Awaji îkaan̄ ikọ melek ebi Ijeren
4
Enyi ebi Ijeren, ìgban̄ ikọ Okumugwem,mije, Okumugwem îkaan̄ ikọ
òkekeme enyi ebi ìluk me inyọn̄ ijọn̄ yi:
“Kpunu atikọ, kpunu imumechieen̄,
kpunu irọriọọn̄ Awaji me inyọn̄ ijọn̄ kinyi.
2 Inu òkukup ìre igbogbo ene, mè ikakan̄ ataak,
mè ikpakpan̄ ene, mè ichichiin̄ inọ, mè igagan nwa ene;
ema kpekaan̄ okike inyi ijo inu,
ekifiat eje ene ge me udun̄ ge.
3 Eya orọ, inyọn̄ ijọn̄ kiban̄ îchiaak isan̄a kpai;
otutuuk ebi ìluk me inyọn̄ mîjet ita;
ebi kè anam oron mè ebi kè unọn òwulu me inyọn̄;
ebi kè irin̄ òkup me okwaan̄ si mêkikwaan̄.
4 “Ene geege ikatoon̄ ene ikọ,
ene geege ikatumu ìkeme ofifi ene;
mije, ebi kinyi ekup kubọk
ebi ìkitoon̄ ebi ngwugwa ikọ.
5 Enyi ekitọbọ ukot irurọn̄ọ ikarek mè eririeen̄,
enyi melek ebi nriran.
Mâjijaka nga kinyi ya,
òrere ido kinyi Ijeren.
6 Ebi n̄a mîchieen̄ ita,
mije, ema kperiọọn̄ emi.
“Bak me lek enyi ebi ngwugwa ejitbe irọriọọn̄ emi,
emi si njit ibe enyi ekare ebi ngwugwa n̄a;
bak me lek enyi ewuukbe ijejeen̄ n̄a, emi Awaji kinyi,
emi si, mâwuuk nsabọn kinyi.
7 Ike ebi ngwugwa ekiwa,
ikeya ke ijo inu ema ekirọ ikeme emi okiwa;
emi mâsa esip inwene umin kiban̄.
8 Ngwugwa ijo inu ebi n̄a
ekinigwa ke ema ekisa ikaan̄ inorie irie,
sa me ikeya, ema
ekinwọnwọọn̄ inu ikpak ebi n̄a ekirọ.
9 Mônenire: Ike ebi ene ekupbe,
ikeya si ke ebi ngwugwa ekup;
mânyi ema osusut me lek ijo oniin̄ kiban̄,
mè ikpe ema mkpukpe ijo inu ema erọbe.
10 Ema mêrie inorie, ire, ìkpojot ema;
ema mêje oyet, ire, kpebemumana,
bak me lek ema etelebe Okumugwem,
mè ikisi igọọk ofifi awaji cha.
11 Òje oyet mè oka miin̄ mè aya miin̄
îrọ ebi n̄a enan ngobo-ntet.
12 Ema ekisi lek mkpọmfaka uti isi ikido ido-inu,
uti ikike kiban̄ îra ikinyi ema ufọọk-otu,
mije, ekwukwu ijeje oyet îsa ema ilọ oniin̄,
ema kpeyaka ikeke inye me lek Awaji kiban̄.
13 Ema ekigwa ngwugwa me inyọn̄ ibot ogoon̄,
mè ikiwọp nsensi me inyọn̄ orioon̄,
me irak ilip, mè irak uti pọpula, mè irak ako,
ere òkikwek ene lek ijaan̄.
Eya otap bọn kinyi ebibaan̄ òje oyet,
mè irọ ibe nwa bọn kinyi ekesi ugan.
14 “M̀kpasulu bọn ebibaan̄ kinyi osusut
mgbọ ema ekije oyet,
m̀kpasusulu si nwa bọn kinyi osusut
mgbọ ema ekisi ugan,
mije, ebirieen̄ kinyi si ekisi igọọk ebi òje oyet,
mè ikigọọk ebi òje oyet isi yọk ikigwa ngwugwa;
ife ekakaan̄ge ngobo-ntet ebenin̄ me ichep.
15 Ebi Ijeren, enyi mîje oyet,
ire, ikachieek ibe ijo inu kinyi yi ichiọọk ebi Juda.
Ikalululuk ìje ìsi Giligan,
ikanene si ìsi Bet Afen.a
Ikanyanyan̄a ibot ìbe,
‘Kè lek ugwem Okumugwem!’
16 Ebi Ijeren mînye ibot
kubọk gwun̄ eriembuuk ònye ibot.
Ìre kpa ubọk ke Okumugwem obosa ikpukpo ema
kubọk arọọn̄ òkup me ijọn̄ mbubet òwewele?
17 Ebi Iferem mîsa lek kiban̄ ichim iriaak me lek mkpọmfaka.
Ìtele ema ekup ikeya!
18 Ema isinwọ miin̄ kiban̄ isan̄a,
mîra ikije inyi isi me lek òje oyet.
Ebi ibot kiban̄ ekima irọrọ inu esip
igak irọrọ inu òkinyi ene umin.
19 Efet egwijo obowut ema ije;
ngwugwa kiban̄ cha ìbokana inu esip inyi ema.