6 “ ‘Emi nnenije ikiraka, mè imun̄ owu okinyinya ikana me emen eje kwun̄. Owu me emen eje kwun̄, emi mbebe owu, “Luk ugwem!” Iin̄, ǹtumu inyi owu me emen eje kwun̄ ibe, “Luk ugwem!” 7 Nrọrọ inyi owu òtibi òmin kubọk uti oron. Owu omimin, mè inin̄ ene, mè ijaan̄ uja enenen. Ebe kwun̄ okekeke owu me ejit, ijeek ibot kwun̄ otitibi igwook. Ire, owu òkup njak, mè ikup si ukpọk lek.

8 “ ‘Mgbọ mkpọkbe inije iraka, mè imun̄ owu, mmumun̄ ibe ke ora imin iso ibabat olom. Eya ke nsa otu utọn̄ ekwut n̄a iwele ichit owu, mè ichit njak kwun̄. Nnenichieek owu use, mè inyan̄a ibot melek kwun̄, owu onenikana eyi n̄a. Emi Ogwukaan̄-ene Okumugwem ntumu.

9 “ ‘Emi nneniken owu mun̄, mè igwọk owu eje isan̄a me lek, mè iken owu aran̄. 10 Nnenitap owu ofọnti elọlọk, mè itap owu ikpukot ikpa anam, mè isa ekwut lilin̄ òjajaan̄ ibala owu lek, mè isa ekwut unye otu ewe ichit owu lek. 11 Nsa inu mbala-lek ibala owu lek, mè itap owu asi ebek ubọk me ebek ubọk, mè akalari me ebek. 12 Nnenitap owu mkputọn̄ me utọn̄, mè itap asi inwọm me otu inwọm kwun̄, mè ikwuun̄ owu okpibot ubọọn̄ òjajaan̄ me ibot kwun̄. 13 Ikeya ke nsa alata araran̄ mè alata okuket ibala owu lek, mè itap owu ofọnti lilin̄ òjajaan̄ mè ekwut unye otu ewe melek ekwut elọlọk. Owu okekirie atata akpa ekọkọk mè aran̄ akwọọk melek aran̄ olifu. Owu onenijaan̄ uja enenen enenen, mè inimin ikana ogwu ubọọn̄ enenwaan̄. 14 Etip kwun̄ onenikitaan̄ ikana me etete ebi ido geelek bak me lek uja kwun̄, mije, uja kwun̄ ìsoso ifuk inan̄a me lek nsun̄be owu òrirọ òrirọ. Emi Ogwukaan̄-ene Okumugwem ntumu.

15 “ ‘Ire, owu osasa uja kwun̄ itoon̄ ejit, mè isa me lek etip kwun̄ òtataan̄ ikana ere ikana ogwu barabat, mè isa barabat ya ichim ebi geelek ìbeje iraka; uja kwun̄ ya okakana ire eyi kiban̄. 16 Owu osa usini ekwut kwun̄ cha irọ owuwa isi-ijọn̄ ikisa irọ barabat kwun̄ ikana. Inu kecha ìkagbe ibe imọnọ irek, ìkagbe si ibe ikukup mgbọ geege. 17 Owu osa si inu mbala-lek n̄a nnyibe owu cha, echi alata araran̄ mè echi alata okuket, irom mkpọmfaka echi orie inyi lek kwun̄, mè ìkirọ barabat melek kiban̄. 18 Owu osa ekwut kwun̄, echi elọkbe cha, itap ema me lek, mè isa aran̄ n̄a mè nsensi n̄a inu inigwa ngwugwa inyi ema. 19 Ikeya si, atata akpa ekọkọk mè aran̄ olifu melek aran̄ akwọọk cha, echi òrere inorie n̄a nnyibe owu ibe owu òrie, owu osasa isi igwa ngwugwa nsensi utop olu inyi ema. Inu owu orọbe ire ya. Emi Ogwukaan̄-ene Okumugwem ntumu.

