“ ‘Otutuuk kinyi ebi Juda ebi ìkije me otunchit chi iraka inin̄ ere yi isi itọbọ ebum inyi Okumugwem, ìgban̄ ikọ Okumugwem. 3 Okumugwem Ogwukaan̄ Inyọn̄ mè Ijọn̄, òrere Awaji ebi Ijeren, ìtumu ibe ikeyi: Ìnen̄e oniin̄ kinyi mè irọrọ kinyi ìsun̄, ke mâtele ibe enyi eluk me inyọn̄ ijọn̄ yi. 4 Ikasa ikọ ofiaan̄ ìtoon̄ ejit ìkitumu ibe, “Eyi ìre Uwu Mbuban Okumugwem, Uwu Mbuban Okumugwem, Uwu Mbuban Okumugwem!” 5 Ire, ire enyi inwene oniin̄ kinyi mè irọrọ kinyi me atikọ, mè ire enyi ikirọ unen inu me etete kinyi, 6 mè ire enyi kpekitutuku ebi ichen, mè ebi kpà-nte, mè ebi nwakpa, mè kpekifiat si eje ogwu ikalọge inu geege me ere yi, mè ire enyi kpekigọọk ofifi awaji cha isa itap lek kinyi unan; 7 emi mânenitele ibe enyi eluk me ere yi, me lek ijọn̄ ya nnyibe ebi nte nte kinyi, ire mgbọ geelek, mgbọ geelek. 8 Ire, enyi ekitoon̄ ejit me lek ikọ ofiaan̄ kpunube oruru geege me lek.

9 “ ‘Ìre enyi mêchiin̄ inọ, mè ikpan̄ ene, mè irọ ugan-nwa, mè inyan̄a ibot ofiaan̄, mè iwọp nsensi inyi Baali, mè igọọk ofifi awaji cha echi enyi kperiọọn̄, 10 mè itolek ininu me uwu keyi òkichieek erieen̄ n̄a inikeke me isi n̄a ikibe, “Eji mînwọnọ!” Ìre enyi enwọnọ, inyi enyi ekerọ otutuuk òchichaka inu chi geelek ni? 11 Ǹdo enyi nu, me chieen̄ kinyi, ìre uwu yi òkichieek erieen̄ n̄a îkana ere ebi inọ ekinilet lek ni? Ìkpọ, emi gwa ǹkimun̄ inu cha geelek enyi ekirọ! Emi Okumugwem ntumu.

12 “ ‘Ìje-nu ìsi Silo, adasi ere ngobobe ibe erieen̄ n̄a môkikup, mè ìsi ìkpọ inu nrọbe ere ya, mije inu ikpak ebi n̄a ebi Ijeren erọbe. 13 Emi Okumugwem ntumu si ibe ke mgbọ enyi ekirọ otutuuk inu chi, ke m̀kpọkpọ ikitumu ikọ inyi enyi, ire, enyi kpegban̄; ngwen enyi, enyi kpechieek emi. 14 Eya orọ, inu nrọbe Silo ke mbarọ si mgbọ keyi me lek uwu ya òkichieek erieen̄ n̄a, Uwu Mbuban ya eyi enyi esabe itoon̄ ejit, òrere ere ya nsabe inyi enyi mè ebi nte nte kinyi. 15 Mârieen̄ enyi isibi me isi n̄a kubọk nrọbe otutuuk bọn ulọk kinyi ebi owot iman kè Iferem.’

16 “Jerimaya, kariaak uriaak me ibot ife chi, kataan̄ ukpo mè ìre ìbeek mbeek ìnyi ema, karariaak emi si, mije, m̀kpagban̄. 17 Ìre owu òkamun̄ inu ema ekirọ me emen ama ebi Juda cha, mè echi ekirọ me lek oniin̄ geelek me Jeruselem ni? 18 Nsabọn ekisi iye, ebi nte kiban̄ ekekisọk ukan̄, ebibaan̄ ekekimian̄a akpa ekọkọk isa ikirọ unin̄i fituru isa ikigwa ngwugwa inyi Ubọọn̄ Enenwaan̄ Akpabin Inyọn̄.^a Ema ekigwa ngwugwa miin̄ egwogwook inyi ofifi esese awaji, isa ikirọ ibe ejit ikinaan̄ emi. 19 Ìre emi ke ema ekitap unaan̄-ejit ni? Ìre ìkare unan ke ema ekitap me lek kiban̄, mè ikisa esip itet lek kiban̄ gaalek ni?

