Ebi ibot ido Ijeren mîrọ ilọ
5
“Enyi ebi ngwugwa, ìgban̄ ikọ keyi!Enyi ebi Ijeren, ìgbala utọn̄ ìgban̄!
Enyi ebi uwu ubọọn̄, ìriọọn̄ ubọk ìnọ!
Oyerebet keyi ìfieek enyi,
mije, enyi mîkana ufe me Mijipa,
mè ikana njin etobe ikana ijọn̄ me Tabọ.
2 Ebi ijo ibot mêkikpan̄ ene nsak nsak;
emi mâsulu otutuuk kiban̄ osusut.
3 Enyi ebi Iferem, nriọọn̄ enyi isan̄a kpai,
ebi Ijeren, enyi kpelet me chieen̄ n̄a;
mgbọ keyi, enyi ebi Iferem mîkana ifo lek ijeje oyet;
ebi Ijeren mîbubuku.
4 “Inu ema ekirọ ìkachieek ibe ema
egwu ekom enu me lek Awaji kiban̄.
Ekwukwu ijeje oyet înin̄ ema emen,
ema kpeyaka iriọọn̄ Okumugwem.
5 Inu òbosibi ata-ikọ ikeme ebi Ijeren
ìre ugumulek kiban̄;
ijo inu ebi Ijeren mè ebi Iferem îda ema ito;
ebi Juda si mîgọọk ema inan̄a irọn̄.
6 Ema mêkpulu urum arọọn̄ mè eriembuuk kiban̄
isa isi igwa ngwugwa iweek Okumugwem,
ire, ema kpebemun̄ ọmọ;
Awaji îkpebe lek kan̄ isan̄a ema me lek.
7 Ema kpekeke isi me lek Okumugwem;
ema ekiboon̄ bọn ugan.
Ijọk Aya Onyan̄ kiban̄ cha ema ekirie môjijaka ema,
mè ijijaka ijọn̄ kiban̄ cha ema ekaan̄be me ìrot.
8 “Ìwut otita akọn̄ me Gibiya,
mè ìwut odu me Rama.
Ìtaan̄ ukpo akọn̄ me Bet Afen;a
enyi ebi Benjamin, ìje me isi akọn̄.
9 Mêkpukpuku Iferem igwook,
mgbọ usen mkpukpe isire.
Inu echi ìkpolọlọ irọrọ iso
ke nkilook me etete otoko ebi Ijeren geelek.
10 Ebi ibot ido Juda ekup kubọk
ebi ìjujujuk ewuuk okike ijọn̄.
Emi mâgbuku uga unaan̄-ejit n̄a igwook ema me lek,
kubọk ògbugbuk mun̄ obaak imeen̄ ere.
11 Oyerebet n̄a môkeme ebi Iferem,
mè ijak ema ikpukpuku,
mije, ejit kiban̄ ìnyenye me lek irariaak mkpọmfaka.
12 Emi mâtaka Iferem igwak kubọk nkarankat otaka ekwut,
mè ikpukpuku Juda igwook kubọk uti òjọjọ idek.
13 Mgbọ Iferem omun̄be orukan̄ òtet ọmọ,
Juda si omumun̄ inya òtaka ọmọ,
Iferem olilibi isi Asiria,
mè iria osat ibeek ikpele
ogwu ubọọn̄ ido ya ntap-ubọk.
Ire, ogwu ubọọn̄ ya ìkakọt ìgwa orukan̄ kiban̄ cha,
ìkakọkọt si ìrọ inya kiban̄ cha ita ichep.
14 Mije, emi mâkana egbe àtat ichim Iferem,
mè ikana gwun̄ egbe àtat itet ebi uwu kè Juda.
Emi, iin̄, emi me lek n̄a
mbagwak ema igwook okpọkọ okpọkọ,
mè ije inan̄a isi inu mbasi;
emi mâben ema ije,
kpunu ogwu òbonitaba ema isibi.
15 Nsirọ isan̄a, mânenigwu ikom ifo ere n̄a isi ikup
mege ire mgbọ ema mêchieekbe ibe ema mîrọ emi ilọ,
mè iniweek emi;
ema mêweek emi enenen me emen ukwook kiban̄.”