Awaji îma ebi Ijeren
11
Okumugwem ìtumu ibe,“Mgbọ Ijeren orebe sọntiik gwun̄, emi mma ọmọ,
me Ijipiti ke ngwen gwun̄ n̄a enerieen̄ yi isibi.
2 Ire, ike nkigwen ema,
ikeya ke ema ekikpebe lek ijọn̄ọ ere me lek n̄a.
Ema mîsi ikigwa ngwugwa inyi Baali,
mè ikiwọp nsensi inyi mkpọmfaka.
3 Îre emi ntet ebi Iferem me ubọk
isa ema ijeen̄ ubọk ekije ije.
Emi ngwa ema,
ire, ema kperiọọn̄.
4 Ata ejit mè imumechieen̄ ore olik
nsabe itobo ikana ema ikidut ije.
Emi njene ọgbọn usun̄ isan̄a me ebek kiban̄,
mè igele lek isiki inyi ema inorie.
5 “Ire, ema mîjit igwugwu ikom inu me lek n̄a.
Eya orọ, ema mêgwu ikom ifo Ijipiti,
ebi Asiria ebere ubọọn̄ inyi ema.
6 Oge akọn̄ mômumen ikana ama kiban̄ geelek,
mêfaan̄ olọkọrọ okwukwut
otunchit kiban̄ igbugbọ igwook,
mè irọ ibe ijo otitọt kiban̄ cha itip.
7 Ebi n̄a mîrọ inye ibe ema mênan̄a itele emi.
Ikerere ema egwegwen Ogwu Òbebene Ichit,
ìkpojibi ema ibene.a
8 “Ebi Iferem, m̀bajeje ikọt ijuuk enyi itele ni?
Ebi Ijeren, m̀bajeje ikọt iyaka enyi inyi ni?
M̀bajeje irọ enyi me lek kubọk ebi Adima?
M̀bajeje irọ enyi ekup kubọk ebi Seboyim?
Ejit n̄a îgwu ikom me emen n̄a,
ejit nsan n̄a îbene emi me lek.
9 M̀kparọ ubọk uyok unaan̄-ejit n̄a odobe,
m̀kpayaka ijijaka si Iferem.
Mije, emi Ogwu Mbuban òkup me etete kinyi,
emi ìre Awaji, ǹkare ebilene;
emi m̀kpasa me uyok unaan̄-ejit inin̄ ama inijijaka.
10 “Ema mêje igọọk Okumugwem;
Okumugwem môgbin kubọk egbe àtat.
Mgbọ isigbin,
bọn kan̄ mênan̄a me agan̄ ichep-ura ikiran ikinu.
11 Ema mênan̄a me Ijipiti ikiran ikinu kubọk ebi kè ofut,
mè inan̄a me ido Asiria ikinu kubọk ekerekwukwu.
Emi mânenisun̄ ema me uwu kiban̄.
Emi Okumugwem ntumu.”
Ijo inu ebi Ijeren erọbe
12 Ebi Iferem mîkan̄ ataak ikana emi okokop,
ebi uwu kè Ijeren mîsa ofiaan̄ ikana emi.
Ebi Juda ekije melek Awaji,
mè ikeke inye melek Ogwu Òkup Mbuban.b