20 “ ‘Ofifi kan̄, owu osa bọn ebirieen̄ kwun̄ mè bọn ebibaan̄ kwun̄ cha, omaan̄be inyi emi, igwa ngwugwa inyi mkpọmfaka cha ibe etaka. Ìre barabat kwun̄ ya ìkakekem si? 21 Owu okpan̄ nsabọn n̄a, mè isa ema igwa ngwugwa ewọwọp inyi mkpọmfaka cha. 22 Me emen otutuuk filafila inu cha geelek orọbe mè barabat obubatbe, òkayaka ìkeek mgbọ orebe sọn̄ gwun̄, mè ikup njak mè ukpọk lek, mè ikinyinya ikana me emen eje kwun̄.

23 “ ‘Môfieek! Môfieek inyi owu! Emi Ogwukaan̄-ene Okumugwem ntumu. Isọkọ me lek otutuuk inu ikpak kechilọ cha orọbe, 24 owu onama si obubot inyi lek kwun̄, mè irọ isi-ijọn̄ òbebene me oyet ile geelek. 25 Me ibot oniin̄ geelek, owu onama isi-ijọn̄ òbebene, mè ikikup me ere ya ikiwele ukot inyi ogwu geelek òboje iraka ibe inigọọk owu irọ barabat. Owu osa me ikeya ifiat uja kwun̄, mè ikirọ si ugwem barabat kwun̄ inyi isi. 26 Owu ogọọk ebi Ijipiti, ebi barabat cha, ìluluk iriaak owu, ikirọ barabat; mè ikpọkpọ ikirọ ugwem barabat ya ifo isi, isa ikirọ inyi ejit inaan̄ emi. 27 Eya orọ, nra ibene ubọk ibasulu owu osusut, mâsọp okike ijọn̄ kwun̄ igele, mè iyaka owu inyi ebi ochicha kwun̄, òrere nsabọn ibaan̄ Filisia, ebi esip inu owu orọbe otetbe lek. 28 Owu obubat mege isi ire lek ebi Asiria, mije, ugwem barabat ìkakijot owu. Ubọk geelek owu obubatbe melek ebiba, ìkajot si owu owot. 29 Owu oben barabat kwun̄ isa isi ire lek ijọn̄ ebi ewe, òrere Babilọn, ire, eya si, ìkajot owu owot.

30 “ ‘Otutuuk inu chi owu okirọ, kubọk enenwaan̄ òje oyet, ogwu kpunube esip geege me isi, ìkijeen̄ ibe ke owu ìre atalek ogwu wewe. Emi Ogwukaan̄-ene Okumugwem ntumu. 31 Eyi owu onamabe obubot me ibot oniin̄ geelek, mè irọ ubene ubene isi-ijọn̄ me oyet ile geelek, owu ofieek igak ebi òje oyet, mije, owu òkakisa barabat eyi kwun̄ ìbọkọ mkpukpe.

32 “ ‘Owu, nwa òsi ugan keyi, owu oma ebi ichen igak nlom kwun̄! 33 Ekikpekpe ogwu òje oyet geelek ikpoko. Ire, owu ònikicheche inu inyi ebi ugan kwun̄, isa ikirie ema udun̄ me ubọk, ibe enan̄a me agan̄ geelek ekenegọọk owu elaak. 34 Barabat eyi kwun̄ ìkup ntikwo ntikwo me lek eyi ofifi ebibaan̄. Mije, owu òkiweweek ebi ene ibe enu ugan me lek kwun̄, ìkare ebi ene ekiweek owu. Owu òkikpekpe ikpoko inyi ebi ene ibe enu, ìkare ebi ene ekikpe ikpoko inyi owu. Ikeya ke barabat eyi kwun̄ osa ikup ntikwo ntikwo.

