Ikpa Jona înwene me lek ofifi ikpa ebi nriran, mije, otu ikọ ge gaalek ke Jona ogwu nriran otumu, òrere, “Ninife ìbochechep! Akọp usen ini gaalek osik!” (3:4). Ire, ikpa yi ìkpa mfufuk ubọk Jona okpakabe ibot inyi Awaji, mè ijit isisi itaba ebi ama Ninife ubọk me utọn̄, ibe ke Awaji mônijijaka ama kiban̄ igwook. Jona me lek kan̄ ìweweek ibe ama Ninife ijijaka, mije, îre ama ibot ido Asiria, ujat ujat lek ebi ochicha ebi Ijeren karake ukot ukot. Ire, Okumugwem otetet ọmọ me ubọk unye, isisi itumu ikọ ya inyi ebi ama Ninife. Ebi ama ya egwugwu ikom, Awaji otetele ubọk, ìkayaka ìchep ama ya.

Inu òkigwat lek inin̄ ene ejit mgbọ ekifuk ikpa yi ìre mfufuk eyi irin̄ ile omenbe Jona. Ire, ikpa yi ìkijeen̄ ibe ke Awaji okaan̄ otutuuk unye me lek otutuuk inu geelek îrombe. Ògak ge, îjeen̄ ibe ke Awaji ìre ogwu imumechieen̄ mè ogwu ejit nsan, ogwu òmama itetele ijo inyi ene, igak isusulu ene osusut.