5 “Owola me ubọk n̄a, òkije oyet kan̄ si. Ijo ebek kan̄ osasa ọmọ isi lek ebi ugan kan̄ òrere ebi Asiria, ebi ido òkukup iriaak ema. 6 Ife cha ìre ebi akọn̄ ìkitaak ofọnti oluku oluku, mè ebi ibot mkpulu, mè ebi ibot akọn̄. Otutuuk kiban̄ ìre ujuja nsabọn irieen̄ ìkilọk ene ebek, ebi ìkikọp me inyọn̄ inyinya. 7 Ikekije oyet melek ife chi, otutuuk kiban̄ ebi ìsisibi isi me Asiria, mè ififila lek kan̄ me lek otutuuk mkpọmfaka ebi geelek òje oyet kan̄ osabe ọmọ isi lek. 8 Òje oyet ya îbenebe me Ijipiti, ìkatele. Mije, bene me mgbọ îrebe ijija ke ebirieen̄ ekilaak ọmọ, mè ikiyak otu ebe kan̄ me mgbọ ọmọ ikariọọn̄ge ebirieen̄, mè isa ulọk òje oyet kiban̄ ikana ichit ọmọ.

9 “Eya orọ, nkakana ọmọ itap me ubọk ebi ugan kan̄, ebi Asiria cha, ebi ìkilọk ọmọ cha. 10 Ebiba ebeben njak kan̄ iwele, mè ibọkọ bọn ebirieen̄ kan̄ mè bọn ebibaan̄ kan̄ isan̄a ọmọ ubọk, mè isa oge akọn̄ ikpan̄ ọmọ. Ọmọ onenikana ogwu ebibaan̄ ekisa irọk urọk, mije osusut enyibe ọmọ.

11 “Owoliba, ogwu ngwan̄ kan̄ enenwaan̄, îmun̄ eyiyi isan̄a, ire, mè ikaan̄ ulọk ebirieen̄ igak ogwu ngwan̄, mè ije oyet si isaba iraka eyi ogwu ngwan̄. 12 Ibeben si ulọk ebirieen̄ kan̄ ifo lek ebi Asiria, ido òkukup iriaak ema. Ife cha ìre ebi ibot akọn̄ mè ebi ibot mkpulu, ebi ìkiken nken òjajaan̄, mè ikikọp me inyọn̄ inyinya. Otutuuk kiban̄ ìre ujuja nsabọn irieen̄ ìkilọk ene ebek. 13 Nnenimun̄ ibe ke ọmọ si îfifila lek kan̄, ke ema ene iba eje me oniin̄ yaage.

14 “Owoliba okpọkpọ ifo isi ikije oyet. Inenimun̄ ogugo ebirieen̄ egwookbe me lek mgban, ogugo ebi Kalidia esabe agba araran̄ igwook, 15 melek fanti me ebon kiban̄ okanabe, mè akisi me ibot kiban̄ odekebe igwook. Otutuuk kiban̄ ebet lek ebi ibot akọn̄, mè ikup kubọk bọn owot Babilọn ìkup me ido Kalidia. 16 Mgbọ yaage îmun̄be ife chi egwookbe, ibebene ikaan̄ ulọk me lek kiban̄, mè iria osat isi lek kiban̄ me Kalidia. 17 Ebi Babilọn cha enunu lek kan̄, me inyọn̄ mkpilaak òje oyet kan̄, mè isa me ulọk barabat kiban̄ ififila ọmọ. Mgbọ ife cha efifilabe ọmọ isan̄a, ife cha eyayaka inijọ ọmọ ejit, idada lek isan̄a me lek kiban̄. 18 Mgbọ îjebe oyet ikpọk mbum, mè iben njak kan̄ iwele ikana, ndada lek n̄a isan̄a me lek kan̄, kubọk ndabe isan̄a me lek ogwu ngwan̄. 19 Ire, ọmọ okpọkpọ ikije oyet isaba iraka iman̄, mè ikikeek mgbọ ijija kan̄, mgbọ ọmọ okije oyet me Ijipiti, 20 mè iben ijo ulọk kan̄ ifo lek ebi ugan kan̄ me ere keya, ebi lek okibene kubọk lek inyinya akpan, ebi uyọ kiban̄ okiwa kubọk uyọ orie inyinya. 21 Owu gwa òkikeek si barabat orọbe me ijija kwun̄ me Ijipiti, mgbọ ekiyak owu otu ebe, mè ikinwan owu ebe nsabọn ibaan̄ kwun̄ me ejit.

