9
Jei, mebe emen ibot n̄a ìre udọn̄ mun̄,mebe chieen̄ n̄a ìre ogbuuruk mun̄ ito,
kè ǹto ito eririeen̄ mè ikarek,
me ibot ebi kiji ebi ekpan̄be.
2 Jei, mebe nkaan̄ ere ge me emen èwê,
ere ebi ije ekikup itap efuuk me emen èwê,
kè ǹtele ebi kiji,
mè nje ǹjọn̄ọ ere nnan̄a me lek kiban̄;
mije, ema ìre ebi ugan-nwa,
mè ire si urum ebi ofiaan̄.
3 “Ema ekineen̄ alọm kiban̄ isun̄ kubọk enwun ogbaan̄,
isa ikisook ikọ ataak kubọk ekisook oraan̄.
Ema kpekeke inye me lek
itutumu atikọ me linyọn̄;
ekinan̄a me ijo inu ge inin̄ ofifi ijo inu.
Ema kperiọọn̄ emi.
Emi Okumugwem ntumu.
4 “Gbala chieen̄ me lek ogwu melek kwun̄;
katoon̄ ngwan̄ kwun̄ ejit me lek.
Mije, ngwan̄ geelek ìre ogwu ofiaan̄,a
ogwu unene geelek ìre ogwu òkpa ene.
5 Unene ìkekifiaan̄ unene,
kpunu ogwu geege òkitumu atikọ.
Ema mîjeen̄ alọm kiban̄ ubọk ekikan̄ ataak;
ema ekikpan̄ lek igọọk irọrọ ijo inu.
6 Owu, Jerimaya, òluk me etete ofiaan̄.
Mije ofiaan̄, ebi n̄a mîjit irọriọọn̄ emi.
Emi Okumugwem ntumu.”
7 Eya orọ, Okumugwem Ogwukaan̄ Inyọn̄ mè Ijọn̄ ìtumu ibe ikeyi:
“Ìkpọ, mânikala ebi n̄a kubọk alata,
mè iroon̄ ema ikpọ;
mije, ìkayaka ìkaan̄ ofifi inu mbayaka irọ ebi n̄a,
bak me lek ijo inu ema erọbe.
8 Otu alọm kiban̄ ìre oraan̄ òkpan̄ ene,
ikọ alọm kiban̄ okitumu ìre ofiaan̄ ofiaan̄.
Ogwu ikup, ìkisa otu kan̄ itumu ikọ esuuk esuuk
melek ogwu melek kan̄,
ire, me emen ejit kan̄,
îkọọk ufe ikikpọ ogwu melek kan̄ ya.”
9 Okumugwem ìkido ibe,
“Mbet ido òkup ikeyi,
ìre kpamasulu ema osusut ni?
Ìre kpamarọ ema useen̄ inu ema erọbe emi ni?”
Jerimaya îto ito me ibot ebi Ijeren
10 Jerimaya onenibe:
“Jei, mâto ito, mè inin̄ uwu ito me ibot ebi kè ogoon̄,
mè ikọt okwa ito me ibot mbubet emen èwê;
mije, ema mîchiaak isan̄a,
kpunu ogwu òyaka ìkije iraka me ere cha,
kpeyaka ikinọ ida ukpo eriembuuk me ere cha;
ebi kè unọn òwulu me inyọn̄ mè anam oron,
mîyat ita, mè ifon isan̄a kpai.”
11 Okumugwem obebe,
“Mârọ Jeruselem ikana èdọ mkpukput,
ere ibo oron afa obokiluk;
mâjijaka ama ido Juda cha igwook,
inyi ene geege ikayaka ìkọt ìluk me emen.”
12 Jerimaya okekido ibe,
“Ekene ore ogwu òriọọn̄ inu,
ogwu môkọtbe igobo inu keyi itet?
Ekene ke Okumugwem osa otu kan̄ itumu ikọ inyi,
ogwu môkọtbe ikpa iwele?
Keke orọ ejijakabe ijọn̄ yi isan̄a ikeyi ikana èwê,
eyi ene geege ìkakọt ìje ìraka me lek?”
