Ijikien îkọt okwa ito me ibot ebi isi ene me Ijeren
“ ‘Nga kwun̄ ìre keke?
Îre uman egbe àtat òkup me etete ebi kè egbe àtat.
Ìlaak me etete ebi kè orie egbe àtat,
mè ikpukpo bọn kan̄ isibi.
3 Îkaan̄ gwun̄ kan̄ ge îkpukpobe isibi,
inenimin ikana ogbaragbat
orie egbe àtat ònyenye lek,
mè ikween̄ ubọk ekichim anam,
mè ikitaka ene.
4 Ebi ofifi ido eneninọ inu ofolek kan̄,
mè itap ufe udọn̄ inyi, irọrọn̄ inin̄ emen udọn̄ kiban̄.
Ema esasa ukọọk igọbọ ọmọ,
mè itaba isa ifo ido Ijipiti.
5 “ ‘Ogwu uga îkpọ igak,
ikpọchieen̄ kan̄ otata,
imọmọnọ ofifi gwun̄ ge me etete ebi bọn,
mè irọ inyi ikana ogbaragbat
orie egbe àtat ònyenye lek.
6 Inenikigọọk ebi kè orie egbe àtat ikibọm urie,
mije, îkana ogbaragbat orie egbe àtat.
Îkween̄ ubọk ekichim anam,
mè ikitaka ene.
7 Inenigbugbọ mgban akọn̄a ebi ofifi ido igwook,
mè ijijaka ama ile kiban̄ geelek isan̄a kpai.
Lek ijọn̄ ya mè ebi ìluk me emen
ekekikup me ukpook mgbọ ọmọ isikigbin.
8 Ebi ido ìluluk ikana ọmọ okokop
ejijibi inin̄ ọmọ lek,
mè itap ufe inyi,
irọrọn̄ inin̄ emen udọn̄ kiban̄.
9 Ema esasa ukọọk itaba ọmọ itap me okpokop anam,
mè isa ọmọ ijet ogwu ubọọn̄ Babilọn.
Ebiba etatap ọmọ me uwu mkpọn ònyenye,
inyi ekayaka ìkinọ ọmọ okigbin ofifi
me inyọn̄ ogoon̄ geelek me Ijeren.
10 “ ‘Nga kwun̄b ìbet lek olik gerep
ewopbe me agba mun̄,
eyi òtoto mfut, mè itibi agọọk ijot lek,
mije mun̄ owabe me ere îkupbe.
11 Agọọk kan̄ ìnyenye gboi,
mè iso isasa irọ okuba ubọọn̄.
Olik gerep ya otitibi ibene iraka ibot
otutuuk uti geelek
ògwogwook inwan̄ ijot lek;
ekekikup me ujọn̄ọ ere imun̄,
mije îjọn̄ọbe ichep me inyọn̄,
melek ubọk agọọk kan̄ owabe ijot lek.
12 Ire, esasa me unaan̄-ejit ijibi ọmọ,
mè iben itọbọ imaan̄ me ijọn̄.
Efet agan̄ mbum-ura oneniwut ọmọ ichiaak,
mfut kan̄ ogegen̄ igwook;
agọọk kan̄ cha ònyenye okwakwaan̄ ita,
ukan̄ otataka ema iriọk.
13 Mgbọ keyi, ewop ọmọ me emen èwê,
me nchiaak ijọn̄ ere kpunube mun̄ geege.
14 Ukan̄ oneninan̄a me lek agọọk
ge me etete ikpele agọọk kan̄,
mè itaka mfut kan̄ iriọk.
Agọọk ònyenye geege ìkayaka ìsik me lek,
eyi òsoso isasa irọ okuba ubọọn̄.’
Eyiyi ìre okwa ito, ebekikọt si kubọk okwa ito.”