5 “ ‘Inenimọnọ usini me lek ukwuuk uti lek ijọn̄ ya isa isi iwop me lek ata ijọn̄ uko. Ìwop me ere mun̄ owabe, mbet lek ere uti wilo okitibi. 6 Uti ya onenibum otu isibi, mè ikana olik gerep òkup mkpumkpu, mè isan iwele. Agọọk kan̄ ìyaka ijeen̄ igo ya, ire, ugwun̄-ijọn̄ kan̄ okup me irak kan̄. Inenikana olik gerep eyi agọọk mè inwan̄ ochitbe lek gbak.

7 “ ‘Ire, ofifi ikpele igo ge òwa si, eyi òkaan̄ uwop ònyenye, mè ikaan̄ akukọ òkup nyen̄e nyen̄e ijot lek. Olik gerep ya onenikup me akpat ere ewopbe itibi ugwun̄-ijọn̄ kan̄ ikana ijeen̄ igo keyi, mè isan agọọk kan̄ ifo lek, inyi môkinyi ọmọ mun̄. 8 Ewop olik gerep ya me ata ijọn̄ ere mun̄ owabe, inyi itibi agọọk, mè ito mfut, mè ikana atalek olik gerep òjajaan̄.’

9 “Tumu nyi ema ibe, ‘Ogwukaan̄-ene Okumugwem ìtumu ibe ikeyi: Ìre olik gerep ya môfuk ugwem ni? Ìre adasi igo ya ìkpojibi ọmọ melek ugwun̄-ijọn̄, mè igen̄ mfut kan̄ igwook, inyi ọmọ ichiaak, mè inwan̄ kan̄ òkisesek ayaya cha ichiaak si? Ijijibi ọmọ me lek ugwun̄-ijọn̄ kan̄ isan̄a ìkabodo uga unye, mè ìre ubọk owuwa ene. 10 Kpọ-nu, ire irọkọ isi iwop me ofifi ere, ìre môfuk ugwem ni? Ìre ìkare ìbochachiaak ita kpai mgbọ efet agan̄ mbum-ura isiniwut itoon̄ me lek ni? Akpat ere yaage îtibibe isibi ke ìbokup ichiaak ita.’ ”

11 Okumugwem onenitumu si inyi emi ibe: 12 “Tumu nyi ebi uwu unye-ibot yi ibe, ‘Ìre enyi kperiọọn̄ ibot urọk yi ni?’ Tumu nyi ema ibe, ‘Ogwu ubọọn̄ Babilọn îsi Jeruselem, mè itet ogwu ubọọn̄ kiban̄ mè ebi ibot mkpulu kiban̄ isa igwu ikom ifo Babilọn. 13 Inenimọnọ ene ge me lek ebi owot uwu ubọọn̄, mè igọọk ogwugwa igbaan̄ inyan̄a ibot, mè itet ogwugwa ibe ichieek use ibe ke môkisiki ibot inyi ọmọ. Îkpulu si ebi isi me ido ya isa ifo, 14 inyi ido ya irọn̄, mè ikayaka ìkọt ìbene isi ofifi, mè ebi ido ya ekeluk ugwem sa me isusun̄ inyan̄a-ibot kan̄. 15 Ire, ogwugwa onyenye ibot, mè isan̄a ebi otuchieen̄ iria isi Ijipiti ibe esi ebọkọ owuwa inyinya mè ikpele urum akọn̄ esa enu. Ìre môfet inyi ọmọ ni? Ìre ogwu òrọ mbet lek inu kecha mônwọnọ ni? Ìre môchichaka inyan̄a-ibot ya isan̄a, mè inwọnọ ni?

16 “ ‘Kè lek ugwem n̄a, ọmọ môkup me Babilọn ikwu, me ido ogwu òto ọmọ me ogboon̄, ogwu ọmọ ojitbe irọrọ use ọmọ ochieekbe, mè ichichaka inyan̄a-ibot ema enyan̄abe. Emi Ogwukaan̄-ene Okumugwem ntumu. 17 Ogwu Fero, melek ikpele urum akọn̄ kan̄ mè uwa ene kan̄, ìkpokọt itap ubọk inyi ọmọ me lek akọn̄ ya, mgbọ ebi Babilọn isinama urak ukot, mè ikpa mbin akọn̄ ikana ama kiban̄, isasa ikpan̄ owuwa ene. 18 Ọmọ îjit irọrọ use ya îchieekbe bak me lek îchakabe inyan̄a-ibot ema enyan̄abe ya, mè itap ubọk me ikpa; mè irọ otutuuk inu chi îrọbe. Eya orọ, ìkponwọnọ.

19 “ ‘Mije keya, Ogwukaan̄-ene Okumugwem ìtumu ibe ikeyi: Kè lek ugwem n̄a, mâsa inyan̄a-ibot n̄a îchakabe mè use n̄a îjitbe irọrọ iso inichit ọmọ me ibot. 20 Mâtọp njin n̄a ichit ọmọ, ọmọ môrọrọn̄ ufe n̄a. Mâsa ọmọ inu me Babilọn, mè ifieek oyerebet itip ọmọ me ere ya, mije ọmọ ojitbe emi itele. 21 Otutuuk ebi kan̄ ebi ìlilibi ekot akọn̄ mêkwaan̄ ita me otu oge akọn̄. Mêchon ebi geelek ìsisik itaak inyi agan̄ geelek me linyọn̄. Owu môneniriọọn̄ ibe ke îre emi Okumugwem ntumu.

22 “ ‘Ogwukaan̄-ene Okumugwem ìtumu ibe ikeyi: Emi me lek n̄a mâmọnọ agọọk ge òbebene ichit me inyọn̄ ibot uti olik, mè iwop. Mâfan̄a nsek otu agọọk me lek agọọk echi inyọn̄ inyọn̄ ibot kan̄, mè iwop me inyọn̄ ikpele ubene ubene ogoon̄. 23 Mâwop ọmọ me inyọn̄ ogoon̄ Ijeren echi òbebene. Mônenitibi agọọk, mè ito mfut, mè ikana uti olik ile òjajaan̄. Kpachieen̄ unọn geelek mônenikiniluk me irak kan̄. Kpa chieen̄ inu geelek òkaan̄ uwop mônenikinilet lek me irak ogugo otu agọọk kan̄. 24 Otutuuk uti geelek me oron môneniriọọn̄ ibe ke îre emi, Okumugwem, nkirọ uti òjọjọn̄ọ ikana mkpukpuk, mè ikirọ uti mkpukpuk ikana eyi òjọjọn̄ọ. Emi si nkirọ njijoon̄ uti ichiaak, mè ikirọ nchiaak uti isek.

“ ‘Emi Okumugwem ntumu, m̀barọrọ si ikeya.’ ”