Môfieek inyi Ninife
3
Môfieek inyi ama eje ene onin̄be chieen̄,ama ataak ojotbe,
ama inu efumbe me akọn̄ ogakbe emen,
ere mkpan̄-ene ìkakinan!
2 Ida njijan̄ òkitaan̄,
okput ekpirikpo uji akọn̄ òkikput,
ida ukot inyinya òkisisik ijọn̄,
ebi kè uji akọn̄ mêkigbugbọ iraka!
3 Ebi akọn̄ inyọn̄ inyinya mêkijibi akọn̄ inin̄,
oge akọn̄ òkimumen,
otunwa òkikebe!
Ebi ekpaan̄be mîtutumọ ijot,
nkwukwu ene îtiik ibene;
kpekọt ifuk otu ifuk nkwukwu ene;
ebi ene ekije itọbọ ukot me lek nkwukwu ene ilọ irọn̄.
4 Otutuuk inu chi ìnan̄a me ibot Ninife, enenwaan̄ òje oyet ya,
ogwu ijeje oyet ìkakijot,
ogwu òkisa uja kan̄ ileke ene;
ogwu ibot yọk ofia,
òkisa ijeje oyet kan̄ ilep ido geelek,
mè ikisa ifit ibọk kan̄ ilep ebi ife geelek.
5 Okumugwem Ogwukaan̄ Inyọn̄ mè Ijọn̄ onenitumu ibe,
“Kpọ, emi ìre ochicha kwun̄;
mâchiaan̄ ekwut ebon kwun̄
ibene ikana ichit owu me isi;
mâsa njak kwun̄ ijeen̄ ebi ido geelek,
mè isa esip itet owu me isi ebi ife geelek.
6 Mâtọọn̄ njijọ inu iken iso owu lek;
mâkpọ owu chieen̄ isiki,
mè isa owu irọ inu ochak me isi ebi ene.
7 Ebi imun̄ owu, ebelilim inan̄a,
mè ikibe, ‘Ninife îkana ǹrioon̄!
Jei, ekene obofieek ejit inyi ọmọ?’
Owa ke mbasi iweek ebi ukarajit inyi owu?”
8 Ìre owu onye lek igak ama Tebes,
òkup me lek okwaan̄ Nali,
eyi mun̄ okanabe okokop?
Okwaan̄ ke îsa ikwek lek,
mè isa mun̄ irọ mgban ikana lek kan̄.
9 Etiopia mè Ijipiti ere unye kan̄ eyi kpunube ojelek;
Put mè Libiya me lek ebi ìkibieen̄ ọmọ udun̄.
10 Ire, mîkpulu ebi Tebes agam agam ije,
mè isa ema isi igwook me ofifi ido.
Mîtọọn̄ asasa nsabọn kiban̄ ikpọk isan
me lek ugwaka oniin̄ geelek;
mîroon̄ nriroon̄ me ibot ebi isi ene kiban̄,
mè itaak ebi ilile kiban̄ mkpọn.
11 Ninife, owu si, ìbosasa owu kubọk miin̄;
owu môkekiweek ere obolet lek,
mè ere obotap ibot, inyi ogwu ochicha ikamun̄ owu.
12 Otutuuk mgban akọn̄ kwun̄ ìkup kubọk uti figi
òkaan̄ adasi mfut òreren̄e;
isisisik uti cha,
mfut cha îra ikirurọn̄ọ inin̄ emen otu ogwu òkirerie.
13 Kpọ, ebi akọn̄ kinyi ìkup me etete kinyi,
ewọ idek kubọk ebibaan̄.
Otutuuk otunchit ido kinyi,
ìlaak òbook inyi ebi ochicha kinyi;
okwukwut esabe igban isaba otunchit cha, inyi inye,
ukan̄ îtaka iriọk isan̄a kpai.
14 Ìchibi mun̄ ìsun̄ ìban mbin akọn̄ òkinu,
ìnama mgban akọn̄ kinyi ìnye!
Ìrọkọ arika, mè ifuku ikana abọt,
mè ìnen̄e inu ekisa ibot okpungwu ìsun̄!
15 Ere ya ke ukan̄ obotaka enyi ikọọk,
oge akọn̄ môsọsọp enyi igwook;
ebi ochicha mêtaka enyi igwak
kubọk akaka otaka mfut uko igwak.
Ìmumana ìwa kubọk akaka,
mè ìwa kubọk urum akaka ituuk!
16 Enyi mîrọ ebi mbit kinyi ewa enenen,
ema mîwa igak ntoronyan̄ me akpa isinyọn̄.
Ema mîtaka inu isan̄a me inyọn̄ ijọn̄ kinyi kubọk akaka ituuk,
mè iwulu ifon.
17 Ebi ìkikpulu enyi ekup kubọk akaka ituuk;
ebi ibot kinyi ebet lek urum akaka ituuk
ònisusọn me agba uwu me usen ere otọọkbe,
ire, ura isisisibi, ema mîra iwulu inan̄a,
ene geege ìkakiriọọn̄ agan̄ enin̄be.
18 Jei, ogwu ubọọn̄ Asiria, ebi ibot mkpulu kwun̄ mîlilam ita;
ebi ilile kwun̄ mîkwaan̄ ibia me achiaan̄.
Ebi kwun̄ mîyiyala ichit inyọn̄ ogoon̄;
kpunu ogwu òbotitiin̄ ema.
19 Kpunu inu ebesa igwa unan òsasak owu me lek;
unan kwun̄ ìre eyi mkpa.
Ene geelek ònọnọ inu ofolek kwun̄,
ìkikwakwak ubọk ibe owu onan̄a irọn̄.
Mije, ìre ekene ke inu ikpak okirọ
mgbọ geelek ìkare lek?