2 Okumugwem onenitumu inyi emi ibe: 3 “Gwun̄ ebilene, tumu ikọ nyi ebi ugane Ijeren cha, mè be ema ikeyi, ‘Ogwukaan̄-ene Okumugwem ìtumu ibe ikeyi: Ìre enyi enu ibeninọ emi ikọ me otu? Kè lek ugwem n̄a, emi m̀kpachieek ibe enyi enọ ikọ me otu n̄a. Emi Ogwukaan̄-ene Okumugwem ntumu.’

4 “Ìre owu môsibi oyerebet inyi ema? Gwun̄ ebilene, ìre owu môsibi oyerebet inyi ema ni? Ngwa ma, sa filafila inu ebi nte kiban̄ erọbe kweek ema me isi. 5 Tumu nyi ema ibe: ‘Ogwukaan̄-ene Okumugwem ìtumu ibe ikeyi: Me usen ya ngobobe Ijeren, m̀bebene ubọk n̄a inyan̄a ibot inyi ebi owot iman uwu kè Jekọp, mè ikpọk mbum ogwu emi nrebe inyi ema me Ijipiti. M̀bebene ubọk inyan̄a ibot, mè itumu inyi ema ibe, “Emi nre Okumugwem Awaji kinyi.” 6 Usen ya, m̀bebene ubọk n̄a inyan̄a ibot inyi ema, ibe ke mâsan̄a ema isibi me ijọn̄ Ijipiti isi itap me ijọn̄ mweekbe isibi inyi ema, atalek ijọn̄ òkisibi anam mè mfut uti, ijọn̄ òjajaan̄ ichit me etete otutuuk ijọn̄ geelek. 7 Ntumu inyi ema ibe, “Ogwu ikup, ifiin̄ òchichaka inu ya îkikpọ chieen̄ me isi, mè enyi ekayaka ìsa mkpọmfaka ebi Ijipiti ìfifila ugwem kinyi. Emi nre Okumugwem Awaji kinyi.”

8 “ ‘Ire, ema ekpakpaka ibot inyi emi, mè ijit igbagban̄ utọn̄ inyi emi. Ema kpefiin̄ òchichaka inu cha ema ekikpọ chieen̄ me isi, kpetetele si mkpọmfaka ebi Ijipiti cha. Nnenibe ke mâgbuku uyok uyok unaan̄-ejit n̄a igwook ema me lek, inyi ǹsan̄a otutuuk unaan̄-ejit n̄a ǹtoon̄ me lek kiban̄ me Ijipiti. 9 Ire, mije erieen̄ n̄a, ntetet ubọk ikaan̄, inyi erieen̄ n̄a ikafiat me isi ebi ofifi ido cha ema ekigọọk iluk, ebi emi nkupbe me isi kiban̄ ikpọk mbum lek n̄a inyi ebi Ijeren sa me lek nsan̄abe ema isibi me Ijipiti. 10 Eya orọ nsan̄abe ema isibi me Ijipiti, mè isa ema inu me emen èwê. 11 Nneninyi ema orọmijọn̄ n̄a, mè irọ ema eriọọn̄ ikan n̄a, inyi, ene geelek òsusun̄ ikan cha môsa me ikeya iluk ugwem. 12 Ofifi si, nnyi ema Usen Mbuban n̄a, inyi ire òriọọn̄ òkup inyi emi melek kiban̄, mè ema eriọọn̄ ibe ke îre emi, Okumugwem, nsun̄ ema me mbuban.

13 “ ‘Ire, ebi uwu kè Ijeren ekpakpaka ibot inyi emi me emen èwê. Ema mîtele igọgọọk orọmijọn̄ n̄a, mè ijit ikan n̄a, echi ogwu geelek òsusun̄ môsabe me lek iluk ugwem. Ikeya ke ema echichaka si Usen Mbuban n̄a enenen. Eya orọ, mbe ke mâgbuku uyok uyok unaan̄-ejit n̄a igwook ema me lek, mè ijijaka ema isan̄a me emen èwê. 14 Ire, mije erieen̄ n̄a, ntetet ubọk ikaan̄, inyi erieen̄ n̄a ikafiat me isi ebi ofifi ido cha, ebi nkupbe me isi kiban̄ isan̄a ebi Ijeren isibi me Ijipiti. 15 Ikeya si, mbebene ubọk n̄a inyan̄a ibot inyi ema me emen èwê ya, ibe kè m̀kpasa ema initap me ijọn̄ ya nnyibe ema, òrere atalek ijọn̄ òkisibi anam mè mfut uti, ijọn̄ òjajaan̄ ichit me otutuuk ijọn̄ geelek, 16 mije, ema mîjit ikan n̄a, mè itele igọgọọk orọmijọn̄ n̄a, mè ikichaka Usen Mbuban n̄a geelek. Mije, ejit kiban̄ ìbia me lek mkpọmfaka kiban̄. 17 Ire, nnenisa chieen̄ nsan ikpọ ema, ǹkayaka ìjijaka ema ìsan̄a me emen èwê. 18 Nnenitumu inyi bọn kiban̄ me emen èwê ya ibe, “Ikagọọk orọmijọn̄ ebi nte kinyi, ikasun̄ ikan kiban̄ cha, ikasa mkpọmfaka kiban̄ ìfifila lek kinyi. 19 Emi nre Okumugwem Awaji kinyi. Ìgọọk orọmijọn̄ n̄a, mè ìgbala chieen̄ ìsun̄ ikan n̄a. 20 Ìsun̄ Usen Mbuban n̄a geelek me mbuban, inyi môre òriọọn̄ inyi emi melek kinyi, mè enyi esa eriọọn̄ ibe ke emi nre Okumugwem Awaji kinyi.”

