Uriaak isasa ibeek nsan
5
Jei Okumugwem, keek inu òrọrọn̄ ikeme eji,kpọ, mè mun̄ esip òkup eji me isi.
2 Ìrot kiji îkana inin̄ ubọk ebi ichen,
uwu kiji înin̄ ubọk ebi ofifi ido.
3 Eji mîkana ebi kpà-nte, mè ebi ìnan ute;
ebi nga kiji mîkana ebi nwakpa.
4 Mudim eji ekinwọ, eji ekilelep, sabum ènwọ,
iye eji ekisọk, eji ekikpekpe ewe, sabum esọk.
5 Ebi ìkililaba eji ekitọbọ eji ubọk me udun̄ ebek;
eji mîgak iweek, ire, kpenyi eji isiki-efuuk.
6 Eji mînyana ubọk ibeek ebi Ijipiti mè ebi Asiria
ibe enyi eji inorie erie ejot owot.
7 Ebi nte kiji erọ ijo inu, ema kpeyaka ikup;
eji eyaka inikibọkọ mkpukpe ijo inu kiban̄.
8 Ebi usun̄ ekikpulu eji mgbọ keyi,
kpunu ogwu òtataba eji isibi me ubọk kiban̄.
9 Inorie otu kiji, eji ekisa mkpa mè ugwem iweek,
bak me lek ebi ìkiben oge akọn̄ ikana emen èwê.
10 Uraafiọọn̄ îbak eji ukan̄ me lek,
akpa kiji ìkiyok kubọk ototun̄.
11 Mîtet ebibaan̄ me Sayọn me unye ilaak,
mè obaak ebibaan̄ me ama ebi Juda geelek.
12 Ebọp ebi ibot mkpulu me ubọk iben ijeen̄ ikpan̄
kpekpọkpọ ebi ugane isi, mè ìnyi ema ulibi.
13 Nsabọn irieen̄ ekibọkọ ukwook me lek ewuuk ikikọk akpa,
asasa nsabọn ebirieen̄
ekekinyen̄e me irak efit iye.
14 Ebi ugane mînọọn̄ me otunchit ama,
nsabọn irieen̄ kpeyaka ikọt okwa.
15 Unwọọn̄ îsibi ita eji me ejit;
ifit òjijop kiji îkana ufieejit.
16 Okpibot ubọọn̄ înan̄a eji me ibot irọn̄.
Îta eji me ubọk, mije, eji mîrọ ijo inu!
17 Mije keyi, ejit kiji îrọn̄ utọọk;
mije inu chi geelek, chieen̄ îdun eji,
18 bak me lek ogoon̄ Sayọn òlaak ukpọk ukpọk,
ebi kè ibo oron afa ekekinililiin̄ ikana me inyọn̄.
19 Jei Okumugwem, owu ìre ubọọn̄ ire mgbọ geelek;
ogboon̄ ubọọn̄ kwun̄ ìbokukup nan̄a me ukot re me ukot.
20 Keke orọ okiwuuk eji mgbọ geelek?
Keke orọ ojitbe eji itele ijọn̄ọ mgbọ ikeyi?
21 Jei Okumugwem, kpọk gwen eji tap me lek kwun̄,
inyi eji egwu ekom egọọk owu;
kpọk rọ ukot eyi kiji ikup ayaya ayaya
kubọk mgbọ ebi ukot ikaan̄.
22 Sà ìre owu òjijit eji isan̄a isi mege,
mè inaan̄ ejit me lek kiji iraka iman̄ ni?