20 “ ‘Eya orọ, Ogwukaan̄-ene Okumugwem ìtumu ibe ikeyi: Mâda uyok uyok unaan̄-ejit n̄a igwook me ere yi, me lek ebilene, mè anam, mè uti òkup me oron, mè mfut òkup me ijọn̄. Unaan̄-ejit ya ìbosak kubọk ukan̄, kpebekọt iniin̄.

21 “ ‘Okumugwem Ogwukaan̄ Inyọn̄ mè Ijọn̄, òrere Awaji ebi Ijeren, ìtumu ibe ikeyi: Ìgbaan̄ anam ngwugwa ewọwọp iriọk mè echi ngwugwa kechilọ cha geelek ìtaka me lek kinyi! 22 Mije, usen nsan̄abe ebi nte nte kinyi isibi me Ijipiti, ǹkatumu ikọ geege ìnyi ema ofolek ngwugwa ewọwọp iriọk mè ofifi ngwugwa kechilọ cha, ǹkanyinyi si ema ida ofolek. 23 Ire, inu ntọbe ibe ema erọ ìre ikeyi: “Ìgban̄ utọn̄ me ida n̄a, ke mâre Awaji kinyi, enyi mêrere si ebi n̄a. Ìje me otutuuk oniin̄ ntọbe inyi enyi, inyi inu môje ijaan̄ enyi me lek.” 24 Ire, ema kpenọ, kperaran̄ utọn̄ igban̄. Kpan̄asi ikeya, ema ekirọ inu igọọk me nteme unye-ibot eyi ejit kiban̄ okitọ inyi ema. Sa me ikeya, ema ekikpekpebe inyi udun̄, kpeje inyi isi. 25 Akarake usen ebi nte nte kinyi esibibe me Ijipiti, mege inire cherekeyi, m̀kpọkpọ ikiria otutuuk ebi ikwaan̄ n̄a, ebi nriran, inu me lek kinyi usen geelek òwele me inyọn̄. 26 Ire, enyi kpenọ, kperaraan̄ utọn̄ igban̄ emi. Enyi ekpọkpọ ikinye ibot, mè ikirọ ijo inu igak ebi nte nte kiban̄.’

27 “Owu môtumu otutuuk ikọ chi inyi ema, ire, ema kpebegban̄. Owu môtaan̄ ukpo igak, ire, ema kpebebọkọ owu otu. 28 Eya orọ, tumu nyi ema ibe, ‘Eyiyi ìre ido eyi ìkakinọ ida Okumugwem Awaji kan̄, ìkakibọkọ nteme. Atikọ îchep, geege kpunu me otu alọm kiban̄. 29 Ìsọp ijeek kinyi ìtọọn̄ ìfiin̄, ìnin̄ uwu ito me inyọn̄ ǹlak ibot ogoon̄, mije, Okumugwem îjit ebi ukot keyi, ebi uyok uyok unaan̄-ejit kan̄ okemebe, mè ikpọ ema chieen̄ ilọ me lek.

30 “ ‘Ebi owot iman kè Juda mîrọ ijo inu me chieen̄ n̄a. Emi Okumugwem ntumu. Ema mîsa mkpọmfaka òchichaka inu kiban̄ cha initap me emen uwu ya òkichieek erieen̄ n̄a, mè ichaka mbuban me lek uwu ya. 31 Ema mînama isi-ijọn̄ ekigwen Tofet me emen iteke Ben Inọm ikisa iwọp bọn ebirieen̄ kiban̄ mè bọn ebibaan̄ kiban̄ me ukan̄ isa igwa ngwugwa. Eyi ìre inu eyi nkanyige ema ida ibe erọ, ìkakukup si emi me ejit. 32 Eya orọ, usen òkinu, mgbọ ebi ene kpebeyaka ikigwen ere ya Tofet, mè ìre iteke Ben Inọm. Ire, ebekigwen iteke Igwu-ene, mije, mêfuun̄ ene me Tofet mege ire lek irek ìkpoyaka ikup. Emi Okumugwem ntumu. 33 Ibat ebi ife chi mônenikana inorie inyi unọn òwulu me inyọn̄ mè anam òje me ijọn̄, kpunu ogwu òbokilap ema isan̄a. 34 Mârọ inyi okput unwọọn̄ mè ubelejit, mè okput aya olom mè aya nwa ichep me emen ama ebi Juda geelek, mè lek oniin̄ geelek me Jeruselem, mije, lek ijọn̄ ya ìboyayat ita kpai.