Ijo inu ebi Jeruselem erọbe
22
Okumugwem onenitumu inyi emi ibe: 2 “Gwun̄ ebilene, ìre owu môsibi oyerebet me ibot ama yi? Ìre owu môsibi oyerebet me ibot ama keyi òkifiat eje ene? Ire ikeya, sa otutuuk filafila inu kan̄ îrọbe kweek ọmọ me isi, 3 mè tumu be: ‘Ogwukaan̄-ene Okumugwem ìtumu ibe ikeyi: Jei ama òkifiin̄ eje ene igwook me emen kan̄, mè isa me ikeya itaba mgbọ osusut kan̄ igbet; ama òkirom mkpọmfaka me emen kan̄, mè isa me ikeya ififila lek kan̄; 4 oyerebet eje ene ofiin̄be îtet owu. Mkpọmfaka cha orọbe îfifila owu. Owu otaba usen oyerebet kwun̄ igbet, acha ufialek kwun̄ îre. Eya orọ, mârọ owu inu esip me isi ebi ido geelek, mè irọ owu òkana inu ochak me isi ebi ife geelek. 5 Owu ama òkitaan̄ ijo etip, mè ama wọlọwọlọ ojotbe emen, ido ebi ìkukup igbet owu lek mè ebi ìjọjọn̄ọ owu ere me lek ebekichachak owu me imọm.6 “ ‘Kpọ-nu, ebi ibot ebi Ijeren ìkup me emen kwun̄, ogwu ikup, ìkisa unye kan̄ ifiat eje ene. 7 Me emen kwun̄, kpesa ute mè uga igwen inu geege. Me emen kwun̄ ekitutuku ebi ichen, mè ikirọ nnaan̄ me lek ebi kpà-nte mè ebi nwakpa. 8 Enyi mîkpọ inu n̄a òkup me mbuban isiki chieen̄, mè ichichaka Usen Mbuban n̄a geelek. 9 Ebi ìkitumu ene ifiat, inyi ekpan̄, ejojot me emen kwun̄; ebi ìkirie inorie me isi-ijọn̄ me inyọn̄ ogoon̄ òwa si emen kwun̄; ekikup me emen kwun̄ ikirọ barabat ikana. 10 Ebi ene ekilaak nwa nte kiban̄ me emen kwun̄; me emen kwun̄ si, ebi ene ekilaak ebibaan̄ ìkup me irek ebibaan̄, mgbọ mbuban okupbe ebibaan̄ cha me lek. 11 Ebirieen̄ ekirọ òchichaka inu melek nwa ebi melek kiban̄ me emen kwun̄, usini ene ekita esip me isi ikilaak nwa ebi bọn, sa usini ene si ekilaak ebi ngwan̄ ebibaan̄, ìrere bọn nte kiban̄ gaalek. 12 Ebi ene mîkibọkọ ikpoko udun̄ me emen kwun̄, inyi ekpan̄ ene. Enyi ekinyam ikpoko ibọkọ uga urot, mè ikirie ebi melek kinyi ngan, mè iwuuk emi. Emi Ogwukaan̄-ene Okumugwem ntumu.
