Awaji îsa Ijikien irọ ogwu mbem
33
Okumugwem onenitumu inyi emi ibe: 2 “Gwun̄ ebilene, tumu ikọ nyi bọn ebi kinyi ibe: ‘Nsiria oge akọn̄ itap me ido ge, mè ire ebi ido ya igobo ene ge me etete kiban̄ ibe inire ogwu mbem inyi ema, 3 mè ire ogwu mbem ya inimun̄ oge akọn̄ okinu me ido kiban̄, mè iwut otita isa ilook ebi ene, 4 ire ikaan̄ ogwu inọ ida otita ya, mè ìkagban̄ utọn̄ me lek ulook ya, oge akọn̄ ya onenisan̄a ugwem kan̄, eje kan̄ ìbotoon̄ ọmọ me ibot. 5 Eyi înọnọ ida otita ya, ìkagban̄ utọn̄ me lek ulook ya, eje kan̄ ìtoon̄ ọmọ me ibot. Mebe ke îgban̄ utọn̄ me lek ulook ya, kè ònyan̄a ebek ugwem kan̄. 6 Ire, ire ogwu mbem ya imun̄ oge akọn̄ okinu, ìkawut otita ìsa ìlook ebi ene, oge akọn̄ ya onenimọnọ ene ge kiban̄, ene ya ìkwu mije ijo inu kan̄, ire, ogwu mbem ya ke mbado eje ene ya me ubọk.’7 “Gwun̄ ebilene, nrọ owu ogwu mbem uwu kè Ijeren; eya orọ, gban̄ ikọ otu n̄a, mè taba ema ubọk me utọn̄ nyi emi. 8 Mgbọ nsibe ogwu ikpak, ‘Ene ikpak, owu òbokwukwu!’ mè òkatumu ìnyi ìsa ìtaba ọmọ ubọk me utọn̄ ibe itele ijo oniin̄ îkije ya, ogwu ikpak ya môkwu mije ijo inu kan̄, ire, owu ke mbado eje kan̄ me ubọk. 9 Ire, ire owu otaba ogwu ikpak ubọk me utọn̄ ibe itele ijo oniin̄ îkije, ire, ìkatele oniin̄ ya, ọmọ môkwu bak me lek ijo inu kan̄, ire, owu ora inyan̄a lek kwun̄.
10 “Gwun̄ ebilene, tumu nyi ebi uwu kè Ijeren ibe: ‘Enyi ekitumu ibe: “Eyi inu ikpak kiji mè ijo inu kiji okikeme eji ikeyi, mè ikitak eji lek ita, mọmọ ubọk eji ebesa igat ugwem?” ’ 11 Tumu nyi ema ibe, ‘Emi Ogwukaan̄-ene Okumugwem m̀be ikeyi: Kè lek ugwem n̄a, mkpa ogwu ikpak ìkakitotop emi me lek, ire, m̀be igwu ikom itele oniin̄ kan̄, mè igat ugwem. Jei ebi uwu kè Ijeren! Keke orọ enyi ekiweek ikwakwaan̄? Ìgwu ìkom! Ìgwu ìkom ìtele ijo oniin̄ kinyi!’
12 “Eya orọ, gwun̄ ebilene, tumu nyi bọn ebi kinyi ibe, ‘Ata irọrọ ogwu ata irọrọ ìkponyan̄a ọmọ me usen îrọbe ijo inu. Ikeya si, inu ikpak ogwu ikpak ìkpoda ọmọ ito me usen îgwube ikom itele inu ikpak kan̄. Ogwu ata irọrọ ìkpogagat si ugwem bak me lek ata irọrọ kan̄ me usen îtapbe ubọk me ijo inu.’ 13 Ire mbe ogwu ata irọrọ, ‘Owu òboluluk ugwem,’ inenisa ata irọrọ kan̄ itoon̄ ejit, mè isi irọ ijo inu, kpebekeek ata irọrọ kan̄ kubọk ge; ọmọ môkwu mkpa bak me lek ijo inu îrọbe. 14 Ofifi kan̄, ire mbe ogwu ikpak, ‘Owu òbokwukwu,’ inenigwu ikom me ijo inu kan̄, mè inirọ inu ònenen mè inu òtatat, 15 mè iyaka inu îbọkọbe me nsọọn̄ me ibot urieek inyi ogwukaan̄, mè isa inu îchiin̄be ijet ogwukaan̄, mè ikirọ orọmijọn̄ òkirọ ene igat ugwem, ìkayaka ìrọ ijo inu, ìboluluk ugwem; ìkpokwu. 16 Ijo inu geelek îrọbe, kpebeyaka ikeek ibak ọmọ. Îrọ inu ònenen mè inu òtatat; eya orọ, ìbogagat ugwem.
