Ebi ido Juda mênin̄ usun̄ inyi Nebukadineja
27
Me ibebene mkpulu kè Jioyakim, gwun̄ kè Josaya ogwu ubọọn̄ Juda, Okumugwem onenilook emi Jerimaya etip. 2 Okumugwem ìtumu inyi emi ibe ikeyi: “Rom mkpọn mè ọgbọn, mè sa ikpa anam tobo jeen̄ me ebek kwun̄, 3 mè si ria etip jet ogwu ubọọn̄ ido Edọm, mè ogwu ubọọn̄ ido Mowabu, mè ogwu ubọọn̄ ido Amọn, mè ogwu ubọọn̄ ama Taya mè ogwu ubọọn̄ ama Sidọn. Etip ya ìboje me ubọk ebi otuchieen̄ kiban̄ ebi ìnunu Jeruselem me lek kè Jedikaya ogwu ubọọn̄ Juda. 4 Tumu nyi ema ibe etumu enyi ebi nte uwu kiban̄ ibe ke Okumugwem Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: ‘Ìtumu ìnyi ebi nte uwu kinyi ibe ikeyi: 5 “Emi me lek n̄a nsa me unye ubọk n̄a melek ikpele unye n̄a irom linyọn̄ mè ebilene mè anam òkup me linyọn̄, mè isa ikana inyi ogwu geelek òneme emi. 6 Mgbọ keyi, emi me lek n̄a nyaka otutuuk ido chi itap me ubọk ogwu ikwaan̄ n̄a, Nebukadineja, ogwu ubọọn̄ Babilọn; nyaka si ebi kè anam oron itap me irak ubọk kan̄. 7 Otutuuk ido geelek mêkisi ikwaan̄ inyi ọmọ mè gwun̄ kan̄ mè gwun̄ gwun̄ kan̄ mege ire mgbọ ido kan̄ mônan̄abe irọn̄; mgbọ ya ọmọ mônenikisi ikwaan̄ inyi owuwa ido mè ikpele ebi ubọọn̄.8 “ ‘ “Ire ikaan̄ ido mè ìre ijọn̄ ubọọn̄ òjijit isisi ikwaan̄ inyi Nebukadineja ogwu ubọọn̄ Babilọn, mè ìre ìjijit ininin̄ usun̄ inyi ọmọ, mâsa oge akọn̄ mè akan̄ mè ijo orukan̄ isulu ido ya osusut mege mâjijakabe ido ya isan̄a kpai. Emi Okumugwem ntumu. 9 Eya orọ, ikagban̄ utọn̄ me lek ebi nriran kinyi melek ebi ìdo-inu kinyi, mè ebi ìmumun̄ ilaak kinyi melek ebi nriran ekwukwu jom-jòm kinyi, mè ebi ìkitet ǹcha kinyi cha, ebi ìkitumu inyi enyi ibe, ‘Enyi kpebenin̄ usun̄ inyi ogwu ubọọn̄ Babilọn.’ 10 Ema ekiben nriran ataak inyi enyi isasa irọ ibe esan̄a enyi ejọn̄ọ ere me lek ijọn̄ kinyi. Mârieen̄ enyi isan̄a, enyi mêchechieen̄ ita kpai. 11 Ire, ido geelek òchechieek ininin̄ usun̄ inyi ogwu ubọọn̄ Babilọn, mè ikisi ikwaan̄ inyi, emi mâtele ido keya ikup me lek ijọn̄ kan̄, ikigbọ uko, mè ikiluk me lek ijọn̄ kan̄. Emi Okumugwem ntumu.” ’ ”
12 Etip yaage ke nlook Jedikaya, ogwu ubọọn̄ Juda, ibe, “Chieek ininin̄ usun̄ inyi ogwu ubọọn̄ Babilọn, mè kisi ikwaan̄ nyi ọmọ melek ebi kan̄, ke owu môgat ugwem. 13 Keke môrọ ibe owu melek ebi kwun̄ eweek ikwakwaan̄ me otu oge akọn̄, mè irak akan̄, mè irak ijo orukan̄, kubọk Okumugwem otumube ibak ido geelek ebi mêjitbe isisi ikwaan̄ inyi ogwu ubọọn̄ Babilọn? 14 Kagbagban̄ ikọ ebi nriran cha ebi ìkitumu inyi enyi ibe, ‘Enyi kpebesi ikwaan̄ inyi ogwu ubọọn̄ Babilọn.’ Ema ekiben nriran ataak inyi enyi. 15 ‘Emi ǹkaria ema. Ema ekisa erieen̄ n̄a ikan̄ ataak nriran. Eya orọ, emi mârieen̄ enyi isibi, enyi mêchechep, enyi melek ebi nriran cha ìkiben nriran inyi enyi. Emi Okumugwem ntumu.’ ”
16 Nnenitumu inyi ebi nriran mè otutuuk ebi ife chi ibe, “Okumugwem ìtumu ibe ikeyi: Ikagban̄ ebi nriran ebi ìkibe, ‘Ìkpofifiin̄ mgbọ, mêsa nroon̄ ikwaan̄ Uwu Mbuban Okumugwem inan̄a me Babilọn ika.’ Ema ekiben nriran ataak inyi enyi. 17 Ikagban̄ utọn̄ me lek ikọ kiban̄. Ìsi ikwaan̄ ìnyi ogwu ubọọn̄ Babilọn, ke enyi mêgat ugwem. Keke môrọ ibe ama yi ikana ǹrioon̄ ni? 18 Ire ema ire ebi nriran, mè ire ikọ Okumugwem ikup ema me emen, ema ebeek-nu Okumugwem Ogwukaan̄ Inyọn̄ mè Ijọn̄ ibe mè ekakpulu nroon̄ ikwaan̄ òsisik me emen Uwu Mbuban Okumugwem, mè emen uwu ogwu ubọọn̄ Juda, mè emen ama Jeruselem ìsa ìfo Babilọn. 19 Mije, îre ikọ yi ke Okumugwem Ogwukaan̄ Inyọn̄ mè Ijọn̄ otumu òfo me lek ebi kè atà Uwu Mbuban cha, mè Okwaan̄ ya melek ngugọọn̄ ekpirikpo ukot cha, mè itumu si òfo me lek nroon̄ ikwaan̄ òsisik me ama keyi, 20 echi Nebukadineja ogwu ubọọn̄ Babilọn ikakpuluge me mgbọ îtetbe Jekonayaa gwun̄ kè Jioyakim ogwu ubọọn̄ Juda, melek otutuuk ebi isi ene me Juda mè Jeruselem me usun̄ akọn̄ isa inan̄a me Jeruselem ifo Babilọn. 21 Iin̄, ikọ Okumugwem Ogwukaan̄ Inyọn̄ mè Ijọn̄, Awaji ebi Ijeren, otumube òfo me lek inu echi òsisik me emen Uwu Mbuban Okumugwem, mè emen uwu ogwu ubọọn̄ Juda, mè emen ama Jeruselem ìre ikeyi: 22 ‘Mêkpulu ema ifo Babilọn. Ere keya ke ema ebekup mege ire usen mâsibe isi iweek ema, mè isa ema igwu ikom ika inisun̄ me ere keyi. Emi Okumugwem ntumu.’ ”