Ebi Ijeren kpegwu ikom me otutuuk ejit
6
Ebi Ijeren etumu ibe, “Ìna, eji egwu ekom esi lek Okumugwem;îgwak eji igwook okpọkọ okpọkọ,
ire, môgwa eji;
îtap eji unan me lek,
ire, môbọp unan kiji ichit.
2 Egwe iba isiraka, môrọ eji egat ugwem;
òso egwe ita, môbene eji igwuun̄,
eji mêkekiluk me isi kan̄.
3 Kè eji eriọọn̄ Okumugwem;
kè eji egwuun̄ ukot enye eriọọn̄ ọmọ.
Ike egwe ìkakilọ iwewele,
ikeya si, ọmọ ìkpolọlọ ikakana isibi;
ìbonu inyi eji kubọk okpatu ibot,
kubọk ibot otu ura òkinu inireke ijọn̄.”
4 Ire, Okumugwem obebe, “Ebi Iferem,
ìre m̀barọrọ enyi mọnọ?
Ebi Juda, keke ke mbarọ enyi ni?
Imumechieen̄ kinyi ìbet lek àbaan̄ otu ewelegwe,
mè ibet lek mbat okpa otu ewelegwe,
òkigwat lek isibi,
mè ininimi ita mgbọ yaage.
5 Eya orọ nsabe ebi nriran n̄a isọp enyi igwook,
mè isa ikọ otu n̄a ikpan̄ enyi;
oyerebet kinyi ìbonu kubọk utoon̄ egwe,
ìkpolọlọ.
6 Mije, emi ǹkiweek nsan,
ìkare ngwugwa,
mè iweek ibe eriọọn̄ Awaji,
igak igwagwa ngwugwa ewọwọp.
7 “Ema mîchaka inyan̄a-ibot kubọk Adam orọbe,
ema mîjit emi itele me ere ya.
8 Giliadi ìre ama ebi ikpak,
ama esabe eje ene ijak isise.
9 Ogbo ebi ngwugwa ekilileek me lek oniin̄,
kubọk urum ebi inọ ekilileek itet ene;
ema mîlileek ikpan̄ ene me oniin̄ Sekem,
mè irọ atalek ijo inu ikpak.
10 Mmun̄ inu mgbugbo
me uwu kè Ijeren.
Ere ya ke ebi Iferem ekije oyet,
ere ya ke ebi Ijeren ekifiat lek kiban̄.
11 “Juda, owu si,
nsun̄ irọrọkọ uko eyi osusut iban owu,
mgbọ mâkpulube ebi n̄a, ebi ekpulube me akọn̄,
iyaka isa ika.