Jerimaya îtọbọ ojọngwu ikpọk isan
19
Okumugwem onenitumu ibe: “Je si lep ojọngwu arika me ubọk ogwu òbot ugọn̄. Sa usini ebi ugane me lek ebi n̄a, mè usini ebi ugane me lek ebi nriran, 2 mè sa ema je si iteke Ben Inọm òkup me otu isotu otunchit Okpọkọ Ugọn̄. Kup me ere ya tumu ikọ mâtumube inyi owu. 3 Tumu be, ‘Enyi ebi ubọọn̄ Juda mè ebi ìluk me Jeruselem, ìgban̄ ikọ Okumugwem. Okumugwem Ogwukaan̄ Inyọn̄ mè Ijọn̄, Awaji ebi Ijeren ìtumu ibe ikeyi: Ìkpọ, emi gwa ǹkisa ùrioon̄ inu me ere keyi, eyi môrọbe utọn̄ geelek ònọnọ ison. 4 Mije, ema mîjit emi itele, mè isa ere yi irọ ere awaji ebi ofifi agan̄ ekiluk. Ema mîwọp nsensi inyi ofifi awaji cha echi ema mè ebi nte nte kiban̄ mè ebi ubọọn̄ Juda kperarak iriọọn̄ mgbọ geege. Ema mîfiin̄ eje ebi kpelọ ikan geege ijot ere yi. 5 Ema mînama isi-ijọn̄ inyi Baali, ere ema ekiwọp bọn ebirieen̄ kiban̄ me ukan̄ isa ikigwa ngwugwa ewọwọp inyi Baali, òrere inu emi ǹkatọ ibe ema erọ, ǹkatutumu ikọ ìbak, ìkaninin̄ si emi me ejit. 6 Eya orọ, usen òkinu, mgbọ ebi ene kpebeyaka ikigwen ere ya Tofet mè ìre iteke Ben Inọm, ire, ebekigwen iteke Igwu-ene. Emi Okumugwem ntumu.7 “ ‘Mâjijaka otitọt ebi ido Juda mè ebi Jeruselem me ere keyi. Mâda ema itap me otu oge akọn̄ ebi ochicha kiban̄. Ema mêrọn̄ inin̄ me ubọk ebi ìkiweek ebek ugwem kiban̄, mânenisa nkwukwu kiban̄ irọ inorie inyi ebi kè unọn òwulu me inyọn̄ mè ebi kè anam oron. 8 Mâgwak ama yi igwook, mè irọ ibe ikana inu ochak, ene geelek môjebe iraka me lek ama ya môriki, mè ifiọọk bak me lek unan òsasak me lek ama yi. 9 Ebi ochicha kiban̄, ebi ìkiweek ebek ugwem kiban̄ mênu inikpa mbin akọn̄ ikana ama kiban̄. Mgbọ ya, mârọ inyi ema etaka bọn kiban̄ ebirieen̄ mè bọn kiban̄ ebibaan̄, unene môtaka ogwu unene kan̄.’
10 “Ositumu ikọ cha isan̄a, ben ojọngwu ya tọbọ kpukpuku me isi ebi melek kwun̄ cha, inyi ema emun̄, 11 mè tumu inyi ema ibe, ‘Okumugwem Ogwukaan̄ Inyọn̄ mè Ijọn̄ ìtumu ibe ikeyi: Ike ojọngwu yi ogwu òbot ugọn̄ obotbe okpọkbe isan, ire lek kpebeyaka ikọt inen̄e isun̄, ikeya si ke emi mbatọbọ ido yi melek ama yi ikpọk isan ire lek kpebekọt iyaka inen̄e ema isun̄. Mêfuun̄ ene me Tofet mege ere kpoyaka ikup. 12 Inu mbarọ ama yi mè irọ ebi ìluk me emen ire eya. Mârọ ama yi ikup kubọk Tofet. Emi Okumugwem ntumu. 13 Mêfifila otutuuk uwu òkup me Jeruselem mè uwu ebi ubọọn̄ ebi ido Juda cha, ere ema ekupbe me inyọn̄ uwu ikiwọp nsensi inyi urum ntoronyan̄ òkup me akpabin inyọn̄, mè ikigwook miin̄ ngwugwa inyi ofifi awaji, kubọk efifilabe ere keyi òrere isi-ijọn̄ Tofet.’ ”
14 Jerimaya oneninan̄a me Tofet, ere Okumugwem oriabe ọmọ isi ibe isi iben nriran, mè isi ikeke me oyet egep Uwu Mbuban Okumugwem ikitumu inyi ebi ene ibe, 15 “Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: ‘Ìgban̄! Otutuuk ùrioon̄ cha geelek ntumube ifieek ofolek ama yi mè asabọn ama òkakana ọmọ, mânisa ùrioon̄ cha initoon̄ ema, mije, ema mînye ibot, kpema igbagban̄ ikọ n̄a.’ ”