Ebi Ijeren mîma inu ikpak
7
“Mgbọ nsigwa ebi Ijeren,ijo inu kè Iferem îra ikpọk mbum,
inu ikpak ebi Sameria îra ifuku isibi.
Ema ekikan̄ ataak;
ebi inọ mêkibum uwu iraka inin̄,
ogbo ebi inọ afa mêkitet ene me oniin̄.
2 Ema kperiọọn̄
ibe ke ǹkawuuk otutuuk inu ikpak kiban̄.
Ijo inu kiban̄ ìkakana ema okokop,
mè ikeke me isi n̄a mgbọ geelek.
3 Ema ekisa inu ikpak kiban̄ irọ ogwu ubọọn̄ ibele ejit,
mè ikisa ataak kiban̄ irọ ebi ibot mkpulu etop ejit.
4 Ema otutuuk ìre ebi ugan-nwa;
eya ìkiyok ema me ejit kubọk ukan̄ orioon̄ fituru,
eyi ogwu òwọp fituru okitap iye, inyi ikiyok,
bene me mgbọ îkimian̄a akpa ekọkọk,
isi ire mgbọ îwukube.
5 Me usen ijọk ogwu ubọọn̄ kiji,
ebi ibot mkpulu mînwọ miin̄ idide,
ogwu ubọọn̄ ogọgọọk ebi ochak igbaan̄ ubọk irọ inu.
6 Ijo otitọt ìyok ema me ejit
kubọk ukan̄ emen orioon̄ fituru;
otutuuk eririeen̄ ìkibububuuk;
isire ewelegwe, îra iseme kubọk ukan̄ òkisasak.
7 Ema otutuuk ene eyok kubọk orioon̄ fituru;
mîkpaan̄ otutuuk ebi ibot mkpulu kiban̄ isan̄a.
Mîkpaan̄ otutuuk ebi ubọọn̄ kiban̄ igwook,
kpunu ene geege me etete
kiban̄ òtataan̄ ukpo igwen emi.
8 “Ebi Iferem mîgọọk ebi ofifi ido geelek igbaan̄ ifufuku;
ebi Iferem ebet lek unin̄i fituru eyi kpewọp ibet.
9 Ebi ofifi ife mîkpukpuku unye kiban̄ isan̄a,
ire, ema kperiọọn̄.
Isọọn̄ îgigen̄e ema me ibot,
ire, ema kperiọọn̄.
10 Ugumulek ebi Ijeren okitumu ikọ ikeme ema,
ire, me emen inu chi geelek,
ebi Ijeren kpegwu ikom isi lek Okumugwem Awaji kiban̄,
kpeweweek si ọmọ.
11 “Ebi Iferem ebet lek ekerekwukwu,
ema ekup ebot ebot, mè ikup ètele ètele,
mêkigwen ebi Ijipiti ibe enin̄ ema lek,
mêkikana igọọk ebi Asiria isi iweek ntap-ubọk.
12 Ema isije, mâtọp njin n̄a ichit ema,
mè itaba ema igwook me ijọn̄
kubọk unọn òwulu me inyọn̄.
Mâsulu ema osusut,
kubọk mwuukbe lek ilook me emen ntitiin̄ kiban̄.
13 Môfieek inyi ema,
mije ema mîje ikwala me lek n̄a!
Mêjijaka ema igwook,
mije, ema mîfieek inan̄a me lek n̄a!
Mweek ifafaka ema isibi,
ire, ema ekakan̄ ataak itoon̄ emi.
14 Ema kpekitaan̄ ukpo igwen emi me otutuuk ejit kiban̄,
ire, ekup me inyọn̄ mkpilaak kiban̄ ikito ito.
Ema ekibak me lek akpa mè aya miin̄ ikigbaan̄ ititiin̄,a
mè ijit emi itele.
15 Îre emi me lek n̄a njeen̄ ema inu, mè irọ ubọk kiban̄ inye,
ire, emi ke ema eyaka itọt ijo inu ikeme.
16 Ema mîgwu ikom,
ire, ìkare Okumugwem ke egwu ikom inu me lek;
ema ekup kubọk ogbaan̄ òdedek ejit.
Ebi ibot mkpulu kiban̄ mêkwaan̄ me otu oge akọn̄,
mije ijo otu ikọ kiban̄.
Eyi ke ebesa ichak ema ochak
me ijọn̄ ido Ijipiti.”