35 “ ‘Eya orọ, owu ogwu barabat, gban̄ ikọ Okumugwem! 36 Ogwukaan̄-ene Okumugwem ìtumu ibe ikeyi: Bak me lek ulọk ijeje oyet òninin̄ igak owu emen, mè bak me lek owu obenbe njak kwun̄ iwele inyi ebi ugan kwun̄ me lek ugwem barabat, mè bak me lek otutuuk òchichaka mkpọmfaka kwun̄ cha, mè bak me lek eje bọn kwun̄ cha osabe igwa ngwugwa inyi ema, 37 eya orọ, kpọ, mâtitiin̄ otutuuk ebi ugan kwun̄, ebi ìkitop owu me lek cha, ebi omabe mè ebi okamage. Mâtitiin̄ ema inan̄a me agan̄ geelek òkana owu okokop, inyi enerọ ekeme owu. Mârọ owu òje njak me isi kiban̄; ema mêmumun̄ otutuuk njak kwun̄. 38 Mâtip owu oyerebet ekitip ebibaan̄ ebi ìsi ugan, mè ebi ìfiat eje ene; mè isa me unaan̄-ejit mè mba-ejit isulu owu osusut eyi mkpa. 39 Mâneniyaka owu itap me ubọk ebi ugan kwun̄ cha. Ema mêgwagwak obubot kwun̄ cha mè isi-ijọn̄ kwun̄ cha igwook. Mêtọn̄ọ owu ekwut isan̄a me ebon, mè iwọọk owu ofọnti isan̄a me lek, mè ibọkọ ujuja inu mbala-lek kwun̄ cha, mè itele owu njak mè ukpọk lek. 40 Ema mêsa urum ebi ejit onaan̄be inu me lek kwun̄, ebi mêsabe ewuuk itọọn̄ owu, mè isa oge akọn̄ isek owu okpọkọ okpọkọ. 41 Ema mêsa ukan̄ iwọp uwu kwun̄ iriọk, mè isulu owu osusut me isi owuwa ebibaan̄. Mânenirọ inyi owu òtele ijeje oyet, mè okayaka ìkpe ebi ugan kwun̄ cha mkpukpe. 42 Mâneniyaka uyok uyok unaan̄-ejit n̄a me lek kwun̄ ito, mè iben mba-ejit n̄a isan̄a owu me lek; lek n̄a mônenisuuk, m̀kpayaka inaan̄ ejit ofifi.

43 “ ‘Bak me lek ke owu òkakeek inu nrọbe inyi owu me mgbọ ijija kwun̄, ire, owu orọrọ otutuuk inu kechi isa irọ ibe emi ǹnaan̄ ejit, emi m̀kpalọlọ isasa mkpukpe inu chi orọbe itoon̄ owu me ibot. Emi Ogwukaan̄-ene Okumugwem ntumu. Ìre keke orọ owu osabe ugwem barabat inisọkọ me lek filafila inu kechilọ cha orọbe?

44 “ ‘Kpọ, otutuuk ene mêkisa owu ito urọk ibe: “Uga mè gwun̄ kan̄ enenwaan̄ ìre mbet mè mbet.” 45 Me atikọ, owu ìre gwun̄ enenwaan̄ nga kwun̄, ogwu òcha ogwu olom mè icha ebi bọn. Owu si ìre ngwan̄ enenwaan̄ ebi ngwan̄ kwun̄ ebibaan̄, ebi ìcha nlom kiban̄ mè bọn kiban̄. Nga kwun̄ ìre ogwu Et, sà nte kwun̄ ore ogwu Amọ. 46 Ngwan̄ kwun̄ enenwaan̄ ogwu ugane ìre Sameria, ogwu melek asabọn ama kan̄ ekupbe igba owu me agan̄ inyọn̄; sà ngwan̄ kwun̄ ogwu ijija, ore Sodọm, ogwu melek asabọn ama kan̄ ekupbe igba owu me agan̄ osiki. 47 Ìkare ijeje me oniin̄ kiban̄ gaalek ke oje, ìkarere si irọrọ chieen̄ filafila inu cha ema ekirọ gaalek ke owu orọ, ire, me otutuuk eru kwun̄, owu orọ eyi kwun̄ ifieek isaba eyi kiban̄. 48 Kè lek ugwem n̄a, ngwan̄ kwun̄ enenwaan̄ òre Sodọm mè asabọn ama kan̄ kperọ inu owu mè asabọn ama kwun̄ erọbe. Emi Ogwukaan̄-ene Okumugwem ntumu.

