Nchat ukwuuk ene îjot me emen iteke
37
Unye Okumugwem onenijot emi me emen. Ekwukwu Okumugwem onenisan̄a emi isibi isi ito me eden̄ iteke ge ukwuuk ukwuuk ojotbe emen gbak. 2 Inenisa emi ikije ikana ema okokop, mmumun̄ ibe ke ukwuuk cha îwa enenen enenen me eden̄ iteke ijọn̄ ya. Mmun̄ si ibe ke ukwuuk cha îchiaak enenen. 3 Inenido emi ibe, “Gwun̄ ebilene, ìre ukwuuk chi môkọt iluk ugwem ni?”Mbebe, “Ogwukaan̄-ene Okumugwem, owu gaalek oriọọn̄.”
4 Inenibe emi, “Ben nriran nyi ukwuuk chi, mè tumu nyi ema ibe, ‘Enyi nchiaak ukwuuk, ìnọ ikọ Okumugwem! 5 Ogwukaan̄-ene Okumugwem ìtumu inyi ukwuuk chi ibe ikeyi: Emi mânirọ ibe efuuk inin̄ enyi me emen, enyi mêluluk ugwem. 6 Mâtap enyi nlik me lek, mè irọ ibe ufuk itibi enyi me lek, mè irọ ibe akpa ichit enyi. Mâtap enyi efuuk me emen, enyi mêluluk ugwem. Enyi mêneniriọọn̄ ibe ke emi nre Okumugwem.’ ”
7 Nneniben nriran ike Okumugwem onyibe emi ida. Ike nkiben nriran ya, nnọnọ ida amọn, mè inọ okput inu òkisisisik, ukwuuk cha okekilibi igba igọm, ukwuuk melek ukwuuk. 8 Mkpọkpọ, mè imun̄ nlik mè ufuk esibibe me lek kiban̄, akpa okakana ema ichit. Ire, kpunu efuuk me emen kiban̄.
9 Okumugwem onenibe emi, “Ben nriran nyi efet. Gwun̄ ebilene, ben nriran nyi efet, mè tumu nyi ibe, ‘Ogwukaan̄-ene Okumugwem ìtumu ibe ikeyi: Efuuk, je me emen efet me agan̄ ini eyi linyọn̄ na, mè wut nin̄ emen ebi ekpan̄be chi, inyi ema eluk ugwem.’ ” 10 Mbeben nriran ike Okumugwem onyibe emi ida, efuuk oninin̄ emen kiban̄; ema eluluk ugwem, mè inan̄a ikeke ikeke me ukot kiban̄, ikpele urum ebi akọn̄ ìwawa enenen enenen.
11 Inenibe emi: “Gwun̄ ebilene, ukwuuk chi ìre otutuuk ebi uwu kè Ijeren. Ema ebe, ‘Ukwuuk kiji îchiaak ita, ikpọchieen̄ kiji ichep, mîfieek eji ifiin̄.’ 12 Eya orọ, ben nriran, mè tumu nyi ema ibe ke Ogwukaan̄-ene Okumugwem ìtumu ibe ikeyi: ‘Jei ebi n̄a, mâchili udọn̄-ufuun̄ kinyi isan̄a enyi isibi, mâsa enyi igwu ikom ika inu me inyọn̄ ijọn̄ Ijeren. 13 Mgbọ nsichili udọn̄-ufuun̄ kinyi isan̄a enyi isibi, enyi ebi n̄a mêneniriọọn̄ ibe ke emi nre Okumugwem. 14 Mâtap Ekwukwu n̄a me emen kinyi, enyi mêluluk ugwem, mânenito enyi me lek ijọn̄ kinyi. Enyi mêneniriọọn̄ ibe ke îre emi Okumugwem ntumu isan̄a, mè irọ. Emi Okumugwem ntumu.’ ”
Ido ge me irak ubọọn̄ ge
15 Okumugwem onenitumu inyi emi ibe: 16 “Owu gwun̄ ebilene, mọnọ uti ge, mè ge inu me lek ibe, ‘Eyi kè Juda mè ebi Ijeren ebi melek kan̄.’ Mọnọ si ofifi uti, mè ge inu me lek keya ibe, ‘Eyi kè Iferem òkup inyi Josefu mè otutuuk uwu kè Ijeren ebi melek kan̄.’ 17 Gbaan̄ ema tet kaan̄, ge me ibot ge, inyi ikup me ubọk kwun̄ kubọk uti ge, ema mênenigbaan̄ ire ge me ubọk kwun̄.