13 “ ‘Eya orọ, kpọ, mâgbaan̄ ubọk n̄a ikwak me lek oruru enyi ekaan̄be me ngan cha, mè eje ene cha enyi efiin̄be me etete kinyi. 14 Ìre ejit kwun̄ môkọt ikeke ida, sà ìre ubọk kwun̄ mônye ni, me usen mârọbe owu inu? Emi Okumugwem ntumu, m̀barọrọ si ikeya. 15 Mâtọọn̄ owu igwook me etete ebi ofifi ido, mè iyiyala owu itap me etete ife geelek. Mâgwọk owu orieen̄ isan̄a me lek. 16 Owu osififila lek kwun̄ me chieen̄ ebi ofifi ido, owu môneniriọọn̄ ibe ke emi nre Okumugwem.’ ”
17 Okumugwem onenitumu inyi emi ibe: 18 “Gwun̄ ebilene, ebi uwu kè Ijeren mîkana ifin okwukwut me lek n̄a; otutuuk kiban̄ mîkana ekwe mè alala mè okwukwut mè oporolo etelebe me emen unye ukan̄. Ema mîkana ifin alata okuket. 19 Eya orọ, Ogwukaan̄-ene Okumugwem ìtumu ibe ikeyi: ‘Mije enyi otutuuk ene ekanabe ifin, ìkikpọ, mânikwọọk enyi isa inigwook me eden̄ Jeruselem. 20 Ike ekikpulu alata okuket mè ekwe mè okwukwut mè oporolo mè alala itap me emen unye ukan̄, mè ikifuuk ukan̄ iren̄e me lek, inyi ikala, ikeya ke mbasa me unaan̄-ejit n̄a mè uyok uyok unaan̄-ejit n̄a ikwọọk enyi itap me emen ama Jeruselem, mè ikala enyi. 21 Mâkwọọk enyi ititiin̄ me emen ama ya, mè ifuuk uyok uyok unaan̄-ejit n̄a igwook enyi me lek, enyi mêkukup me ere ya ikala. 22 Ike ekikala alata okuket me emen unye ukan̄, ikeya ke ebekala enyi me emen ama ya. Enyi mêneniriọọn̄ ibe ke emi Okumugwem mgbuku unaan̄-ejit n̄a igwook enyi me lek.’ ”
23 Okumugwem onenitumu si inyi emi ibe: 24 “Gwun̄ ebilene, tumu nyi ido Ijeren ibe, ‘Me usen uyok uyok unaan̄-ejit n̄a, owu òbokup kubọk ijọn̄ ekagwọkge ìtana, eyi ibot ikarepge ìgwook.’ 25 Ebi nrirana ìkup me emen kan̄ mîtaka otọt itele. Ema ebet lek egbe àtat okigbin mgbọ îkigwak anam îtetbe itaka. Ema mîkpan̄ ene, mè ibọkọ inu ubọọn̄ mè inu unye otu ewe, mè irọ owuwa ebibaan̄ me emen kan̄ ekana nwakpa. 26 Ebi ngwugwa kan̄ mîrọ inu ikpak me lek ikan n̄a, mè ichichaka inu n̄a geelek òkup me mbuban. Me lek kiban̄, kpunu esese geege me etete inu òkup mbuban mè inu ikakupge mbuban, mè etete inu òtatana mè inu ikatanage. Ema mîdaan̄ chieen̄ isan̄a me lek Usen Mbuban n̄a geelek, mè isa me ikeya ichaka emi mbuban me lek me etete kiban̄. 27 Ebi ibot me etete kiban̄ ebet lek ibo oron òkichim anam igwak. Ema ekifiin̄ eje ene, mè ikikpan̄ ene isa ibọọn̄ ubọọn̄. 28 Ebi nriran kan̄ ekisa ofiaan̄ ofiaan̄ ilaak ọkpọchieen̄ mè ataak ataak ido-inu ikichit ijo inu chi, mè ikibe, ‘Ogwukaan̄-ene Okumugwem ìtumu ibe ikeyi,’ me mgbọ Okumugwem ìkatumu ikọ geege. 29 Ebi ìluk me lek ijọn̄ yi ekibọkọ ene inu me ugana-chieen̄, mè ikichiin̄ inọ afa. Ema ekitutuku ebi ugbọọn̄ mè ebi una, mè ikifeen̄ ebi ichen, kpekisibi unen oyerebet inyi.
30 “Mweek ene ge me etete kiban̄, ogwu mônamabe mgban ama ya, mè ibak me lek ijọn̄ ya inikeke me isi n̄a, me ere òlaak obook me lek mgban ya, inyi nkajijaka lek ijọn̄ ya. Ire, ǹkamun̄ kubọk ene ge. 31 Ikeya ke mgbuku uyok uyok unaan̄-ejit n̄a igwook ema me lek, mè isa uyok uyok unaan̄-ejit n̄a ijijaka ema ya isan̄a, mè isa me ikeya ikana otutuuk ijo inu ema erọbe ichit ema me ibot. Emi Ogwukaan̄-ene Okumugwem ntumu.”