3 Iyayaka ibe emi, “Gwun̄ ebilene, taka ikpa ekakat yi nkinyi owu, inyi ijot owu owot.” Ntataka, ininin̄i kubọk aran̄ akwọọk me otu n̄a.

4 Inenitumu inyi emi ibe, “Gwun̄ ebilene, ngwa, je si lek ebi uwu kè Ijeren, mè tumu ikọ n̄a nyi ema. 5 Ìkare ebi ìkitumu usem ebi ene kpekinọ mè ebi ìkitumu usem òyọyọt ke nria owu isi lek. Îre ebi uwu kè Ijeren ke nria owu isi lek. 6 Ìkare ebi ofifi ido geege kpekinọ usem kiban̄ mè ebi ido usem kiban̄ oyọtbe, ebi owu kpokọt igobo ikọ kiban̄ itet ke nria owu isi lek. Me atikọ, mebe ke ìre ebiba ke nria owu isi lek, ebiba kè egban̄ utọn̄ me lek ikọ owu obotumu. 7 Ire, ebi uwu kè Ijeren kpebeweek igbagban̄ utọn̄ me lek ikọ kwun̄, mije, ema kpeweek igbagban̄ emi utọn̄ me lek. Ema ìre ebi unye-ejit mè ebi unye-ibot. 8 Ire, mârọ inyi owu ònye ejit, mè ònye ibot ògak ema. 9 Mârọ inyi okwut isi kwun̄ inye kubọk ewuuk ònyenye ichit, eyi ònyenye igak ewuuk unye isi. Ubọk geelek ema erebe ebi uwu mkpaka-ibot, katet ukpook me lek kiban̄, kafefieek si owot me lek kiban̄.”

10 Inenitumu si inyi emi ibe, “Gwun̄ ebilene, riọọn̄ ubọk gban̄ otutuuk ikọ chi nkitumu inyi owu, mè mọnọ tap me ejit. 11 Je si lek bọn ebi ido kinyi ìkup me usun̄ akọn̄, mè tumu ikọ nyi ema. Ema egbagban̄, kpegban̄, tumu nyi ema ibe ke ikọ Ogwukaan̄-ene Okumugwem otumube ire eya.”

12 Ekwukwu Awaji onenijibi emi ibene, nnọnọ ikpele ida ge me udun̄ n̄a okitaan̄ kubọk isinyọn̄ ibe, “Itọn̄ ikup inyi ujamgbugbo Okumugwem me ere nluk kan̄.” 13 Nnọ si okput uwop inu òkup me ugwem cha ike uwop kiban̄ cha ge okichichiọọk me lek ge, melek okput ekpirikpo cha òkup me agba lek kiban̄. Ida cha okekikput kubọk isi inyọn̄. 14 Ekwukwu Awaji ya ojijibi emi ibene, mè isa emi inan̄a. Njeje me ujat ejit mè unaan̄-ejit me emen ekwukwu n̄a. Ire, unye Okumugwem ojojot me lek n̄a. 15 Nnenisi lek ebi usun̄ akọn̄ ìkup me Teli Abibu me agba lek okwaan̄ Keba. Nkukup me ere ya ife cha ekiluk usen jaaba, mbiribọ ogwogwook emi me lek.

16 Me òta usen jaaba ya, Okumugwem onenitumu inyi emi ibe: 17 “Gwun̄ ebilene, nsa owu irọ ogwu mbem inyi ebi uwu kè Ijeren. Eya orọ, nọ ikọ otu n̄a, mè taba ema ubọk me utọn̄ nyi emi. 18 Ire mbe ogwu ijo ene, ‘Owu òkpolọlọ ikwukwu mkpa,’ mè ire owu òkataba ọmọ ubọk me utọn̄, mè ìre òkatumu ikọ ìsa ìteme ọmọ nteme, inyi itele ijo oniin̄ kan̄, mè igat ugwem, ogwu ijo ene ya môkwu mkpa mije ijo inu kan̄. Ire, eje kan̄ ìbotoon̄ owu me ibot. 19 Ire, ire otaba ogwu ijo ene ubọk me utọn̄, ijijit igwugwu ikom inan̄a me lek ijo inu, ìkatele ijo oniin̄ kan̄, ọmọ môkwu mkpa mije ijo inu kan̄. Ire, owu ora inyan̄a lek kwun̄.

20 “Ofifi kan̄, ire ogwu ata irọrọ igwu ikom me ata irọrọ kan̄ isi inin̄ me ijo inu, mè nsirieen̄ mgban òtọbọ ene ukot ikwek ọmọ isi, ọmọ môkwu mkpa, ire owu òkataba ọmọ ubọk me utọn̄. Ata inu geelek îrọbe, kpebekeek. Ọmọ môkwu mkpa mije ijo inu kan̄. Ire, eje kan̄ ìbotoon̄ owu me ibot. 21 Ire, ire owu otaba ogwu ata irọrọ ubọk me utọn̄ ibe ikarọ ijo inu, igbagban̄, ìkarọ ijo inu, ọmọ môgat ugwem mije îbọkọbe nteme. Sa me ikeya, owu onyan̄a lek kwun̄.”

22 Unye Okumugwem ìjojot me lek n̄a me ere ya. Inenibe emi, “Nan̄a keke je sibi lek òla ijọn̄, inyi ǹtumu ikọ melek kwun̄ me ere ya.” 23 Nnanan̄a ikeke, mè isibi isi lek òla ijọn̄ ya, mè isi itoon̄ me lek ujamgbugbo Okumugwem okekebe me ere ya, kubọk ujamgbugbo mmun̄be me agba okwaan̄ Keba. Nrọrọn̄ ikana isi ichit me ijọn̄.

24 Ekwukwu Awaji oninin̄ emen n̄a, mè ibene emi igwuun̄, nkekeke me ukot. Itutumu inyi emi ibe, “Je fo uwu kwun̄, mè gwuk isotu kwek lek kwun̄. 25 Ire owu, gwun̄ ebilene, mêsa olik ibọp owu. Mêbọp owu, inyi owu okakijijen̄e ìkana me etete ebi ene. 26 Mârọ alọm kwun̄ igba igọm me eseen̄ kwun̄, inyi owu okakọt ìsan̄a amọn ìkan̄ inu ìnyi ema, mije, ema ìre uwu mkpaka-ibot. 27 Ire, nsitumu ikọ inyi owu, mânenichili owu otu, inyi owu òtumu ikọ ònyi ema. Tumu be, ‘Ogwukaan̄-ene Okumugwem ìtumu ibe ikeyi.’ Ogwu geelek òbogban̄, igban̄; ogwu geelek òbojit, ijit, mije, ema ìre uwu mkpaka-ibot.