22 “Eya orọ, Owoliba, Ogwukaan̄-ene Okumugwem ìtumu ibe ikeyi: Kpọ, ebi ugan kwun̄ cha, ebi ìjọjọ owu ejit, ebi odabe isi isan̄a me lek cha, mânisi itimi ibe enan̄a me agan̄ geelek enerọ ekeme owu. 23 Ema ìre ebi Babilọn, mè otutuuk ebi Kalidia, mè ebi ìnan̄a me Pekodu, mè Sowa, mè Kowa, mè otutuuk ebi Asiria melek kiban̄; otutuuk kiban̄ ìre uja ebirieen̄ ìkilọk ene ebek, ebi mkpulu, mè ebi ibot, mè ebi ibot uji akọn̄, mè ebirieen̄ ìsisibi isi; otutuuk kiban̄ ekilibi me inyọn̄ inyinya. 24 Ema mêsa nroon̄ akọn̄ inu akọn̄ me lek kwun̄. Mêsa uji akọn̄ mè uji ekpirikpo melek urum ebi ene inu owu lek. Mêkaan̄ agbọ ile mè agbọ ija melek okpibot akọn̄, mè inan̄a inu inirieen̄ akọn̄ ikana owu okokop. Mâneniyaka owu inyi ema ibe esibi owu oyerebet me ibot, ema mênenisibi oyerebet ya igọọk me lek orọmijọn̄ kiban̄. 25 Mâsa me mba-ejit n̄a irọ ikeme owu, ema mêsasa me uga unaan̄-ejit irọ owu inu. Ema mêfieek owu inwọm, mè ikọọk owu utọn̄. Ebi kwun̄ geelek ìsisik mênin̄ me otu oge akọn̄. Ema mêkpulu bọn ebirieen̄ kwun̄ mè bọn ebibaan̄ kwun̄ isa ije, ebi kwun̄ geelek ìsisik mêtataka ita me ukan̄. 26 Ema mêwọọk owu ofọnti isan̄a me lek, mè ikpulu uja inu nken kwun̄. 27 Sa me ikeyi, mâtatap okputut inyi barabat kwun̄ mè òje oyet kwun cha obenebe me Ijipiti, inyi okayaka ìbene chieen̄ kwun̄ ìkikpọ inu cha. Owu òkpoyaka ikpọk ikikeek Ijipiti ofifi.

28 “Mije, Ogwukaan̄-ene Okumugwem ìtumu ibe ikeyi: Emi mâniyaka owu itap me ubọk ebi ochabe cha, ebi owu ojọbe ejit me lek. 29 Ema mêsasa ejit ochicha irọ owu inu, mè ibọkọ otutuuk inu okwukwulube ikaan̄. Mêsun̄ owu njak, mè itele owu ukpọk ubọk, esip òje oyet kwun̄ ya mônenikpọk mbum. Barabat kwun̄ mè òje oyet kwun̄ 30 osa echichi ijet owu, mije owu obubatbe ifo lek ebi ofifi ido, mè isa mkpọmfaka kiban̄ ififila lek kwun̄. 31 Ukot ije ngwan̄ kwun̄ ke owu oje. Eya orọ, mâtap ekpen̄ nnyibe ọmọ si me ubọk kwun̄.

