Obidaya
1
Eyi ìre ilaak ọkpọchieen̄ eyi Obidaya omun̄be.Inu Ogwukaan̄-ene Okumugwem otumube ibak ebi ido Edọm ìre ikeyi:
“Eji mîbọkọ etip ònan̄a me ubọk Okumugwem inu;
mîria ogwu ikwaan̄ ibe isi
ilook otutuuk ebi ido geelek ibe,
‘Ìnan̄a ìkeke, mè eji ejibi akọn̄ esi lek ebi Edọm!’ ”
2 Okumugwem onenitumu inyi ebi Edọm ibe,
“Ìkpọ, mârọ inyi enyi esiki enenen
me chieen̄ ebi ido geelek;
mêkpọ enyi chieen̄ isiki enenen.
3 Ugumulek òkup enyi me ejit îfiaan̄ enyi,
enyi ekiluk me emen udọn̄ me lek ewuuk,
mè isa inyọn̄ ubene ogoon̄ irọ ere nluk kinyi,
mè ikisa me ikeya ikitumu me ejit kinyi ibe,
‘Ìre ekene obokọt isan̄a eji inito me ijọn̄?’
4 Ikerere òwuwulu ichep me akpabin inyọn̄ kubọk igo,
ikerere ònanama uwu kwun̄ me etete ebi kè ntoronyan̄,
emi mâtọp owu me ere ya itọbọ ikaak me ijọn̄.
Emi Okumugwem ntumu.
5 Ire ebi inọ inu enyi me lek,
mè ìre ebi inọ afa enu me eririeen̄,
ema ebechiin̄ oke inu echi ejit kiban̄ otọbe.
Ire ebi ìkigbeme gerep inu enyi me lek,
ema kpebelọlọ igbegbeme isik echi ekirọrọọn̄.
Ire, ebi ochicha kwun̄ ebechachan owu irak.
6 Jei, Isọ,a ebekwọkwọọk owu irak;
otutuuk inu ubọọn̄ kwun̄ cha oletbe,
ebewọwọlọ iweek imun̄, mè ikpulu isa ifon.
7 Otutuuk ebi melek kinyi erebe ebon ge
mêrieen̄ enyi isibi isi igwook me oke ijọn̄ kinyi;
ebi melek kinyi elukbe me esuuk mêfiaan̄ enyi ifiin̄,
mè itim ikpan̄ enyi;
ebi ìkirie inorie kinyi mêtip ufe ikana enyi,
ire, enyi kpeberiọọn̄.b
8 “Emi Okumugwem ntumu ibe, me usen ya,
emi m̀bajijijaka ebi ìriọọn̄ inu isan̄a me Edọm,
mè ijijaka si ebi ìkaan̄ ngobo-ntet
isan̄a me inyọn̄ ogoon̄ kè Isọ.
9 Jei, ama Teman, ukpook mônin̄
igon me lek ebi akọn̄ kwun̄,
ebi geelek ìluk me lek ogoon̄ kè Isọ,
ebesọsọp ema ikpan̄ isan̄a.”
Inu òrọrọ ebesulu ebi Edọm osusut
10 “Mije inu afa owu orọbe me lek ngwan̄ kwun̄ Jekọp,
esip môchit owu isi;
mêjijaka owu isan̄a ire mgbọ geelek.
11 Usen ya, owu òkeke nsọn nsọn me usaba agan̄,
mgbọ ebi ichen ekikwọọk inu ubọọn̄ kè Jekọp isibi ifon,
mgbọ ebi ofifi ido etibibe iraka inin̄ otunchit kan̄,
mè iroon̄ nriroon̄ isa iche Jeruselem inyi lek kiban̄,
owu òkup kubọk ene ge me lek ife cha.
12 Owu kpomokeke nsọn nsọn
ikikpọ ngwan̄ kwun̄ me ubelejit,
me usen ijo isi otoon̄be ọmọ;
owu kpomonwọọn̄ unwọọn̄ me ibot ebi Juda
me usen mfufiat onin̄be inyi ema;
owu kpomotumu otu ile ikeya inyi ọmọ,
me usen ufialek otetbe ọmọ.
13 Owu kpomoje itibi inin̄ otunchit ebi n̄a,
me usen ùrioon̄ otoon̄be ema;
owu kpomokeke nsọn nsọn
ikikpọ ema me ubelejit
me emen ujaralek kiban̄,
me usen ufialek okemebe ema;
owu kpomofum inu ubọọn̄ kiban̄
me usen jakajaka otoon̄be ema.
14 Owu kpomokeke me ugwaka oniin̄
ikikpan̄ ebi kiban̄ ìlilibi inwọnọ;
owu kpomotet ebi kiban̄ ìsisik
isa iyaka itap me ubọk ebi ochicha,
me usen ufialek otetbe ema.
Usen Oyerebet Okumugwem
15 “Usen oyerebet Okumugwem îkup mgbet
inyi otutuuk ebi ido geelek.
Ubọk owu orọbe inyi ofifi ene, ikeya ke mêrọ inyi owu;
inu owu orọbe môgwu ikom initoon̄ owu me ibot.
16 Ike enyi emeen̄be ebi n̄ac me inyọn̄ ogoon̄ mbuban n̄a,
ikeya si ke otutuuk ebi ido
geelek ebekinwọ miin̄ unaan̄-ejit n̄a;
ema mênwọ mè ikimeen̄,
mè ikwaan̄ ichep dìp dìp kubọk ema kperarak ikup.
Ebi Ijeren mêtim ikpan̄
17 “Ire, me ogoon̄ Sayọn,
unyan̄a môkup inyi ebi ìnwọnwọnọ;
ogoon̄ ya môkup me mbuban;
ebi owot iman kè Jekọp
mêbọkọ ìrot kiban̄ ikaan̄.
18 Ebi uwu kè Jekọp mêkup kubọk ukan̄,
ebi uwu kè Josefu mêrere alọm ukan̄;
ebi uwu kè Isọ mêre mfurufu,
mêchim ukan̄ itap me lek kiban̄,
mè iwọp ema itaka iriọk.
Kpunu ene geege òbonwọnọ me uwu kè Isọ.
Emi Okumugwem ntumu.”
19 “Ebi emen èwê agan̄ osiki
mênenibọkọ ogoon̄ kè Isọ me ìrot;
ebi inyọn̄ orioon̄ isi ogoon̄ me agan̄ ichep-ura
mênenibọkọ ijọn̄ ebi Filisia.
Ema mêluk me lek oron ebi Iferem,
mè iluk si me lek oron ebi Sameria,
sà ebi uwu kè Benjamin ebebọkọ Giliadi me ìrot.
20 Urum ebi Ijeren keyi ekpulube me akọn̄ isa ifo Kenan,
ebekaan̄ otutuuk ijọn̄ ido ebi
Fonisia isi igwook me Jerefat;
sà ebi ekpulube me akọn̄ me
Jeruselem isa ifo Sefaradi,
ebebọkọ ama echi òkup me
emen èwê agan̄ osiki cha me ìrot.
21 Ebi ìnyan̄a ene mêneninene isi ikup me ogoon̄ Sayọn
ikikpulu lek ogoon̄ kè Isọ.
Mgbọ ya, irek mkpulu
mônenikana ire eyi Okumugwem.”