13 Okumugwem obebe, “Îre mije ema ekpọbe ikan n̄a eyi nnyibe ema ilọ chieen̄; ema kpegban̄ ida n̄a, kpejeje si ikpọ me lek ikan n̄a. 14 Kpan̄asi ikeya, ema ekirọ unye-ibot eyi ejit kiban̄ okitọ inyi ema, mè ikisi itọbọ ebum inyi Baali, kubọk ebi nte nte kiban̄ ejeen̄be ema.” 15 Eya orọ, Okumugwem Ogwukaan̄ Inyọn̄ mè Ijọn̄, òrere Awaji ebi Ijeren, ìtumu ibe ikeyi: “Ìkpọ, mâninyi ife chi ujat inorie ibe erie, mè inyi ema ujat mudim ibe enwọ. 16 Mâyiyala ema isi igwook me ido echi ema kperiọọn̄, ebi nte nte kiban̄ si kperọriọọn̄, mè isa oge akọn̄ ililaba ema, mege ema mêtabe isan̄a kpai.”
17 Okumugwem Ogwukaan̄ Inyọn̄ mè Ijọn̄ ìtumu ibe ikeyi:
“Ìkaan̄ me ekiket! Ìgween̄ ebibaan̄ ebi ito ibe enu;
ìgween̄ ebi usọ okwa ito ibe enu.
18 Ema esibi enu ugwat ugwat,
eneto ito enyi eji,
inyi mun̄ ito igwook isibi eji me chieen̄,
mè mun̄ ito ireke eji inyọn̄ chieen̄.
19 Ìgban̄, okput ito òkidimi me Sayọn ibe:
‘Mîjijaka eji isan̄a!
Esip kiji îmin enenen enenen!
Eji mêtele ijọn̄ kiji,
mije, mîgbugbọ uwu kiji igwook.’ ”
20 Jei, ebibaan̄, ìgban̄ ikọ Okumugwem;
ìchili utọn̄ kinyi ìnọ ikọ otu kan̄.
Ìjeen̄ bọn ebibaan̄ kinyi ubọk ekito ito,
mè ìjeen̄ lek kinyi okwa ito, me ene me ene.
21 Mkpa înene itibi otu nruruk kiji,
mè iraka inin̄ emen uwu mgban kiji;
îkpan̄ asa nsabọn, lek oniin̄ înọọn̄;
îkpan̄ nsabọn irieen̄, oyet ama îyat.
22 Tumu be, “Okumugwem ìtumu ibe ikeyi:
“ ‘Nkwukwu ene môlilam ichit ere
kubọk ifin anam ochit oron uko,
mè itutọmọ kubọk okpot akpa
otutọmọ me udun̄ ebi ìkisọp akpa,
kpunu ene geege òbokup ikikwọọk ema ititiin̄.’ ”
23 Okumugwem ìtumu ibe ikeyi:
“Ogwu òriọọn̄ inu, ikasa iriọọn̄-inu kan̄ ìgugo lek;
ogwu òkaan̄ unye, ikasa unye kan̄ ìgugo lek;
ogwu òbọbọọn̄ ubọọn̄, ikasa ubọọn̄ kan̄ ìgugo lek.
24 Ire, ogwu ibogugo lek, igugo lek ibe,
ke ọmọ îriọọn̄ emi, mè igobo itet ogwu nrebe,
ke emi ìre Okumugwem ogwu ata ejit,
mè ogwu unen oyerebet,
mè ogwu òkirọ ata irọrọ me linyọn̄.
Irọriọọn̄ inu chi ore inu òkibele emi ejit.
Emi Okumugwem ntumu.
25 “Ìkpọ, usen òkinu, mgbọ mâsulube otutuuk ebi ìfieek afi me anam akpalek osusut. Emi Okumugwem ntumu. 26 Ife chi ìre ebi Ijipiti, mè ebi Juda, mè ebi Edọm, mè ebi Amọn, mè ebi Mowabu, mè otutuuk ebi ìluk me emen èwê, ebi ìkisọp ijeek isan̄a me agba isi kiban̄. Mije, otutuuk ife chi ìre ebi kpefieek afi; ikeya si, otutuuk ebi uwu kè Ijeren ìre ebi kpekisun̄ inyan̄a-ibot n̄a.b”