Ilaak ọkpọchieen̄ eyi akaka ituuk
7
Ogwukaan̄-ene Okumugwem îjeen̄ emi inu me ilaak ọkpọchieen̄. Me ilaak ya, mmun̄ Okumugwem okineen̄ lek iraria urum akaka ituuk igwook ichit lek ijọn̄. Îre me mgbọ erọkọbe inu echi ogwu ubọọn̄ isan̄a. Mgbọ ya, inu echi ewopbe mgburudun̄ îbene ikititibi. 2 Akaka ituuk cha îtaka njijoon̄ inwaan̄ geelek me lek ijọn̄ ya isan̄a. Mgbọ ya ke emi ntaan̄ ukpo ibe, “Ogwukaan̄-ene Okumugwem, soso, tele nyi ebi kwun̄ ma! Jekọp misip ma! Ìborọrọ ikọt ikeke ni?”3 Okumugwem onenitele irọrọ inu ya, mè initumu ibe ke inu ya ìkpobọkọ irek.
Ilaak ọkpọchieen̄ eyi ukan̄
4 Okumugwem onenijeen̄ emi ofifi ilaak ọkpọchieen̄. Mmumun̄ Ogwukaan̄-ene Okumugwem okibem lek isasa ukan̄ isibi oyerebet. Ukan̄ otataka mun̄ ichiaak me ugwuuk okwaan̄, mè itaka si inyọn̄ ijọn̄. 5 Mgbọ ya, emi ntataan̄ ukpo ibe, “Ogwukaan̄-ene Okumugwem, soso, tet kaan̄! Jekọp misip ma! Ìborọrọ ikọt ikeke ni?”
6 Okumugwem onenitele irọrọ inu ya, mè initumu ibe ke inu keya si ìkpobọkọ irek.
Ilaak ọkpọchieen̄ eyi otitọ itọ-inu-itat
7 Okumugwem onenijeen̄ emi ofifi ilaak ọkpọchieen̄. Mmumun̄ Ogwukaan̄-ene okekebe me agba lek mgban esabe otitọ itọ-inu-itat itọ itat, mè inama. Îkaan̄ si otitọ itọ-inu-itat me ubọk kan̄. 8 Okumugwem onenido emi ibe, “Emọs, ìre keke ke omun̄?”
Mfọfọọk ibe, “Îre otitọ itọ-inu-itat.”
Ogwukaan̄-ene obebe, “Kpọ, mâsa otitọ yi itọ ebi n̄a, ebi Ijeren, ikpọ mè ìre ema mîtat. M̀kpayaka ikpọk itele nrọ-nlọ kiban̄ cha ofifi.
9 “Mêjijaka isi-ijọn̄ cha bọn kè Ajiki enamabe isan̄a,
mè ikpukpuku ere mbuban ebi Ijeren cha igwook.
Mâsa oge akọn̄ ikpan̄ ebi uwu kè Jerobuwam isan̄a.”
Amajiya ìkachieek Emọs iben nriran
10 Mgbọ ya, Amajiya ogwu ngwugwa me Beten oneniria etip ijet Jerobuwam ogwu ubọọn̄ Ijeren ibe: “Emọs ìkup me etete ebi Ijeren ikitọt otitọt mkpa ikeme owu. Ebi ido kiji kpeyaka ikọt ime otutuuk ikọ kan̄. 11 Mije, Emọs ìtumu ibe kè Jerobuwam môkwu me otu oge akọn̄, ke ìkpolọlọ mêkpulube ebi Ijeren me akọn̄ isan̄a me inyọn̄ ijọn̄ kiban̄.”
12 Amajiya onenitumu inyi Emọs ibe, “Ogwu òmun̄ ilaak ọkpọchieen̄, je nan̄a me ere keyi! Gwat lek libi fo ido Juda si week owot kwun̄ me ere keya, mè kup me ere keya ben nriran. 13 Kayaka ìben nriran me Beten, mije îre ere mbuban ogwu ubọọn̄, mè ire si uwu mbuban ebi ido.”
14 Emọs ofọfọọk Amajiya ibe, “Emi ǹkare ogwu nriran, ǹkarere si gwun̄ ogwu nriran. Emi ìre ogwu òkpukpo arọọn̄, mè ogwu òkibala lek uti sikamọ. 15 Ire, Okumugwem onenimọnọ emi isan̄a me ikpukpukpo arọọn̄, mè itumu inyi emi ibe, ‘Je, si ben nriran nyi ebi n̄a, ebi Ijeren.’ 16 Eya orọ, mgbọ keyi, gban̄ ikọ Okumugwem. Owu obe emi,
“ ‘Kayaka ìben nriran ìkeme ebi Ijeren,
kayaka ìtumu ikọ ìkeme ebi uwu kè Ajiki.’
17 “Eya orọ, Okumugwem ìtumu ibe ikeyi:
“ ‘Nwa kwun̄ môkije oyet ikana ama,
bọn kwun̄ ebirieen̄ mè ebibaan̄
mêkwaan̄ ita me otu oge akọn̄.
Ofifi ife ebesa olik itọ ijọn̄ kwun̄ iche inyi lek kiban̄;
owu me lek kwun̄ môkup me
ido ebi kperiọọn̄ Awaji ikwu.
Kpebelọlọ ikpukpulu ebi Ijeren me akọn̄
ijọn̄ọ ere me lek ijọn̄ ama kiban̄.’ ”