12
Ebi Iferem ekirie efet;usen geelek ekilibi igọọk efet agan̄ mbum-ura,
mè ikirọ ibe ataak mè inu afa ikimumana.
Ema mîgọọk ebi Asiria ikaan̄ mgbaan̄-nchieek,
mè ikiria aran̄ olifu ijet me Ijipiti.
2 Okumugwem îkaan̄ ikọ ikeme ebi Juda;
mônyi ebi kè Jekọp osusut ikpọ me lek oniin̄ ema ekije,
mè ikpe ema mkpukpe ikpọ me inu ema erọbe.
3 Jekọp ìtetet ogwu ngwan̄ ibot ukot me emen owot;
mgbọ îminbe inin̄ ene, igọgọọk Awaji itọ lek.
4 Îtọ lek me lek ogwu osat Awaji, mè inye lek igak;
îto ito, mè iriaak ibe ogwu osat ya igbana ọmọ.
Me Beten, îchichini melek Awaji,
mè ikpa ikọ melek kan̄.
5 Ire, Okumugwem, Awaji Ogwukaan̄ Inyọn̄ mè Ijọn̄;
Okumugwem ore erieen̄ kan̄ ya òkitaan̄ etip!
6 Ire enyi, ìgwu ìkom ìna me lek Awaji kinyi;
ìtet imumechieen̄ mè unen oyerebet ìnye,
mè ìkup ìkikpọ Awaji kinyi mgbọ geelek.
7 Ema ìre ikpele ebi ewe, ebi otitọ ngan okupbe me ubọk,
ebi ifefeen̄ ene okitop me lek.
8 Iferem ìkigugo lek ibe,
“Emi mbọọn̄ ubọọn̄, emi nkaan̄ ikpoko.
Me otutuuk kwulukwulu geelek
nkwukwulube isa ibọọn̄ ubọọn̄,
kpunu ogwu òbomun̄ emi nlilọ inu
mè ìyaka ire ijo inu geege me emen.”
9 “Ire, emi nre Okumugwem Awaji kinyi,
karake mgbọ enyi ekupbe me ijọn̄ Ijipiti.
Emi mârọ enyi ekpọk eluk me uwu ọfọ,
kubọk enyi ekiluk me usen ijọk ibot mgbọ cha.
10 Ntumu ikọ inyi ebi nriran;
emi me lek n̄a nnyi ema owuwa ilaak ọkpọchieen̄,
mè itumu ikọ me urọk itibi ema ijet enyi.”
11 Ire, ijo irọrọ ìjojot Giliadi;
ebi ama ya kpekukup me lek inu geege.
Me Giligan, ekisa owuwa
orie eriembuuk igwa ngwugwa;
ntook ngwugwa kiban̄
ìgbagban kubọk èdọ ewuuk
òkup me uko ebakbe ijọn̄.
12 Jekọp ìlilibi ifo agan̄ ijọn̄ Aram;
me ere ya, ọmọ, Ijeren, îsi ikwaan̄ bak me lek nwa,
îkpukpo arọọn̄ kubọk mkpukpe ibot nwa.
13 Okumugwem ìsa ogwu nriran
isan̄a Ijeren isibi me Ijipiti,
mè isa si ogwu nriran ikpọ Ijeren chieen̄ me lek.
14 Ire, Iferem îrọ inyi ejit inaan̄ ọmọ ujat ujat;
eya orọ, Ogwukaan̄ kan̄ môyaka eje ene
ọmọ ofiatbe itoon̄ ọmọ me ibot,
mè ikpe ọmọ useen̄ unyechieen̄ kan̄ înyebe.