Irariaak yọk îsa itip-oyerebet ijet ebi Ijeren
8
Okumugwem onenitumu ibe,“Ìgwuun̄ otita me otu ìwut ìriki ere!
Ebi ochicha mêkinu kubọk igo
me inyọn̄ Uwu Mbuban Okumugwem,
mije, ema mîfiat inyan̄a-ibot n̄a,
mè ikpaka ibot me lek ikan n̄a.
2 Ebi Ijeren mêtaan̄ ukpo igwen emi ibe,
‘Jei Awaji kiji, eji mîriọọn̄ owu ma!’
3 Ire, ebi Ijeren mîjit inu ònwọnwọn;
ogwu ochicha môlilaba ema.
4 Ema mîto ebi ubọọn̄, ire, ìkare emi nnyi ema unye;
mîgobo ebi ibot mkpulu, ire, kperọ emi ǹriọọn̄.
Ema esa alata okuket kiban̄ mè alata araran̄ kiban̄
irom mkpọmfaka inyi lek kiban̄,
inyi ema mêsa me ikeya ikwaan̄ ita.
5 Jei ebi Sameria, njit mkpọmfaka gwun̄ eriembuuk kinyi!
Unaan̄-ejit n̄a îyok me lek kinyi.
Mgbọ owa ke enyi ebekup me
emen ugwem ikatanage ire?
6 Eyiyi ìnan̄a me Ijeren!
Gwun̄ eriembuuk yi ìkare Awaji;
ogwu usọ orom.
Gwun̄ eriembuuk Sameria ya,
mêbọn̄ ikpukpuku okpọkọ okpọkọ.
7 Ema mêwop efet,
mè irọkọ egwijo.
Ire akpa ìkatibi oduuk,
ìkposibi inorie,
Ire itoto,
ebi ofifi ife eberọkọ irie isan̄a.
8 Mîben ebi Ijeren imen;
mgbọ keyi, ema ekup me etete ebi ofifi ido,
kubọk oka otin̄ ibat ikakupge me lek inu geege.
9 Ema mîje isi lek ebi Asiria,
kubọk inyinya akpan oron
òkinyinya ikana, ọmọ gaalek.
Iferem înyam lek kan̄ inyi ebi ugan kan̄.
10 Ubọk geelek ema enyambe lek kiban̄ inyi ebi ofifi ido,
emi mânigbaan̄ ema ititiin̄.
Ema mênibene ikijijit
me irak tukutuku me ubọk
ikpele ogwu ubọọn̄ Asiria ya.
11 “Ubọk geelek ebi Iferem
enamabe owuwa ntook ngwugwa
ebesa ikigwa ngwugwa ijo inu,
ntook cha ìyaka inikana ere ekisa irọ ijo inu.
12 Emi nge owuwa inu me emen ikan n̄a inyi ema,
ire, ema emọnọ ikan ya kubọk inu ebi ofifi ife, ìkare eyi kiban̄.
13 Ema isikigwa ngwugwa inyi emi,
ema ekigwa, mè ètaka anam,
ire, emi Okumugwem ǹkabele ejit me lek kiban̄.
Eya orọ, emi mâkeek inu ikpak kiban̄,
mè isulu ema osusut mije ijo inu kiban̄.
Ema mêgwu ikom ifon Ijipiti.
14 Ebi Ijeren mîwuuk ogwu òrorom ema,
mè isi inama uwu inyi ebi ubọọn̄.
Ebi Juda mînama mgban akọn̄ ikana owuwa ama,
ire, emi mâria ukan̄ itap me ama kiban̄ cha,
inyi itaka uwu mgban akọn̄ kiban̄ cha iriọk.”