Jekaraya ìben nriran yi mgbọ ebi Juda enan̄abe me usun̄ akọn̄ ika. Ebi Juda mîkaan̄ owuwa ufialek mgbọ ema ekabe. Mîbene inama Uwu Mbuban, ire, uwu ya ìkakaan̄ umin kubọk eyi adasi. Me mgbọ ya, kpunu ogwu ubọọn̄ ònan̄a me owot iman kè Debit. Me ike mgbọ ya si, Juda ìre sọntiik otu agọọk ge me irak mkpulu ebi Midia mè Pesia, ìkakaan̄ lek kan̄.

Me adasi irek me emen ikpa yi (ibot 1-8), Okumugwem înyi Jekaraya ilaak ọkpọchieen̄ jeeta, echi òtatap ubọk ikat ebi Juda ejit. Îtumu ibe, usen ge, ke ogwu ubọọn̄ ogwu Okumugwem ogobobe inyi lek kan̄, môkpọk ikpulu me Jeruselem, ke otutuuk ido mênu me lek Okumugwem, mè inikana ebi kan̄. Ire, me mgbọ keyi, ke Okumugwem îra igobo Jerubaben ibe ire ogwu ibot mkpulu, mè igobo si Josuwa ibe ire ogwu ngwugwa, ke îre ebibi ebekikpulu ebi kan̄.

Me òso irek iba (ibot 9-11), Okumugwem îchieek use ibe ke ọmọ môsulu owuwa ido cha òkukup igbet ema osusut, mè isulu si ebi ibot mkpulu Juda ebi ìkpakpaka ibot.

Me òso irek ita (ibot 12-14), Okumugwem înyi etip òfo me lek ujọn̄ọ mgbọ òkup me isi, ibe, mgbọ ya, ke ebi ofifi ido mêtim akọn̄ me lek Jeruselem mè ido Juda, mè ikpan̄ owuwa ene. Ire, ke ọmọ, Okumugwem, môsibi inu ininyan̄a ebi kan̄, ke ema mêgwu ikom, ọmọ môtetele ijo kiban̄. Mgbọ ya, ke mêkpukpuku ogoon̄ geelek òkup ikana Jeruselem, ire, ke Jeruselem môkup me inyọn̄ ogoon̄ òbebene igak otutuuk lek ijọn̄ ya ikat ikana. Mgbọ ya si, ke mun̄ òkinyi ene ugwem môkinan̄a me Jeruselem ikigbuk isibi, otutuuk ebi ido geelek mêkekitọbọ ebum inyi Okumugwem.

Me emen ikpa yi si, Okumugwem îchieek use ibe ke ọmọ môria ogwu ubọọn̄ ogwu ọmọ ogobobe, òrere ogwu Awaji otọkọbe aran̄ me ibot ya, ijet ebi kan̄, ke ogwu ubọọn̄ ya ìbogegele lek kan̄ isiki, mè ikikọp me inyọn̄ gwun̄ inyinya akpan inu (ibot 9:9).