21 “ ‘Ire, nsabọn kiban̄ ekpakpaka si ibot inyi emi. Ema kpegọọk orọmijọn̄ n̄a, kpegbala chieen̄ isun̄ ikan n̄a, echi ogwu geelek òsusun̄ môsabe me lek iluk ugwem. Ema mîchichaka si Usen Mbuban n̄a geelek. Nnenibe ke mâgbuku uyok uyok unaan̄-ejit n̄a igwook ema lek, mè igwook si otutuuk unaan̄-ejit n̄a itoon̄ me lek kiban̄ me emen èwê. 22 Ire, mije erieen̄ n̄a, ntetet ubọk ikaan̄, inyi erieen̄ n̄a ikafiat me isi ebi ofifi ido cha ebi nkupbe me isi kiban̄ isan̄a ebi Ijeren isibi me Ijipiti. 23 Ikeya si, mbene ubọk n̄a inyan̄a ibot inyi ema me emen èwê ya ibe ke mâyiyala ema itap me etete ofifi ido, mè ichon ema ikana ama geelek, 24 mije, ema etelebe isusun̄ ikan n̄a, mè ijit orọmijọn̄ n̄a, mè ikichaka Usen Mbuban n̄a geelek; chieen̄ kiban̄ si, ìgwuun̄ me lek mkpọmfaka ebi nte kiban̄. 25 Emi si nneninyi ema orọmijọn̄ echi ikanwọnge, mè ikan echi ema kpebekọt isa iluk ugwem, 26 mè itele ibe ema efifila lek kiban̄ bak me lek ngwugwa ema ekigwa, eyi ema ekisa otutuuk adasi bọn ebirieen̄ kiban̄ inyi ibe ewọp me ukan̄ enyi mkpọmfaka. Ǹrọ ikeya, inyi ema ejijit, mè esa me ikeya eriọọn̄ ibe ke emi nre Okumugwem.’

27 “Eya orọ, gwun̄ ebilene, tumu ikọ nyi ebi uwu kè Ijeren, mè be ema, ‘Ogwukaan̄-ene Okumugwem ìtumu ibe ikeyi: Ikeyi si ke ebi nte kinyi etumu emi ifiat sa me lek ema ejitbe emi itele. 28 Mgbọ nsabe ema initap me lek ijọn̄ ya eyi mbenebe ubọk inyan̄a ibot ibe ke mâsa inyi ema, ema enenimun̄ otutuuk ubene ubene oriọọn̄ cha mè otutuuk uti inwan̄ ojotbe lek cha, mè ikisi igwa ngwugwa kiban̄ me ere cha, mè ikinyi inyinyi kiban̄ òkiribi emi unaan̄-ejit, mè ikiwọp nsensi utop olu, mè ikigwook miin̄ ngwugwa kiban̄ me ere cha. 29 Nnenibe ema: Isi-ijọn̄ cha enyi ekisi, ìsibi keke ni?’ ” Ekigwen ere ya Isi-ijọn̄ mege inire chereyi.

30 Eya orọ, tumu nyi ebi uwu kè Ijeren ibe, “Ogwukaan̄-ene Okumugwem ìtumu ibe ikeyi: Ìre enyi mêfifila lek kinyi kubọk ebi nte kinyi erọbe, mè ibubat si igọọk òchichaka inu kiban̄ cha ni? 31 Mije, enyi isikinyi inyinyi kinyi cha, mè ikisa bọn ebirieen̄ kinyi inyi ibe ewọp me ukan̄, enyi ekisa mkpọmfaka kinyi ififila lek kinyi mege inire chereyi. Ebi uwu kè Ijeren, ìre îgbe ibe enyi enenọ emi ikọ me otu ni? Kè lek ugwem n̄a, emi m̀kpachieek enyi enọ emi ikọ me otu. Emi Ogwukaan̄-ene Okumugwem ntumu.