18 “Mgbọ ebi kinyi isido owu ibe, ‘Ìre òkpotumu inu inu chi osibibe inyi eji ni?’ 19 Tumu nyi ema ibe, ‘Ogwukaan̄-ene Okumugwem ìtumu ibe ikeyi: Emi mânimọnọ uti kè Josefu òkup me ubọk kè Iferem mè eyi ebi otoko Ijeren ebi melek kan̄, isa isi igbaan̄ isọk me lek uti kè Juda, mè irọ ema ekana uti ge, ema mênenikana ge me ubọk n̄a.’ 20 Tet uti ogebe inu me lek cha kaan̄ me ubọk kwun̄, inyi ema ekemun̄, 21 mè tumu nyi ema ibe, ‘Ogwukaan̄-ene Okumugwem ìtumu ibe ikeyi: Emi mânikpulu ebi Ijeren isibi me etete ebi ofifi ido cha ema esibe isi inin̄, mè ititen̄e ema me agan̄ geelek isa ika inu me inyọn̄ ijọn̄ kiban̄. 22 Mârọ ema ere ido ge me lek ijọn̄ kiban̄ me inyọn̄ ogoon̄ ebi Ijeren geelek. Ogwu ubọọn̄ ge obokikpulu ema otutuuk. Ema kpebeyaka ikpọk ire ido iba, kpebeyaka ikpọk iche ema isibi ijọn̄ ubọọn̄ iba ofifi. 23 Ema kpebeyaka ikpọk isa mkpọmfaka kiban̄, mè ìre òchichaka inu kiban̄ cha, mè ìre inu ikpak geelek ififila lek kiban̄ ofifi. Ire, mâtaba ema isibi me otutuuk ere nluk kiban̄ cha ere ema ekupbe ikirọ ijo inu, mè igwọk ema lek. Ema mênenikana ebi n̄a, emi mârere Awaji kiban̄.
24 “ ‘Debit gwun̄ ikwaan̄ n̄a mônenire ogwu ubọọn̄ kiban̄; ema mênenikaan̄ ogwu òkpukpo arọọn̄ ge. Ema mênenikisun̄ ikan n̄a, mè ikigbala chieen̄ ikirọ orọmijọn̄ n̄a. 25 Ema mêneniluk me inyọn̄ ijọn̄ ya nnyibe Jekọp ogwu ikwaan̄ n̄a, ijọn̄ ere ebi nte kinyi elukbe. Ema mè bọn kiban̄ mè bọn bọn kiban̄ mêkekiluk me ere ya ire mgbọ geelek, Debit ogwu ikwaan̄ n̄a môrere ogwu ibot mkpulu kiban̄ ire mgbọ geelek. 26 Emi melek kiban̄ mênenigbaan̄ irọ inyan̄a-ibot eyi esuuk, eyi môrebe inyan̄a-ibot òkup ire mgbọ geelek. Mânenisun̄ ema inye me irek, mè irọ ema emumana ewa. Mânenigwuun̄ Uwu Mbuban n̄a me etete kiban̄ ire mgbọ geelek. 27 Ere nluk n̄a mônenikup melek kiban̄; emi mârere Awaji kiban̄, ema mêrere ebi n̄a. 28 Mgbọ Uwu Mbuban n̄a isi inikeke me etete kiban̄ ire mgbọ geelek, ebi ofifi ido mêneniriọọn̄ ibe ke emi Okumugwem nsun̄ Ijeren me mbuban.’ ”