7 “ ‘Mânenirọ inyi eriọọn̄ erieen̄ mbuban n̄a me etete ebi Ijeren. M̀kpayaka itele ibe efifila erieen̄ mbuban n̄a ofifi, ebi ofifi ido mêneniriọọn̄ ibe ke emi Okumugwem ǹkup me mbuban me Ijeren. 8 Inu chi òkinu, ìkpolọlọ irọrọ iso. Emi Ogwukaan̄-ene Okumugwem ntumu. Eyiyi ore usen ya ntumube ikọ ibak.

9 “ ‘Ebi ìluk me ama geelek me Ijeren mênanan̄a isibi isi ikpulu nroon̄ akọn̄ kinyi cha isa irọ iye isọk ukan̄, ebi kè agbọ ile mè agbọ ija, ogbaan̄ mè oraan̄, melek m̀gbele mè otunwa. Ema mêsa nroon̄ akọn̄ cha isọk ukan̄ acha jaaba. 10 Ema kpebeyaka ikititen̄e iye me otu oron, kpebeyaka ikichon uti me ejit oron. Mije, ema mêkisa nroon̄ akọn̄ cha irọ iye. Ema mêfum ebi ìfufum ema, mè ikpulu inu ebi ìkpukpulu inu kiban̄. Emi Ogwukaan̄-ene Okumugwem ntumu.

11 “ ‘Me usen ya, mânyi Gọgu ere ifuun̄ ene me Ijeren, me emen iteke ebi ije ekije isi agba awaji me agan̄ mbum-ura. Ere ifuun̄ ene ya môchit oniin̄ ebi ije ekije iraka, mije, mêfuun̄ Gọgu mè otutuuk urum ebi melek kan̄ me ere ya. Eya orọ, ebekigwen iteke ya iteke Urum Akọn̄ Ebi Gọgu.

12 “ ‘Ebi uwu kè Ijeren mêsa otuuk kè onyan̄ jaaba ikifuun̄ ema, inyi esa me ikeya egwọk ijọn̄ ya. 13 Otutuuk ebi lek ijọn̄ ya mêsibi isi igọọk ifuun̄ ema. Usen mkpa kiban̄ ya mônenire usen ebi ene mênyibe emi umin, mè ire si usen òtaan̄ etip. Emi Ogwukaan̄-ene Okumugwem ntumu.

14 “ ‘Onyan̄ jaaba isiraka, mênenikigobo ene me ukpa me ukpa ibe ekeje ekana lek ijọn̄ ya ekeweek nkwukwu ene echi òsisik ibia me inyọn̄ ijọn̄, mè ekefuun̄, inyi esa me ikeya egwọk ijọn̄ ya. 15 Ike ema mêkije ikana lek ijọn̄ ya, ogwu imun̄ ukwuuk ene, îra itap iman̄ me agba lek ukwuuk ya, ebi òfuun̄ mîra inifuun̄ ukwuuk ene ya me emen iteke Urum Akọn̄ Ebi Gọgu. 16 Erieen̄ ama ya ìbore Amona.^a Ema mêsasa me ikeya igwọk lek ijọn̄ ya.’

17 “Gwun̄ ebilene, Ogwukaan̄-ene Okumugwem ìtumu ibe ikeyi: Tumu nyi otutuuk chieen̄ unọn òwulu me inyọn̄ geelek mè otutuuk anam oron geelek ibe: ‘Ìtitiin̄, mè ìna, ìnan̄a me agan̄ geelek ìgbaan̄ ìna ìnirie ikpele ngwugwa nkigwa inyi enyi me inyọn̄ ebi kè ogoon̄ Ijeren, mè ìtaka anam mè ìnwọ eje. 18 Enyi mêtaka ufuk ebi ilile, mè inwọ eje ebi ibot me linyọn̄ kubọk ema ìre orie arọọn̄ mè bọn arọọn̄, mè orie ebot mè eriembuuk, otutuuk kiban̄ emiin̄ ufuk kubọk anam ònan̄a me inyọn̄ ijọn̄ agan̄ Basan. 19 Enyi mêtaka anam mege môgbugbuuk enyi, mè inwọ eje mege môsasa enyi me ere ngwugwa nkigwa inyi enyi. 20 Me lek ikasi inorie n̄a, enyi mêtaka inyinya mè ebi ìkikọp, mè ebi unye me akọn̄ mè kpa isi kpa isi ebi akọn̄.’ Emi Ogwukaan̄-ene Okumugwem ntumu.

21 “Mâsan̄a umin n̄a isibi ijeen̄ ebi ofifi ido, otutuuk ebi ofifi ido mêmumun̄ osusut nkinyi ema, mè imun̄ si ubọk n̄a òrere ema lek. 22 Bene me usen keya fo isi, ebi uwu kè Ijeren mêneniriọọn̄ ibe ke emi nre Okumugwem Awaji kiban̄. 23 Ebi ofifi ido mêriọọn̄ ibe ke ebi Ijeren enin̄ me usun̄ akọn̄ bak me lek ijo inu kiban̄, mije, ema kpekeke isi me lek n̄a. Eya ke nda chieen̄ n̄a isan̄a me lek kiban̄, mè iyaka ema itap me ubọk ebi ochicha kiban̄, ema ekwakwaan̄ me otu oge akọn̄. 24 Ǹrọ ema inu ikpọ me lek filafila kiban̄ mè nrọ-nlọ kiban̄, mè ida chieen̄ isan̄a ema me lek.

25 “Eya orọ, Ogwukaan̄-ene Okumugwem ìtumu ibe ikeyi: Mâsa ebi uwu kè Jekọp ekpulube me usun̄ akọn̄ igwu ikom ika, mè ikaan̄ nsan me lek otutuuk ebi Ijeren, mè ijeen̄ ulọk nkaan̄be me lek erieen̄ mbuban n̄a. 26 Ema isiniluk me lek ijọn̄ kiban̄ me utelelek, mè ene geege ìkayaka ìtap ema ukpook me lek, ema mêneniwuuk esip kiban̄ mè otutuuk una ichechieek kiban̄ me lek n̄a. 27 Mgbọ nsisa ema inan̄a me ofifi ido cha ika, mè ikpulu ema isibi me ido ebi ochicha kiban̄, mâsasa me lek kiban̄ ijeen̄, me isi owuwa ebi ofifi ido, ibe ke emi ǹkup me mbuban. 28 Ema mêneniriọọn̄ ibe ke emi nre Okumugwem Awaji kiban̄, mije, ubọk geelek ntapbe ema me usun̄ akọn̄ me etete ofifi ido, mâkpulu ema isa ika inu me lek ijọn̄ kiban̄, m̀kpatele ene geege me lek kiban̄ isik me udun̄. 29 M̀kpayaka ida isi n̄a isan̄a ema me lek, mije, mâgwook Ekwukwu n̄a me lek ebi uwu kè Ijeren. Emi Ogwukaan̄-ene Okumugwem ntumu.”