Ijejeen̄ ofolek mbin akọn̄ ebekpa ikana Jeruselem
4
“Owu ogwu ebilene, mọnọ owut okpungwu ge to me isi kwun̄, mè gwook ama Jeruselem me lek. 2 Gwook si mbin akọn̄ kana ama ya. Gwook urak ukot akọn̄ melek okpurukpu etọmbe ibene igọọk, melek ebi akọn̄ me urum me urum ekpabe ikana, mè gwook si nroon̄ ekisa igbugbọ mgban eyiyikbe ikana ama ya okokop. 3 Mọnọ okwukwut ebọn̄be ikup akpakpa sa gwuun̄ me etete kwun̄ melek ama ya kubọk ke ìre mgban okwukwut, mè yaka isi kwun̄ kikpọ ama ya. Mônenikup kubọk ekpakpa mbin ikana ama ya, ke ìre owu okikpa mbin ya ikana. Eyiyi môre inu ijejeen̄ isa inyi ebi uwu kè Ijeren.4 “Eya isiraka, siki laak me agba nkan̄ kwun̄ agan̄ ujit, mè ben ijo inu ebi uwu Ijeren toon̄ me lek kwun̄. Owu môben ijo kiban̄ otutuuk otu ifuk usen olaakbe me agba nkan̄ keya. 5 Nnyi owu otu ifuk usen yaage melek otu ifuk acha ijo inu kiban̄. Eya orọ, efit usen ita mè akọp onaan̄ge ke owu obobeme ijo inu ebi uwu kè Ijeren.
6 “Osilaak iso otu ifuk usen, gwu kom sa agba nkan̄ kwun̄ agan̄ ulom laak si. Eya ke owu môsa iben ijo inu ebi uwu Juda. Ǹnyi owu akọp usen ini, usen ge okup inyi acha ge. 7 Kup ikeya yaka isi kwun̄ da mbin akọn̄ ekpabe ikana Jeruselem ya. San̄a ofọnti san̄a me ubọk kwun̄, mè sa ukpọk ubọk ben nriran keme ama ya. 8 Mâsa olik ibọp owu, inyi okakọt ìgwu lek ìkom ìnan̄a me agan̄ ge ìlaak me agan̄ keyilọ, mege usen mbin akọn̄ ya môsobe.
9 “Mọnọ akpa balì mè akpa wit, mè ngọdi melek mfut lentin, mè akpa milet melek sìpelit gbaan̄ tap me emen inu ge, mè sa rọ fituru nyi lek kwun̄. Eya ke owu obokirie otutuuk efit usen ita mè akọp onaan̄ge ya obosa agba nkan̄ ge kwun̄ ilaak. 10 Kitọtọ inorie kwun̄, kọpu ge me usen, kirie, mè kirie kpọ me lek mgbọ edọmọbe. 11 Kitọtọ si mudim kwun̄, kọpu iba me usen, nwọ, mè kinwọ kpọ me lek mgbọ edọmọbe. 12 Kirọ inorie kwun̄ kubọk nchicha akpa balì. Kisa ifin ebilene sọk ukan̄ rọ nchicha ya taka. Kikup me isi ebi ene rọ inorie ya.” 13 Okumugwem onenibe, “Ikeyi ke ebi Ijeren ebekirie òchichaka inorie me ido cha mâlilababe ema isi igwook.”
14 Emi nnenibe, “Jei Ogwukaan̄-ene Okumugwem! Emi ǹkararak ìchaka mbuban me lek n̄a. Akarake ijija n̄a, mege inire mgbọ keyi, ǹkararak ìtaka anam ògagak ikwu, mè ìre eyi anam afa ochimbe ikpan̄. Anam geege mbuban ochakabe me lek ìkararak ìnin̄ emi otu.”
15 Okumugwem obebe, “Kpan̄asi ifin ebilene, nnyi owu ifin eriembuuk òsa òtem inorie kwun̄.”
16 Inenitumu si inyi emi ibe, “Gwun̄ ebilene, mâgon oniin̄ inorie okije inin̄ Jeruselem ichit. Ebi ene ebekitọtọ inorie me otitọ irie, mè ikijijiin̄ lek; mè ikitọtọ mudim inwọ, mè ikifieek ejit, 17 mije, inorie mè mudim ìbonanan. Ebi ene isibene chieen̄ itoon̄ me lek ebi melek kiban̄, ebekiririki. Ema ebetọtọk ita mije ijo inu kiban̄.