Osusut òkup inyi ebi Ijeren
9
Enyi ebi Ijeren, ikanwọọn̄ unwọọn̄,ikabele ejit kubọk ebi ofifi ido;
mije, enyi mîbubat, mè ijit Awaji kinyi itele,
mè ikisi inyam lek kinyi ibọkọ mkpukpe ebi òje oyet;
enyi ekisi igwa ngwugwa inyi ebi kè ofifi awaji
me ere igen̄ akpa geelek.
2 Ere igen̄ akpa mè ere ichimi miin̄ ìkposibi inorie inyi enyi;
aya miin̄ ìkposo enyi ebek.
3 Enyi kpebekup me lek ijọn̄ Okumugwem;
ebi Iferem mêgwu ikom ifon Ijipiti,
mè isi ikirie inorie òkaan̄ mbuban me lek me Asiria.
4 Ema kpebeyaka ikigwa
ngwugwa miin̄ egwogwook
inyi Okumugwem;
ngwugwa kiban̄ ìkpoyaka itop ọmọ me lek.
Ngwugwa kecha ìbokup me lek kiban̄
kubọk inorie mkpa ene;
ebi geelek mêriebe
mêchaka mbuban me lek kiban̄;
mije, inorie kiban̄ ìbokup inyi isasa ibọọk ugwem kiban̄;
inorie kecha ìkponin̄ Uwu Mbuban Okumugwem.
5 Keke ke enyi eberọ me usen ijọk ibot mgbọ cha,
mè usen ijọk Okumugwem cha?
6 Ire enyi inwọnọ mfufiat,
ebi Ijipiti mêkwọọk enyi ititiin̄,
ebi Memfis mêfuun̄ enyi.
Inu unye otu ewe kinyi echi alata okuket cha,
abọm egbe môtibi ichit;
uwu ọfọ kinyi, ukpak môtibi ichit.
7 Enyi ebi Ijeren ìriọọn̄ ubọk ìriọọn̄:
usen osusut îre,
usen mkpukpe îta me ubọk.
Bak me lek, ijo inu kinyi îwa enenen,
ochicha ejit kinyi si îmin isaba,
eya orọ, enyi ekibe ke ogwu nriran ìre mbubut,
ke ogwu Ekwukwu Awaji
okupbe me emen ìre iraak.
8 Ogwu nriran ore ogwu mbem, ọmọ melek Awaji n̄a,
ọmọ okibem ebi Iferem;
ire, mîtip ufe iban ọmọ me otutuuk oniin̄ îkije;
ebi uwu Awaji kan̄ si mîkaan̄ ọmọ ochicha ejit me lek.
9 Ema mîbubuku idọk enenen,
kubọk ukot mgbọ ebi Gibiya ebubukube.
Awaji môkeek ijo irọrọ kiban̄,
mè isulu ema osusut ijo inu kiban̄.
10 “Mgbọ mweekbe ebi Ijeren imun̄,
ìbet lek m̀mun̄ gerep me emen èwê;
mgbọ mmun̄be ebi nte nte kinyi,
ìbet lek m̀mun̄ ayaya mfut uti figi òreren̄e me ibot mgbọ.
Ire, mgbọ ema enire lek Baali ebi Peyọ,
ema ewuwulu igọọk mkpọmfaka esip ya.
Sa me ikeya, ejit n̄a ojọjọ me lek kiban̄,
kubọk òchichaka inu ya ema emabe.
11 Umin ebi Iferem mônan̄a itele ema kubọk ofut owulu ifo;
imaman gwun̄, mè ikukup me owot,
mè ininin̄ owot, ìkpokup.
12 Ikerere ema ekpukpukpo bọn isibi,
mâkpan̄ otutuuk isan̄a, ge ìkposik inyi ema.
Môfieek inyi ema
mgbọ nsigwu ikom inan̄a itele ema!
13 Mmun̄ Iferem, ìbet lek ama Taya,
eyi òjaan̄ kubọk uti ewopbe me ata ijọn̄.
Ire, Iferem môsan̄a bọn kan̄ isibi igwook,
inyi ogwu òkpan̄ ene ikpan̄ isan̄a.”
14 Jei Okumugwem, nyi ema ma;
keke ke owu mônyi ema ni?
Nyi ema akpa gwun̄ òkiyaka owot isibi,
mè nyi ema nchiaak ebe.
Osusut Awaji osutbe ebi Ijeren
15 Okumugwem ìbe,
“Bak me lek inu ikpak cha ema erọbe me Giligan,
emi ǹchacha ema.
Bak me lek ijo irọrọ kiban̄ cha,
emi mâlilaba ema isibi me uwu n̄a.
Emi m̀kpayaka imun̄ ema me chieen̄;
otutuuk ebi ibot kiban̄ ekijeje ikeme emi.
16 Mîjijaka ebi Iferem isan̄a,
ugwun̄-ijọn̄ kiban̄ îchiaak ita,
ema kpeyaka ito mfut.
Ìrere ema emamaan̄ bọn,
emi mâkpaan̄ bọn cha ìsibi ema me owot,
ebi ema emabe cha.”
17 Awaji n̄a môjit ema,
mije ema ejitbe igbagban̄ utọn̄ inyi ọmọ.
Ema mêkititeek ikana
me etete ebi ofifi ido.