Mîtọp Jerimaya itap me udọn̄
38
Sefatiya gwun̄ kè Matan, mè Gedaliya gwun̄ kè Pasuru, mè Jewukan gwun̄ kè Selemeya, mè Pasuru gwun̄ kè Malikija eneninọ inu Jerimaya okitumu inyi otutuuk ebi ene ibe: 2 “Okumugwem ìtumu ibe ikeyi: ‘Ogwu geelek òbabia me emen ama yi môkwu me otu oge akọn̄ mè ubọk akan̄ mè ijo orukan̄. Ire, ogwu geelek òsasaba ikana igọọk ebi Babilọn môgat ugwem. Ogwa môsa ugwem kan̄ ilibi inwọnọ, mè ikup me ugwem.’ 3 Okumugwem ìtumu ibe ikeyi: ‘Me atikọ, mêyaka ama yi itap me ubọk ebi akọn̄ Babilọn, ema kpebelọlọ ibọbọkọ ama yi.’ ”4 Ebi ibot mkpulu cha enenibe ogwu ubọọn̄, “Soso, tele inyi ekpan̄ ene yi. Òkitap ebi akọn̄ ìsisik me ama yi uwọ-lek, mè ikitap ebi ene si uwọ-lek, bak me lek inu îkitumu inyi ema. Mije, ene yi ìkakeek ife chi ata, ìkikeek ema ijo.”
5 Ogwu ubọọn̄ Jedikaya obebe ema, “Kpọ ene ya ire eya me ubọk kinyi. Ogwu ubọọn̄ ìkpokọt irọ inu geege ikeme enyi.”
6 Ife cha etetet Jerimaya isa isi itọp itap me emen udọn̄ kè Malikija, gwun̄ ogwu ubọọn̄ òkup me oyet egep ebi mbem. Esa olik igele Jerimaya isiki itap me emen udọn̄ ya. Mun̄ kpunu me udọn̄ ya, îre utek okup. Jerimaya orọrọn̄ inwaan̄ me emen utek ya.
7 Ire, Ebedi-Melek ogwu Kus, òrere ene ge me lek ebi ibot ikwaan̄ uwu ogwu ubọọn̄, oneninọ ibe ke mîtap Jerimaya me emen udọn̄. Me ike mgbọ ya, ogwu ubọọn̄ ìkweek irek me otunchit Benjamin. 8 Ebedi-Melek onanan̄a me uwu ogwu ubọọn̄ isibi isi lek ogwu ubọọn̄, mè isi itumu inyi ibe, 9 “Ogwukaan̄ n̄a ogwu ubọọn̄, ife chi mîrọ inu ikpak me lek inu geelek ema erọbe Jerimaya ogwu nriran. Ema mîtọp Jerimaya itap me emen udọn̄, ere môkupbe iran̄ ọfiọọn̄ ikwu, mije, mgbọ keyi kpunu fituru geege me ama yi.”
10 Ogwu ubọọn̄ onyinyi Ebedi-Melek ogwu Kus ida ibe, “Sa akọp ene ita me ere keyi gbaalek kwun̄ si san̄a Jerimaya ogwu nriran sibi me emen udọn̄ ya sabum òkwu.”
11 Ebedi-Melek osasa ebi ene cha igbaalek kan̄ isi agwut ge me irak ere ekisun̄ inu me uwu ogwu ubọọn̄, mè ikpulu oka ekwut mè ofọnti ògwagwak me ere ya, mè inisa olik itobo ekwut cha, mè iben igele isiki inyi Jerimaya me emen udọn̄. 12 Ebedi-Melek ogwu Kus onenibe Jerimaya, “Tap oka ekwut chi mè ofọnti chi me irak ayiyok kwun̄ sa rak olik ebesa itaba owu isibi.” Jerimaya orọrọ ikeya. 13 Enenisa olik cha itaba Jerimaya, mè ibene ọmọ isibi me emen udọn̄ ya. Inenikup me emen oyet egep ebi mbem ya.
