10
Ijeren îtibi igugọbọ ikana kubọk olik gerep ònwọnwọn lek,mè ito mfut kan̄ ideke me lek.
Ike mfut kan̄ owabe ire,
ikeya si ke înama ntook
mkpọmfaka kan̄ iwa ire;
ike ijọn̄ kan̄ osibibe inu ire,
ikeya si ke îbala ewuuk mfaka kan̄ ijaan̄ ire.
2 Ejit kiban̄ îfiaan̄ ema,
ema mêkwọọk ifin ema enebe.
Okumugwem môgbugbọ ntook kiban̄ cha,
mè ijijaka ewuuk mfaka kiban̄ cha.
3 Mgbọ ya, ema mêbe, “Eji kpekaan̄ ogwu ubọọn̄,
mije, eji kpetet ukpook me lek Okumugwem.
Ire, ikerere eji ekakaan̄ ogwu ubọọn̄ ya,
keke ke ìbokọt irọ inyi eji ni?”
4 Ikọ ikike ke ema ekitumu,
mè ikinyan̄a ibot ofiaan̄,
mè ikigọọk ebi ene ikaan̄ mgbaan̄-nchieek ataak;
eya orọ, oyerebet îwọọk isibi me agan̄ geelek,
kubọk ijo mbubet òtibi me uko ebakbe ijọn̄ ijaan̄.
5 Ebi ìluk me Sameria mêfieek owot
bak me lek mkpọmfaka gwun̄ eriembuuk eyi Bet Afen.
Ebi ìkiriaak mkpọmfaka ya
mêfieek ejit inyi mkpọmfaka ya,
ebi ngwugwa kan̄ mêkekiran mije kan̄,
mije, uja kan̄ ya òkitaan̄ etip ìkpoyaka ikup.
6 Mêben mkpọmfaka ya isa ifo Asiria,
isa isi inyi ikpele ogwu ubọọn̄ ido ya kubọk otitip mkpulu.
Ochak môchak Iferem,
esip môtet Ijeren bak me lek mkpọmfaka uti kan̄ cha.
7 Sameria melek ogwu ubọọn̄ kan̄ mête isibi,
kubọk uwu nkirika ote me isi mun̄.
8 Isi-ijọn̄ ekisa irọ inu ikpak cha,
òrere ijo inu ebi Ijeren erọbe,
mêgbugbọ igwook.
Ukpak mè abọm egbe môtibi isibi,
mè ikana ntook cha ichit bùk.
Mgbọ ya, ema mêtumu inyi ebi kè ogoon̄ ibe,
“Ìkana ìchit eji ma!”
mè ibe ebi kè orioon̄,
“Ìrọn̄ ìkeme eji ma!”
9 Enyi ebi Ijeren, karake inu enyi erọbe me Gibiya,
enyi ekup me lek irọrọ ijo inu;
emen ijo yaage si ke enyi ekup.
Ìre akọn̄ ìkarie ebi ìrọrọ ijo inu ya me Gibiya?
10 Mgbọ isikem emi me lek, mâsulu enyi osusut;
mâgbaan̄ ebi ofifi ido ititiin̄
isa initim enyi akọn̄ me lek,
mè isa inibọp enyi,
mije ogbogbo ijo inu enyi erọbe.
11 Iferem ìre gwun̄ uman eriembuuk ekpukpobe,
òmama ijajak akpa igen̄;
eya orọ, mâkwaan̄ ọmọ ọgbọn
me ujuja ebek kan̄ ya.
Mâkọp ebi Iferem ije kubọk inyinya,
ebi Juda mêdut okwukwut ibak ijọn̄ uko,
ebi kè Jekọp mêkekibak ijọn̄.
12 Ìwop ata irọrọ kubọk mfut ìnyi lek kinyi,
inyi enyi erọkọ imumechieen̄.
Ìbak unye ijọn̄ eyi ejit kinyi cha ònyenye;
mije, mgbọ iweweek Okumugwem îre,
inyi mônu,
mè inigwook ata irọrọ kan̄ kubọk ibot inyi enyi.
13 Kpan̄asi ikeya, inu ikpak ke enyi ewop,
mè irọkọ ijo inu,
enyi mîrie mfut ònan̄a me lek ofiaan̄.
Mije, enyi esa unye kinyi,
mè owuwa ebi akọn̄ kinyi itoon̄ ejit.
14 Okput akọn̄ môkput inu me lek ebi kinyi,
mêgwagwak otutuuk uwu mgban akọn̄ kinyi igwook,
kubọk Saliman ogwakbe ama
Bet Areben igwook me usen akọn̄,
mgbọ etọọn̄be uga ikpukpuku ikeme nsabọn kiban̄.
15 Enyi ebi Beten, ubọk ìborọn̄ inyi enyi ire eya,
mije, inu ikpak kinyi îmin igana.
Egwe usen ya isiwele,
me atikọ, ebekpakpan̄ ogwu ubọọn̄ ebi Ijeren.