Ijikien ìre ogwu ngwugwa, mè ire si ogwu nriran. Ọmọ me lek ebi edasi ikpulu me usun̄ akọn̄ isa ifo Babilọn sabum mgbọ enigbugbọ ama Jeruselem igwook. Ọmọ melek ebi usun̄ akọn̄ ìnan̄a me Juda ekiluk me ere ya. Okumugwem onenigwen ọmọ ibe inire ogwu nriran kan̄, mè ikitumu ikọ kan̄ inyi ebi Juda ìkup me usun̄ akọn̄, melek ebi Juda ìbabia me Jeruselem. Ijikien îbene ikiben nriran sabum enigwak ama Jeruselem, mè ikiben si inyi isi mgbọ egwakbe ama ya isan̄a.

Ikpa Ijikien ìkup irek go. Adasi irek (ibot 1-3), ìre ilaak ọkpọchieen̄ Ijikien omun̄be ujamgbugbo eyi Okumugwem, mè ike Okumugwem ogwenbe Ijikien ibe inire ogwu nriran kan̄. Òso irek iba (ibot 4-24), ìre itataba ubọk me utọn̄ eyi Ijikien otababe ebi Juda, ibe ke ùrioon̄ òkinu inyi ema, mije ema ejitbe Okumugwem itele. Òso irek ita (ibot 25-32), ìre nriran ofolek osusut òkup inyi ebi ofifi ido ìluluk me agba lek ebi Juda. Òso irek ini (ibot 33-39), ìre etip Okumugwem, echi Ijikien olookbe mgbọ înọbe ibe ke ebi ochicha mîra ibọkọ ama Jeruselem. Etip cha ìre etip òkinyi ebi Juda ata ikpọchieen̄. Okumugwem ìtumu ibe ke ọmọ môtele ijo inyi ebi kan̄, mè ikpọk isa ema igwu ikom ika inu me ido kiban̄. Òso irek go (ibot 40-48), ìre ilaak ọkpọchieen̄, echi Ijikien omun̄be ofolek ayaya Uwu Mbuban me Jeruselem, mè ubọk iriaak Awaji, mè ubọk ebesa iche ijọn̄ Juda inyi ebi otoko kiban̄ mgbọ ema isigwu ikom inan̄a me usun̄ akọn̄ ika.

Mgbọ geelek Okumugwem okitumu ikọ inyi Ijikien, ìkigwen Ijikien “gwun̄ ebilene,” eyi òkijeen̄ ibe ke Ijikien ìre gaalek ogwu ebilene, mè ikijeen̄ si ibe ke Okumugwem îgwen ọmọ iria ikwaan̄.

Ere ge me emen ikpa yi eyi òsisibi esese ìre ilaak ọkpọchieen̄ eyi Ijikien omun̄be nchat ukwuuk ebilene me emen iteke ijọn̄. Ijikien îmun̄ mgbọ Ekwukwu Okumugwem owutbe efet itap me emen nchat ukwuuk cha, mè imun̄ mgbọ ema ekanabe ebi ìkup me ugwem.