32 “ ‘Enyi ekibe, “Eji ekiweek irariaak uti melek ewuuk kubọk ebi ofifi ido ekirọ, kubọk ebi ototun̄ ukan̄ ebi ofifi agan̄ me linyọn̄ ekiriaak.” Inu enyi ebenbe me ejit ya ìkpore enyi ubọk. 33 Kè lek ugwem n̄a, m̀basa me unye ubọk melek ikpele unye mè uyok uyok unaan̄-ejit ògbugbuku igwook ikikpulu enyi. Emi Ogwukaan̄-ene Okumugwem ntumu. 34 Mâsa me unye ubọk melek ikpele unye mè uyok uyok unaan̄-ejit ògbugbuku igwook isa enyi me ofifi ido cha ika, mè ititen̄e enyi me agan̄ geelek eyiyalabe enyi itap, isa ika. 35 Mâsa enyi initap me emen èwê ere ebi ido geelek elukbe. Ere keya ke mbasibi enyi oyerebet me ibot isi mè isi. 36 Ubọk nsibibe oyerebet me ibot ebi nte kinyi me emen èwê Ijipiti, ikeya ke mbasibi inyi enyi si. Emi Ogwukaan̄-ene Okumugwem ntumu. 37 Mâsa mkpat ifuk enyi kubọk ekifuk arọọn̄, mè irọ inyi inyan̄a-ibot n̄a igugọbọ enyi. 38 Mâkwọọk ebi ìkikpaka ibot inyi emi melek ebi ìkije emi ilọ cha isan̄a me etete kinyi. Mâsan̄a ema isibi me ido ema egọọkbe iluk, ire, ukot kiban̄ ìkpojak me inyọn̄ ijọn̄ Ijeren. Enyi mêneniriọọn̄ ibe ke emi nre Okumugwem.

39 “ ‘Ire enyi, ebi uwu kè Ijeren, Ogwukaan̄-ene Okumugwem ìkitumu inyi enyi ibe ikeyi: Ire enyi kpebegban̄ ikọ n̄a, ogwu ikup, ije isi iriaak mkpọmfaka kan̄! Ire, me òta kan̄, enyi kpebeyaka isa inyinyi kinyi mè mkpọmfaka kinyi cha ikpọk ifiat erieen̄ mbuban n̄a ofifi. 40 Mije, îre me inyọn̄ ogoon̄ mbuban n̄a ya, ubene ogoon̄ Ijeren ya, ke otutuuk ebi uwu kè Ijeren ebekiriaak emi me ere ya me lek ijọn̄ ya. Emi Ogwukaan̄-ene Okumugwem ntumu. Me ere ya ke mbabọkọ ema itap, ere ya si ke mbado ema inyinyi kiban̄, mè ido ngwugwa adasi mfut uko kiban̄ melek ngwugwa mbuban kiban̄ geelek. 41 Mgbọ nsisa enyi me ofifi ido cha ika, mè ititen̄e enyi me agan̄ geelek eyiyalabe enyi itap cha, isa ika, mânenibọkọ enyi itap kubọk nsensi òkidun̄u utop olu, mè inikup me mbuban me eden̄ kinyi me chieen̄ ebi ofifi ido. 42 Mgbọ nsisa enyi ika inu me lek ijọn̄ Ijeren, me ido ya eyi mbenebe ubọk inyan̄a ibot ibe ke mâsa inyi ebi nte nte kinyi, enyi mêneniriọọn̄ ibe ke emi nre Okumugwem. 43 Me ere ya, enyi mênenikeek eru enyi ekaan̄be mè otutuuk inu enyi erọbe isa ififila lek kinyi. Ejit kinyi gaalek môfefieek enyi ikọ, mije otutuuk ijo inu cha enyi erọbe. 44 Enyi ebi uwu kè Ijeren, mgbọ nsirọ inu me lek kinyi ikpọ me lek erieen̄ n̄a, ìkare me lek ijo irọrọ kinyi, ìkarere si me lek bukubuku inu enyi erọbe, mgbọ ya enyi mêriọọn̄ ibe ke emi nre Okumugwem. Emi Ogwukaan̄-ene Okumugwem ntumu.’ ”

45 Okumugwem onenitumu inyi emi ibe: 46 “Gwun̄ ebilene, kana isi kwun̄ da agan̄ osiki; tumu ikọ keme agan̄ osiki, mè ben nriran keme oron agan̄ osiki. 47 Tumu nyi oron agan̄ osiki ya ibe: ‘Nọ ikọ Okumugwem. Ogwukaan̄-ene Okumugwem ìtumu ibe ikeyi: Kpọ, mânichim ukan̄ itap me lek kwun̄. Ukan̄ ya môtaka otutuuk uti kwun̄, echi njijoon̄ mè echi òchachiaak, iriọk. Kpebeniin̄ alọm ukan̄ ya òkisasak, ìbotataka ere geelek iriọk, ibene me agan̄ osiki isi ire agan̄ inyọn̄. 48 Otutuuk ebilene mêmun̄ ibe ke îre emi Okumugwem nsọk ukan̄ ya, ke kpebekọt iniin̄.’ ”

49 Emi nnenibe, “Jei, Ogwukaan̄-ene Okumugwem! Ekitumu ikọ òfo me lek n̄a ibe: ‘Ìre ìkare urọk urọk ke îkito inyi eji ni?’ ”