7 “ ‘Bem lek, mè nen̄e lek sun̄, owu mè otutuuk urum ebi ìtititiin̄ ikana owu, mè owu re ogwu òkikpọ ema chieen̄ me lek. 8 Owuwa usen isiraka, mêgwen owu ibe owu ònoje akọn̄. Acha acha me isi owu môjibi akọn̄ isi ido ònwọnwọnọ me ubọk akọn̄. Ekpukpulu ebi ido ya inan̄a me owuwa ofifi ido inu me ogoon̄ Ijeren, echi òyayat ita me ujọn̄ọ ujọn̄ọ mgbọ. Ekpukpulu ema me ofifi ido isibi, ema ekekiluk me utelelek mgbọ keyi. 9 Owu mè otutuuk urum akọn̄ kwun̄ melek owuwa ofifi ido ebi mêgọọkbe owu ijibi ije, enyi ebeje kubọk egwijo, mè iduku kubọk oduku inyọn̄ ichit lek ijọn̄ ya.

10 “ ‘Ogwukaan̄-ene Okumugwem ìtumu ibe ke ekiket mônin̄ owu me ejit me usen ya, owu môtọtọt ijo otitọt. 11 Owu môtumu ibe: “Mâjibi akọn̄ isi lek ido ebi kpenama mgban ikwek ama kiban̄; mâsi itim akọn̄ me lek ebi ìkup me esuuk, mè ikiluk me utelelek. Ema otutuuk ekiluk kpenama mgban ikana ama kiban̄, kpekaan̄ otunchit mè olọkọrọ. 12 Mâkpulu inu inọọn̄ me akọn̄, mè ifum mfum. Mâchak ubọk n̄a me lek ere òyayat cha, echi ekpọkbe inama iluk, mè ichak si ubọk me lek ebi ekpulube me ofifi ido inu, ebi ìnenikaan̄ ogbogbo anam mè inu ubọọn̄, mè ikiluk me ere òkup eden̄ eden̄ me linyọn̄.” 13 Sieba mè Dedan mè ebi ewe ìnan̄a me Tasis mè otutuuk asabọn ama kan̄ mêtumu inyi owu ibe, “Ìre ònu inenikpulu inu? Ìre òtitiin̄ urum ene kwun̄ isa inu inenifum mfum, mè inenikpulu alata okuket mè alata araran̄, mè anam melek inu ubọọn̄ isa ifo ni, inyi owu òkpulu otutuuk inu geelek ònọọn̄?” ’

14 “Eya orọ, gwun̄ ebilene, ben nriran, mè tumu nyi Gọgu ibe: ‘Ogwukaan̄-ene Okumugwem ìtumu ibe ikeyi: Me usen ya, mgbọ ebi n̄a ebi Ijeren ebekiluk me utelelek, ìre owu òkpofat iriọọn̄ ni? 15 Owu mônan̄a me ere kwun̄ me okputut agan̄ inyọn̄ inyọn̄ inu, owu mè owuwa ido ebi melek kwun̄, otutuuk kiban̄ ebi ìkikọp me inyọn̄ inyinya, ikpele urum ebi ene, owuwa urum ebi akọn̄. 16 Owu môjibi akọn̄ ije isi lek ebi n̄a Ijeren kubọk oduku inyọn̄ oduku ichit ijọn̄. Owu Gọgu, me usen òkup me isi, mâsa owu initim akọn̄ ikeme ijọn̄ n̄a, inyi, nsisa me lek kwun̄ ijeen̄ ibe ke emi ǹkup me mbuban, ebi ofifi ido mênenisa me ikeya iriọọn̄ emi.

17 “ ‘Ogwukaan̄-ene Okumugwem ìtumu ibe ikeyi: Ìre ìkare owu ore ogwu keya ntumube ikọ ofolek sa me otu ebi ikwaan̄ n̄a, ebi nriran Ijeren, ebi ìbeben nriran owuwa acha me mgbọ ukot ikaan̄ ya, ibe ke mâria owu inyi ònotim akọn̄ me lek ebi Ijeren? 18 Me usen ya, Gọgu isijibi akọn̄ inu me ijọn̄ Ijeren, môribi emi uyok uyok unaan̄-ejit n̄a. Emi Okumugwem Awaji ntumu. 19 Me mba-ejit n̄a mè unaan̄-ejit òyoyok kubọk ukan̄, ǹkitumu ibe ke uga sikisik-ijọn̄ môkup me ido Ijeren me usen keya. 20 Irin̄ òkup me okwaan̄, mè unọn òwulu me inyọn̄, mè anam òkup me oron, mè inu geelek òkinyinyọnọ me ijọn̄, mè otutuuk ebilene me linyọn̄ mêkiran me isi n̄a. Ebi kè ogoon̄ mêgbugbọ igwook, ebi kè ngigo mêfan̄a igwook, mgban geelek mônan̄a irọn̄ me ijọn̄. 21 Mâria oge akọn̄ isa ililaba Gọgu me inyọn̄ otutuuk ogoon̄ n̄a. Ene geelek me etete ebi kan̄ môyayaka oge akọn̄ ida ogwu ngwan̄. Emi Ogwukaan̄-ene Okumugwem ntumu. 22 Mâsa ijo orukan̄ mè ifafiat eje isulu ọmọ osusut. Mâda unye otu ibot ile mè ibot mgbọlọ, mè ukan̄ biridọni igwook ọmọ mè urum akọn̄ kan̄ me lek, mè ida si igwook me lek owuwa ebi ofifi ido ebi melek kan̄ cha. 23 Sa me ikeya ke mâjeen̄ umin n̄a mè ikukup me mbuban nkupbe, mè irọ inyi eriọọn̄ emi me isi ebi owuwa ido. Ema mêrọriọọn̄ ibe ke emi nre Okumugwem.’