Urọk olik gerep
15
Okumugwem onenitumu inyi emi ibe: 2 “Gwun̄ ebilene, ìre olik gerep ìsa keke inwọn igak otutuuk agọọk uti geelek òkup me oron? 3 Ìre mîkisa uti gerep irom inu? Sà ìre mêkọt isa irọ okpọ̀kọ isa ikijeen̄ inu me lek ni? 4 Ekitap me ukan̄ isa irọ iye. Ukan̄ isitaka ibot agan̄ iba kan̄, mè inyiaan̄ lek etete kan̄, ìre îkaan̄ inu ebeyaka isa irọ? 5 Ire kpekọt isa irọ inu geege mgbọ inu geege ikarọge me lek, ebejeje ikọt isa irọ inu mgbọ ukan̄ otakabe, mè inyiaan̄ lek?6 “Eya orọ, Ogwukaan̄-ene Okumugwem ìtumu ibe ikeyi: Ike nsabe olik gerep, me etete uti geelek òkup me oron, inyi ibe ekesa esọk ukan̄, ikeya si ke mbarọ me lek ebi ìluk me Jeruselem. 7 Emi mâkana isi n̄a ikweek ema. Ubọk geelek ibe ke ema enan̄a me emen ukan̄ isibi, ukan̄ si môtaka ema. Nsikana isi n̄a ikweek ema, mgbọ ya, enyi mêtolek iniriọọn̄ ibe ke emi nre Okumugwem. 8 Mârọ inyi lek ijọn̄ kiban̄ ikana ǹrioon̄, mije ema ejitbe emi itele. Emi Ogwukaan̄-ene Okumugwem ntumu.”