49 “ ‘Kpọ, ijo inu Sodọm ngwan̄ kwun̄ enenwaan̄ orọbe ìre ikeyi: Ọmọ mè asabọn ama kan̄ mîgumu lek, mè ikaan̄ ijo ebek inorie, mè ire ugbek, mè ikijit itatap ubọk inyi ebi ugbọọn̄ mè ebi una. 50 Ema mîbene oguga, mè irọ filafila inu me isi n̄a. Eya ke emi nkwọọk ema ifiin̄, kubọk owu oriọọn̄be. 51 Ijo inu Sameria orọbe ìkaso ìkike iba me lek ijo inu owu orọbe. Owu orọ filafila inu òfefieek lek igak echi kiban̄. Bak me lek ogbogbo filafila inu kwun̄ cha, ìyaka inikup kubọk ebi ngwan̄ kwun̄ ebibaan̄ cha ìre ebi ata irọrọ igak owu. 52 Owu si, kè esip lek kwun̄ itet owu, mije, bak me lek ijo inu kwun̄ ofieekbe igak echi ebi ngwan̄ kwun̄ ebibaan̄, owu orọ inyi ema eyaka enekup kubọk ebi kperọ inu geege ilọ. Eya orọ, ben esip kwun̄, mè bọkọ ochak, mije, owu orọ ebi ngwan̄ kwun̄ ebibaan̄ ekup kubọk ebi ata irọrọ.

53 “ ‘Ubọk geelek si, mâyaka inu ubọọn̄ ebi Sodọm mè echi asabọn ama kan̄ inyi ema, mè iyaka si inu ubọọn̄ ebi Sameria mè echi asabọn ama kan̄ inyi si ema, mè iyaka si inu ubọọn̄ echi kwun̄ inyi owu si igbaalek, 54 inyi owu òben esip kwun̄, mè òbọkọ ochak mije inu cha geelek orọbe isa ikat ema ejit. 55 Ebi ngwan̄ kwun̄ ebibaan̄, òrere Sodọm mè asabọn ama kan̄ melek Sameria mè asabọn ama kan̄, mêkana ikup me ata irek ema ewuukbe lek ikup. Owu mè asabọn ama kwun̄ si mêkana si ikup me ata irek enyi ewuukbe lek ikikup. 56 Mgbọ ugumulek onin̄be owu ibot, owu òkpọkpọ Sodọm ngwan̄ kwun̄ enenwaan̄ chieen̄ isiki, òkakichak otu me lek, 57 sabum enikpọk mbum ijo inu kwun̄. Ikeya si ke asabọn ama ebi Edọm mè otutuuk ebi ìluluk ikana ema, melek asabọn ama ebi Filisia, mè otutuuk ebi ìluluk ikana owu ekichak owu ochak. 58 Îre mkpukpe barabat kwun̄ mè filafila inu orọbe cha ke okibọkọ. Emi Okumugwem ntumu.

59 “ ‘Ogwukaan̄-ene Okumugwem ìtumu ibe ikeyi: Ubọk owu orọbe, ikeya si ke emi mbarọ owu, mije, owu okpọ use ochieekbe emi isiki chieen̄, sa me lek owu ofiatbe inyan̄a-ibot n̄a. 60 Ire, emi mâkeek inyan̄a-ibot nnyan̄abe melek kwun̄ mgbọ orebe ijija, mè irọ si inyan̄a-ibot òbokeke ire mgbọ geelek melek kwun̄. 61 Mânyi owu ebi ngwan̄ kwun̄ ebibaan̄ cha, ebi ugane kwun̄ mè ebi ijija me lek kwun̄. Mgbọ ya, owu mônenikeek inu cha orọbe, esip môtetet owu. Emi m̀bayaka ema inyi owu, inyi ema enere bọn kwun̄ ebibaan̄. Ire, ìkare mije inyan̄a-ibot n̄a melek kwun̄ ke mbayaka ema inyi owu. 62 Mgbọ ya, emi mânenirọ inyan̄a-ibot n̄a melek kwun̄ ikeke inye, owu môneniriọọn̄ ibe ke emi nre Okumugwem. 63 Sa me ikeyi, mgbọ nsinirọ esuuk me ibot kwun̄ mije otutuuk inu geelek owu orọbe, esip mônenitet owu, owu òkpoyaka ikọt ikama otu ofifi, mije ochak òbochak owu. Emi Ogwukaan̄-ene Okumugwem ntumu.’ ”