Mkpulu Okumugwem eyi òkup me isi
4
Me mgburudun̄ usen cha,ogoon̄ Uwu Mbuban Okumugwem môkeke inye,
mè ikana ere ibot me lek otutuuk ogoon̄ geelek;
mêbene ọmọ ifo inyọn̄ igak otutuuk orioon̄ geelek;
me mgbọ ya, ebi ife geelek mêkigbuku inu me lek kan̄.
2 Owuwa ido mênu lek kan̄, mè ikibe,
“Ìna, mè eji enene esi lek ogoon̄ Okumugwem,
esi Uwu Awaji kè Jekọp.
Ọmọ môjeen̄ eji oniin̄ kan̄,
inyi eji ekeje me oniin̄ kan̄.”
Mije, Ikan Okumugwem ìbonan̄a me Sayọn isibi,
ikọ Okumugwem ìbonan̄a me Jeruselem.
3 Ọmọ môsibi oyerebet inyi owuwa ido,
mè iteek gọlọgọlọ me etete ebi
ido ebi ìnyenye lek ìkup me
mgbet ere mè ujọn̄ọ ere.
Ema mêbọn̄ oge akọn̄ kiban̄ ikana orọk,
mè ibọn̄ otunwa kiban̄ ikana oge ekisa ikpaan̄ lek uti.
Ido ìkpoyaka iben oge akọn̄ isi lek ofifi ido,
ema kpebeyaka ikween̄ akọn̄ ofifi.
4 Ene geelek môkup me irak olik gerep kan̄,
mè ikup me irak uti figi kan̄;
kpunu ogwu òboyaka irọ ema efieek owot,
mije, îre Okumugwem
Ogwukaan̄ Inyọn̄ mè Ijọn̄ me lek kan̄ otumu.
5 Ebi ife geelek, ogwu ikup,
ìkitọbọ ebum me erieen̄ awaji kiban̄;
ire, eji ebetọbọ ebum me
erieen̄ Okumugwem Awaji
kiji mege ire mgbọ geelek, mgbọ geelek.
6 Okumugwem ìbe,
“Me usen ya, emi mâkpulu ebi akọọk ititiin̄,
mè igbaan̄ ebi elilababe isibi me ama kiban̄ ititiin̄,
mâtitiin̄ si ebi emi ntapbe ufialek me lek.
7 Mâsa ebi akọọk irọ ebi ìsisik,
mè irọ ebi elilababe isibi ekana ido ònyenye lek.
Emi Okumugwem mânenikup me ogoon̄ Sayọn ikikpulu ema,
bene me usen ya mege si ire mgbọ geelek.
8 Ire owu, Jeruselem, ogwu òkup
kubọk uwu-oket ekikup ikpọ urum arọọn̄,
owu, òrere ogoon̄ ama Sayọn,
owu môyaka ikpọk ikana ama ibot kubọk mgbọ òraraka;
irek ibot mkpulu kwun̄ ya
môyaka ikpọk inin̄ owu ubọk.”
9 Mgbọ keyi, keke orọ okitaan̄ ukpo unye unye?
Ìre òkakaan̄ ogwu ubọọn̄ ni?
Ìre ogwu nteme kwun̄ ìkwukwu ni,
eyi owu okifiak ikeyi kubọk uman ofiak nwa-owot?
10 Jei Sayọn, yiyọọk, mè taan̄ ukpo,
kubọk nwa-owot uman okifiak;
mije, mgbọ yi, owu môtele ama isi iluk me emen oron.
Owu môfo Babilọn, ire,
mênyan̄a owu isibi me ere ya.
Okumugwem môfaka owu isibi me ere ya,
isan̄a me ubọk ebi ochicha kwun̄.
11 Mgbọ keyi ebi owuwa ido mîgbaan̄ ititiin̄,
mè igbaan̄ itọt inenirọ ikeme owu.
Ema ebe, “Eji esi echaka
mbuban me lek ama Sayọn,
inyi eji emun̄ irọn̄ kan̄, mè echak ọmọ!”
12 Ire, ema kperiọọn̄ ejit Okumugwem,
otitọt kan̄, ema kpekọt igobo itet;
ema kperiọọn̄ ibe ke ìtitiin̄ ema kubọk akpa,
ebesa isi igwook me ere igen̄ akpa.
13 Jei Sayọn, nan̄a keke jak akpa kpukpuku;
mije, mârọ owu ònye lek
kubọk eriembuuk òkaan̄ iko eyi okwukwut,
mè ikpa ukot anam eyi ekwe;
inyi owu òjak owuwa ido òkana okpọkọ okpọkọ.
Enyi mêyaka inu ema
efumbe me ngan inyi Okumugwem,
mè isa inu ubọọn̄ kiban̄ inyi
Ogwukaan̄ otutuuk linyọn̄.