Me emen ikpa yi, Nawum, ogwu nriran, ìtumu ibe ke Okumugwem mônifieek unen oyerebet itip ido Asiria, mè isulu ema osusut, mije inu ikpak ema erọbe ebi ofifi ido. Ebi Asiria mîwuwuuk lek ire ebi ochicha ebi Ijeren karake ukot ukot. Sabum akọp cha go oniraka me lek nriran kè Nawum, inu ya îtumube orọrọ si iso, ido Asiria ojijijaka, Ninife ama ibot ido ya ochechep dìp dìp.

Sa me lek nriran yi, Nawum îjeen̄ si ibe ke oniin̄ ge me lek oniin̄ Okumugwem okisa ijeen̄ ejit nsan kan̄ me lek ebi kan̄ ìre isusulu ebi ochicha kiban̄, kubọk Asiria, osusut, mè isa me ikeya isan̄a ebi kan̄ isibi me irak ubọk kiban̄, inyi ebi kan̄ ekup me utelelek.

Oyerebet yi Awaji ofieekbe itip Asiria melek Ninife, ama ibot kan̄, ìkijeen̄ ibe, me mgbọ keyi si, ke Awaji òkifieek oyerebet itip ijo linyọn̄ keyi.

Etip òkup esese me emen ikpa yi ìre ke Awaji ìkpotele ibe mkpaka-ibot, mè unye-ibot, mè nlilọ oyerebet, mè mfeen̄, ikpọkpọ ikije ifo isi. Ìkijeen̄ si ibe ke Awaji, ogwu òkup mbuban, ogwu òkikpulu otutuuk linyọn̄, ìbosusulu ebi ìkirọ inu ikpak chi ikpele ujat ujat osusut ubọk îgbebe.