Ikọ Okumugwem okaan̄be me lek ebi Ijeren
6
Ìgban̄-nu inu Okumugwem okitumu:“Ìnan̄a ìkeke, ìkup me isi ogoon̄ ìkpa otu ikọ eyi kinyi,
mè orioon̄ igọọk inọ inu enyi ebetumu.
2 Enyi ebi kè ogoon̄, ìgban̄ otu ikọ Okumugwem;
enyi ọdọ linyọn̄ òbokup ire mgbọ geelek, ìnọ.
Mije, Okumugwem îkaan̄ oyerebet melek ebi kan̄,
môkpa ibot ikọ îsabe itet ebi Ijeren.
3 “Enyi ebi n̄a, ìre keke ke nrọ enyi?
Ìre kpa ubọk ke nsa itap enyi uwọ-lek ni? Ìtumu-nu.
4 Emi nsan̄a enyi me Ijipiti isibi,
mè isan̄a enyi me uwu usun̄ isibi;
mè iria Mosis mè Erọn mè Miriam,
ibe esa enyi eje.
5 Enyi ebi n̄a, ìkeek-nu
inu Balak ogwu ubọọn̄ Mowabu otọtbe,
mè inu Balam gwun̄ kè Beyọ ofọọkbe ọmọ.
Ìkeek ije kinyi bene me Sitim na re Giligan,
inyi enyi mêriọọn̄ ata irọrọ eyi Okumugwem.”
Inu Awaji okiweek ibe ebi kan̄ erọ
6 Ìre keke ke mbasa inu me isi Okumugwem mọnọ,
mè initọbọ ibot me isi Awaji òbebene?
Ìre m̀basa ngwugwa ewọwọp inu me isi kan̄ mọnọ?
Sà ìre bọn eriembuuk òsoso
acha ge ke mbasa inigwa ngwugwa ya mọnọ?
7 Ìre Okumugwem môma ire nsa obop obop orie arọọn̄,
melek akọp akọp obop ogbokot aran̄ inu ni?
Ìre m̀basasa adasi gwun̄ enerieen̄
n̄a inyi ọmọ me ibot nrọ-nlọ n̄a mọnọ?
Ìre mfut òsibi me lek n̄a yi ke
mânyi mije ijo inu eyi ibot n̄a ni?
8 Jei ogwu ebilene, Okumugwem îjeen̄ owu inu ònwọnwọn.
Keke ke Okumugwem oweek owu me ubọk?
Îre irọrọ inu ònenen, mè imama ejit nsan,
mè isisiki lek igọọk Awaji kwun̄ igbaan̄ ikije.
9 Okumugwem òkitaan̄ ukpo igween̄ ebi ama.
Ogwu ikaan̄ ata iriọọn̄-inu,
itet ukpook me lek erieen̄ Okumugwem.
Okumugwem ìkitumu ibe,
“Ìgban̄ utọn̄ me lek njijan̄ esabe isulu enyi,
mè ìgban̄ utọn̄ si ìnyi ogwu òsasa njijan̄ ya inu.a
10 Ìre inu ubọọn̄ cha ekpulube me ngan,
mè asasa okwun itọ-inu cha echi òrere mbuban inu,
ọmọ òwa si me uwu ogwu ikpak okupbe?b
11 Ogwu òkitọ inu ngan ngan,
mè ikinyam inu ikaloboge ìkem inyi ene,
ìre m̀mọnọ ene ya kubọk ogwu ata ene ni?
12 Ebi ìbọbọọn̄ ubọọn̄ me ama kinyi ìre ebi afa,
ebi ìluk me emen ama kinyi ekikan̄ ataak ataak,
otutuuk otu alọm kiban̄ ìre ofiaan̄ ofiaan̄.
13 Eya orọ, nsulu enyi osusut ijo ijo,
mè ijijaka enyi isan̄a mije ijo inu kinyi.
14 Enyi mêrie inorie, ire, owot ìkpojot enyi,
uraafiọọn̄ mè ukpook owot obokup inyi enyi.
Enyi mêkpulu inu isi isun̄, ire, ìkpokup;
geelek òkukup, mâsa akọn̄ inijijaka isan̄a.
15 Enyi mêwop mfut, ire, enyi kpeberọkọ;
enyi mêchimi aran̄ olifu, ire, enyi kpebeken aran̄ ya;
enyi mêchimi miin̄ me lek gerep,
ire, ìkpore enyi otu.
16 Enyi ekisun̄ orọmijọn̄ kè Omiri,
mè ikirọ otutuuk inu cha ebi uwu kè Eyabu erọbe,
mè ikirọ ijejeen̄ kiban̄.
Eya orọ, mâjijaka enyi igwook,
mè isa ebi kinyi inyi ochak;
ebi ene mêkekitumu usem ikpak inyi enyi.”