Jedikaya îdo Jerimaya ikọ
14 Ogwu Ubọọn̄ Jedikaya oneniria ibe esa Jerimaya ogwu nriran enu, esasa inu me òso isotu ita me lek Uwu Mbuban Okumugwem. Ogwu ubọọn̄ onenibe Jerimaya, “Emi mânido owu ikọ ge nu. Kalet emi inu geege,”
15 Jerimaya obebe Jedikaya, “Ire mfọọk owu, ìre owu òkpokpan̄ emi ni? Nkenyinyi owu nteme, owu òkpogban̄.”
16 Ire, ogwu ubọọn̄ Jedikaya onwenween̄ lek inyan̄a ibot me nlelet inyi Jerimaya, ibe: “Kè lek ugwem Okumugwem, ogwu ònyinyi eji efuuk, emi ǹkabakpan̄ owu, ǹkabayayaka si owu itap me ubọk ebi ìkiweek ebek ugwem kwun̄.”
17 Jerimaya onenitumu inyi Jedikaya ibe, “Okumugwem, Awaji Ogwukaan̄ Inyọn̄ mè Ijọn̄, Awaji ebi Ijeren, ìtumu ibe ikeyi: ‘Ire owu onan̄a isibi igọọk ebi ibot akọn̄ ogwu ubọọn̄ Babilọn, mè iyaka lek kwun̄ inyi ema, ugwem kwun̄ môsibi, ama yi si, kpebewọp; owu melek ebi uwu kwun̄ mêgat ugwem. 18 Ire, ire owu òkasibi igọọk ebi ibot ogwu ubọọn̄ Babilọn ìsi ìyaka lek kwun̄ ìnyi ema, mêyaka ama yi itap me ubọk ebi Babilọn, ema mêtatap ukan̄ iwọp; owu me lek kwun̄ si, òkponwọnọ me ubọk kiban̄.’ ”
19 Ogwu ubọọn̄ Jedikaya obebe Jerimaya, “Ufieek-owot n̄a ìkup me lek ebi Ju ebi ìkakana igọọk ebi Babilọn, mije, ebi Babilọn mêkọt iyaka emi itap me ubọk kiban̄, mè ema erọ emi nnaan̄.”
20 Jerimaya otutumu inyi ọmọ ibe, “Kpebeyaka owu inyi. Soso, gban̄ utọn̄ me lek ikọ Okumugwem, mè rọ inu emi ntumube inyi owu. Ire orọ, môje ijaan̄ owu me lek, ugwem kwun̄ si môsibi. 21 Ire, ire ojit iyayaka lek kwun̄ inyi, inu Okumugwem ochilibe ijeen̄ emi ìre ikeyi: 22 Mêsan̄a otutuuk ebibaan̄ ìsisik me uwu ogwu ubọọn̄ Juda isa ijet ebi ibot akọn̄ ogwu ubọọn̄ Babilọn. Ebibaan̄ cha mêkekitumu inyi owu ibe:
“ ‘Ata ebi une kwun̄ cha otoon̄be ejit,
mîfiaan̄ owu ito, mè inye lek igak owu;
ukot kwun̄ înwaan̄ ikam me utek,
ema mîjit owu itele.’
23 “Mêsan̄a otutuuk ebi nwa kwun̄ mè nsabọn kwun̄ igwook inyi ebi Babilọn. Owu me lek kwun̄ òkponwọnọ me ubọk kiban̄, ire, ogwu ubọọn̄ Babilọn môtet owu; ama yi si, ebetatap ukan̄ iwọp itaka iriọk.”
24 Jedikaya onenitumu inyi Jerimaya ibe, “Kachieek ibe ene geege inọ ikọ chi, inyi owu okakwu. 25 Ire ebi ibot inọ ibe ke emi melek kwun̄ mîkpa ukpatu, mè ire ema inu me lek kwun̄ inibe, ‘Kpa nyi eji nu, inu otumube inyi ogwu ubọọn̄, mè inu ogwu ubọọn̄ otumube inyi owu; kalet eji inu geege; ire olet, eji mêkpan̄ owu,’ 26 tumu nyi ema ibe, ‘Mbeek ke nkibeek ogwu ubọọn̄ ibe ikayaka ìria emi ìsi uwu kè Jonatan ibe emi ǹsi ǹkwu me ere ya.’ ”
27 Otutuuk ebi ibot enunu me lek kè Jerimaya inido ọmọ ikọ, itutumu otutuuk inu cha ogwu ubọọn̄ onyibe ọmọ ida ibe itumu. Eya orọ, ema kpeyaka itumu ikọ melek kan̄ igak ikeya, mije, ene geege ìkanọ ibot ukpatu ogwu ubọọn̄ melek kan̄.
28 Jerimaya okukup me oyet egep ebi mbem mege ire usen ebọkọbe Jeruselem. Ọmọ òwa me ere ya mgbọ ebọkọbe Jeruselem.