Awaji môsibi oyerebet me ibot ebi ido geelek
3
“Me usen cha, me ibot mgbọ ya,mgbọ mâyakabe inu ubọọn̄ ebi Juda
mè ebi Jeruselem inyi ebikaan̄,
2 emi mâtitiin̄ ebi ido geelek,
mè isa ema isibi inu me lek iteke ijọn̄ Jiosefat.a
Ere ya ke mbasibi ema oyerebet me ibot
ofolek inu ema erọbe ebi Ijeren,
ìrere ebi n̄a mè ìrot n̄a.
Ema mîchon ebi n̄a itọọn̄ ikana me ofifi ofifi ido,
mè ibak ijọn̄ n̄a iche inyi lek kiban̄.
3 Ema eroon̄ nriroon̄ isa iche ebi n̄a inyi lek kiban̄,
mè isa bọn ebirieen̄ inwene ebi òje oyet,
mè isa bọn ebibaan̄ inwene miin̄,
inyi ema mênwọbe isa.
4 “Enyi ebi Taya mè ebi Sidọn, mè otutuuk kinyi ebi lek ijọn̄ Filisia, keke ke enyi ekaan̄ melek n̄a? Ìre îkaan̄ inu nrọbe enyi, eyi enyi eberọ emi useen̄ ni? Ire useen̄ ke enyi eberọ emi, emi m̀babeben si useen̄ inu enyi erọbe emi igwook enyi me ibot ugwat ugwat. 5 Mije, enyi mîkpulu alata okuket n̄a mè alata araran̄ n̄a ifon, mè ikwọọk inu unye otu ewe n̄a echi ònwọnwọn ichit isa isi igwook me uwu yọk kinyi. 6 Enyi mînyam ebi Juda mè ebi Jeruselem inyi ebi Giris, ufuna enyi eto ema ejọn̄ọ ere me lek ido kiban̄.
7 “Ìkpọ, mâsan̄a ema isibi me ere enyi enyambe ema itap, mè ikana inu enyi erọbe ema ikwaan̄ enyi me ibot. 8 Mânyam bọn ebirieen̄ kinyi mè bọn ebibaan̄ kinyi inyi ebi Juda, ebi Juda mênyanyam ema inyi ebi Saba, ebi ido ìjọjọn̄ọ ere. Emi Okumugwem ntumu.”
9 Ìlook etip keyi ìkana me ido geelek ibe,
“Ìbem lek akọn̄!
Ìriki ebi usọ akọn̄!
Ema otutuuk ebi akọn̄ egele egbet, mè ejibi enin̄.
10 Ìbọn̄ orọk kinyi ìkana oge akọn̄,
mè ibọn̄ si oge enyi ekisa
ikpaan̄ lek uti ikana otunwa.
Kè ogwu ukpook owot itumu ibe,
‘Emi nnye lek!’
11 Enyi ebi ido geelek òkukup ikana agan̄ geelek,
ìgwat lek ìna,
mè ìnititiin̄ me emen iteke ya.”
Jei Okumugwem, ria ebi usọ akọn̄ kwun̄ gwook!
12 “Kè ebi akọn̄ ido geelek ebene lek,
mè esibi enu me iteke ijọn̄ Jiosefat,
mije, ere ya ke emi mbakup
isibi oyerebet me ibot ebi ido geelek me agan̄ geelek.
13 Ìsa oge isọp akpa ìnisọp akpa,
mije, inu uko îren̄e isan̄a kpai.
Ìna, ìnijak gerep ìkpukpuku,
mije, ere ichimi miin̄ îjot;
ogbokot miin̄ îjot ifin;
mije, inu ikpak ife cha erọbe îmin enenen!”
14 Utut ene utut ene
òwa ejotbe me emen iteke Ifieek-oyerebet!
Mije, usen oyerebet Okumugwem
me emen iteke Ifieek-oyerebet îgbet!
15 Ura melek onyan̄ mêgwu ikom idun,
ebi kè ntoronyan̄ kpebeyaka itoon̄.
16 Okumugwem môkup me Sayọn ikigbin,
mè ikup me Jeruselem ikigbugbut;
inyọn̄ me ijọn̄ môkekisisik.
Ire, Okumugwem môre ere ilet-lek inyi ebi kan̄,
môre okwukwek akọn̄ inyi ebi Ijeren.
Ugbana òbokup inyi ebi eyi Awaji
17 “Mgbọ ya, enyi ebi Ijeren
mêneniriọọn̄ ibe ke emi, Okumugwem Awaji kinyi,
ǹluk me Sayọn, ogoon̄ mbuban n̄a.
Jeruselem môkup me mbuban;
ebi ichen kpebeyaka ikpọk inu akọn̄ me lek kan̄ ofifi.
18 Me usen ya, aya miin̄
môkigbọọk me lek ogoon̄ igwook,
mun̄ ebe môkekigbuk me lek orioon̄ isibi;
mun̄ môkekigbuk me okolo geelek me Juda.
Ogbuuruk môkekigbuk mun̄
isibi me Uwu Mbuban Okumugwem,
mun̄ ya môgbugbuk isi ireke iteke ijọn̄ Uti Akasia.
19 “Ire, Ijipiti môkana ere eyatbe itele,
Edọm môkakana èwê òkup ukpọk ukpọk,
mije inu afa ema erọbe ebi Juda,
bak me lek ema egwookbe eje ebi Juda,
ebi kpelọ inu geege, me ijọn̄ kiban̄ gaalek.
20 Ebi ene mêluk me Juda ire mgbọ geelek,
mè iluk me Jeruselem ire ukot geelek.
21 Mâtele nrọ-nlọ ebi n̄a erọbe;
ire, eje kiban̄ efiatbe, emi m̀kpatele.b
Emi Okumugwem ǹkiluk me Sayọn.”