwut ibaan̄;
eji mîchiaak isan̄a kubọk nchat inwan̄,
ijo inu kiji îben eji iwut ije kubọk efet.
7 Kpunu ene geege òyayaka ikigwen erieen̄ kwun̄,
kpunu si ene geege òyayaka ikisa lek itetet owu ikaan̄;
mije, owu olet isi kwun̄ me lek kiji,
mè irọ inyi eji ejijit eta mije ijo inu kiji.
8 Ire, mgbọ keyi, Okumugwem, owu ore Nte kiji.
Eji ìre arika, sà owu ore ogwu òbot ugọn̄;
eji otutuuk ene ìre ubọk ikwaan̄ kwun̄.
9 Jei Okumugwem, soso kanaan̄ ejit ìraka ubọk;
kakpọkpọ ìkikeek ijo kiji ìre mgbọ geelek.
Soso, raan̄ chieen̄ kpọ eji, eji mîriaak owu,
mije, eji otutuuk ene ìre ebi kwun̄.
10 Ama mbuban kwun̄ cha geelek îkana èwê;
Sayọn me lek kan̄ ìyaka inire ǹrioon̄,
Jeruselem ìyayat ita kpai.
11 Uwu Mbuban kiji ya òjajaan̄ uja,
ere ebi nte nte kiji ekitọn̄ owu ya,
mîtap ukan̄ iwọp itaka iriọk;
otutuuk inu eji ekisa ibaan̄
alọm cha îfiat igwook isan̄a.
12 Jei Okumugwem, eyi otutuuk inu chi okupbe ikeyi,
ìre owu môtet lek kwun̄ ikaan̄ me lek kiji ni?
Ìre owu môriaan̄ ere,
mè isulu eji osusut iraka iman̄ ni?