17 “Ire, ebi kinyi ekibe, ‘Oniin̄ Okumugwem ìkare oniin̄ unen.’ Ire, îre oniin̄ kiban̄ ikarege oniin̄ unen. 18 Ire ogwu ata irọrọ itele ata irọrọ kan̄, mè isi irọ ijo inu, môkwu mkpa mije ijo inu îrọbe. 19 Ire ogwu ikpak igwu ikom me inu ikpak kan̄, mè irọ inu ònenen mè inu òtatat, môgat ugwem mije îrọbe ikeya. 20 Ire, enyi ebi uwu kè Ijeren ekibe, ‘Oniin̄ Okumugwem ìkare oniin̄ unen.’ Ire, mâsibi enyi oyerebet me ibot me ene me ene ikpọ me lek oniin̄ ene ya.”
Etip akọn̄ òrerie Jeruselem
21 Me òso usen go, me òso akọp onyan̄, me òso akọp mè acha iba eji ekupbe me usun̄ akọn̄, ene ge òlilibi inwọnọ akọn̄ me Jeruselem onunu me lek n̄a, mè inibe, “Akọn̄ îrie ama Jeruselem!” 22 Me ikakwun̄ òwele usen ogwu ekot ugwem ya onire, unye Okumugwem okukup me lek n̄a, ichichili emi otu ibook sabum ewelegwe kan̄ ene ya onube me lek n̄a. Ikeya ke nkitumu ikọ, ǹkayaka ìre mbuuk.
23 Okumugwem onenitumu inyi emi ibe: 24 “Gwun̄ ebilene, ebi ìkiluk me ere chi egbugbọbe igwook me Ijeren ekibe: ‘Ebereyam ìre ibot ene ge gaalek, Awaji onyinyi ijọn̄ ibe ibọkọ isak. Ire, eji mîwa. Eya orọ, eji ke enyi ijọn̄ ya ibe eji ebọkọ esak.’ 25 Eya orọ, tumu nyi ema ibe: ‘Ogwukaan̄-ene Okumugwem ìtumu ibe ikeyi: “Eyi enyi ekitaka anam melek eje me emen, mè ikikpọ mkpọmfaka kinyi chieen̄ me isi, mè ikifiat eje ene, ìre îgbe ibe enyi ebọkọ ijọn̄ ya esak ni?” 26 Eyi enyi ekisa oge akọn̄ kinyi itoon̄ ejit, mè ikirọ òchichaka inu, enyi geelek mîfifila nwa ebi melek kinyi, ìre îgbe ibe enyi ebọkọ ijọn̄ ya esak ni?’
27 “Tumu nyi ema ibe, ‘Ogwukaan̄-ene Okumugwem ìtumu ibe ikeyi: Kè lek ugwem n̄a, ebi ìsisik me ere cha egbugbọbe ebekwakwaan̄ irurọn̄ọ me otu oge akọn̄; ebi ìkup me oron, mâyaka inyi ebi kè anam oron egwak etaka; sà ebi ìkup me uwu mgban akọn̄ mè emen nkororok ebekwaan̄ me ubọk ijo orukan̄. 28 Mârọ ibe ido ya ikana ere òyayat inọọn̄, unye kan̄ îkisa igumu lek ya môtata. Ogoon̄ Ijeren cha môyat inọọn̄, ire lek, ene geege ìkpoyaka ikije isaba iraka me lek. 29 Mgbọ nsirọ ido ya iyat inọọn̄ mije filafila inu ema erọbe, ema mêneniriọọn̄ ibe ke emi nre Okumugwem.’
30 “Ire owu, gwun̄ ebilene, ebi kinyi ekikup me agba lek mgban ama mè otu isotu uwu kiban̄ ikitumu ikọ ofolek kwun̄. Ge itumu inyi ge, ge otumu onyi ge; ogwu ikup, ìkibe ogwu ngwan̄, ‘Na-nu, na gban̄ ikọ Okumugwem otumube.’ 31 Ema ekinu me lek kwun̄ kubọk ebi ene ekirọ, mè ikweek irek me isi kwun̄ kubọk ebi n̄a, mè ikinọ ikọ kwun̄, ire, ema kpekitap me irọrọ. Ekitumu ima kiban̄ imin me otu otu, ire, ejit kiban̄ ìmin me lek oruru ema ebekaan̄ me ngan. 32 Me atikọ, me lek kiban̄, owu òkup kubọk okwa ima ogwu utop ida òrọriọọn̄ ikwak nkwukwak okikọt. Mije, ema mîkinọ ikọ kwun̄, ire, kpekitap me irọrọ.
33 “Inu yi ìborọrọ si iso kwok kwok! Mgbọ inu yi isinirọ iso, ema mêneniriọọn̄ ibe ke îkaan̄ ogwu nriran òkukup me etete kiban̄.”