32 “Ogwukaan̄-ene Okumugwem ìtumu ibe ikeyi:

35 “Eya orọ, Ogwukaan̄-ene Okumugwem ìtumu ibe ikeyi: Eyi owu owuukbe emi, mè ibieen̄ emi ito me udun̄ kwun̄, owu môbọkọ osusut barabat kwun̄ mè òje oyet kwun̄.”

36 Okumugwem onenitumu inyi emi ibe: “Gwun̄ ebilene, sibi oyerebet me ibot kè Owola melek Owoliba. Sa òchichaka inu cha ema erọbe kweek ema me isi. 37 Mije, ema mîje ugan, eje ene si òwa me ubọk kiban̄. Ema mîbubat ikana igọọk mkpọmfaka, mè isa bọn ema emaan̄be inyi emi inyi ewọp ekọọk me ukan̄ enyi mkpọmfaka. 38 Ògak ge, ema mîrọ emi ijo inu kechi: Me emen mgbọ yaage ke ema efifila Uwu Mbuban n̄a, mè ichichaka si Usen Mbuban n̄a geelek. 39 Me usen yaage ema ekpan̄be bọn kiban̄ inyi mkpọmfaka kiban̄ ke ema enin̄ Uwu Mbuban n̄a isi ichichaka. Inu ema erọbe me uwu n̄a ire eya.

40 “Enyi ngwan̄ ebibaan̄ iba ekiria osat ibe egween̄ ebirieen̄ me ujọn̄ọ ujọn̄ọ ere ejet enyi. Ife cha isinu, enyi mîra ibak me lek kiban̄ iken mun̄, mè itap tori me chieen̄, mè isa inu mbala-lek ibala lek. 41 Enyi mîra isiki ikweek me inyọn̄ ujọn̄ọ ikasi òjajaan̄, mè iyik ikasi itoon̄-inu ebalabe, eyi otoon̄be nsensi n̄a mè aran̄ n̄a me inyọn̄, me isi ikasi ikweek irek ya.

42 “Okput ebi una ekiket okekitataan̄ ikana ọmọ. Ebi usa-miin̄ esabe me emen èwê inu, melek ebi ene ikike; ema etatap ebibaan̄ cha asi ebek ubọk me ubọk, mè ikwuun̄ ema ujuja okpibot ubọọn̄ me ibot. 43 Emi nnenitumu ikọ ibak ogwu òjeje oyet ita efuuk me owot ya ibe, ‘Mgbọ yi, ebi ife cha egọọk ọmọ elaak ma kubọk ogwu òje oyet, mije, ogwu òje oyet ke ọmọ ore.’ 44 Ebi ife cha egọgọọk ema ilaak, kubọk ebirieen̄ ekigọọk ogwu òje oyet ilaak. Ikeya ke ema egọọk Owola mè Owoliba, ebibaan̄ barabat cha ilaak. 45 Ire, ebi ata irọrọ mêtip ema oyerebet ekitip ebibaan̄ ìsi ugan mè ebibaan̄ ìfafiat eje ene, mije, ema mîsi ugan; eje ene si me ubọk kiban̄ okupbe.

46 “Ogwukaan̄-ene Okumugwem ìtumu ibe ikeyi: Ìsa urum ebi ene ìna, inyi enerọ ekeme ema, mè etap ema ukpook me lek, mè efum inu kiban̄. 47 Urum ebi ene cha mêsa ewuuk itọọn̄ ema, mè isa oge akọn̄ kiban̄ ikpan̄ ema, mè ikpan̄ si bọn kiban̄ ebirieen̄ mè ebibaan̄, mè iwọp uwu kiban̄ itaka iriọk.

48 “Sa me ikeya, mârọ ibe barabat ita me ido, mè itaba otutuuk ebibaan̄ ubọk me utọn̄ ibe ekarọ barabat enyi erọbe. 49 Enyi mêbọkọ mkpukpe barabat kinyi, mè ibọkọ si mkpukpe ijo inu enyi erọbe me lek enyi ekisi iriaak mkpọmfaka. Enyi mêneniriọọn̄ ibe ke emi nre Ogwukaan̄-ene Okumugwem.”