Orọmijọn̄ ebi Ju
15
Usini ebi Farisi,
mè ebi ìjeen̄ Ikan eneninan̄a me Jeruselem inu me lek kè Jisọs,
mè inido ọmọ ibe,
2 “Ìre keke orọ ebi udun̄ kwun̄ ekijit irọrọ orọmijọn̄ ebi ugane esun̄be?
Ebi udun̄ kwun̄ kpekigwọk ubọk sabum ènerie inorie.”
3 Jisọs onenido ema ibe,
“Ìre keke orọ enyi ekifiat Ikan Awaji mije orọmijọn̄ kinyi?
4 Mije,
Awaji ìbe,
‘Min nte kwun̄ mè nga kwun̄.a
Ogwu itumu ijo otu ikọ inyi ogwu ute,
mè ìre ogwu uga,
ekpakpan̄.’b
5 Ire,
enyi eyaka ikijeen̄ ibe,
ire ogwu ikaan̄ inu ìbosa itap ubọk inyi ogwu ute mè ìre ogwu uga,
mè itumu inyi ogwu ute mè ìre ogwu uga ibe ke inu ya ìkup inyi Awaji,
6 ke ene ya môkọt isa me ikeya itele inyinyi ogwu ute mè ìre ogwu uga umin.
Sa me ikeyi,
enyi mîra ikisa orọmijọn̄ kinyi irọ inyi Ikan Awaji ikana inu ikike.
7 Enyi ebi isi iba kechi!
Nriran Asaya obenbe ofolek kinyi ìre atikọ.
Asaya ìben nriran ibe ke Awaji ìbe,
8 “ ‘Ife chi ekimin emi me ukpọk-otu ikike,
ire,
ejit kiban̄ îjọn̄ọ ere me lek n̄a.
9 Ema ekitọbọ ebum inyi emi ikike,
mè ikijeen̄ ikan ema gaalek
etapbe kubọk ìre Ikan Awaji.’c ”
Inu òkichaka ene mbuban me lek
10 Jisọs onenigwen ebi ife cha iriaak me lek kan̄,
mè itumu inyi ema ibe,
“Ìgban̄ utọn̄,
mè ìtet ibot me lek ikọ yi.
11 Ìkare inu òkinin̄ ene otu okichaka ene mbuban me lek.
Îre inu òkinan̄a ene me otu isibi gaalek okichaka ene mbuban me lek.”
12 Ebi udun̄ kan̄ enenije iriaak ọmọ me lek,
mè ibe ọmọ,
“Ìre oriọọn̄ ibe ke ebi Farisi mînaan̄ ejit me lek ikọ ya owu otumube?”
13 Jisọs ofọfọọk ema ibe,
“Uti geelek eyi Nte n̄a ogwu òkup me emen inyọn̄ ikasage ubọk kan̄ ìwop,
mêgbaan̄ uti cha mè ugwun̄-ijọn̄ ijim isan̄a.
14 Ìjuuk ema ìtele,
mije,
ema ìre ebi ǹnàan̄ ìkisa ebi ǹnàan̄ ijeen̄ oniin̄.
Ire ogwu ǹnàan̄ ikisa ogwu ǹnàan̄ ijeen̄ oniin̄,
ema ene iba mêgbaan̄ irọn̄ inin̄ emen udọn̄.”
15 Pita onenibeek Jisọs ibe ibum ibot urọk ya inyi ema.
16 Jisọs onenido ema ibe,
“Ìre enyi kpekikọt igobo inu itet si ire chereyi?
17 Ìre enyi kperiọọn̄ ibe ke inu geelek ònin̄ ene otu ìkiraka ifo owot,
mîra ikine ifiin̄?
18 Ire,
inu geelek ònan̄a ene me otu isibi ìkinan̄a me ejit ene.
Îre echichi okichaka ene mbuban me lek.
19 Mije,
ijo ekiket geelek,
mè ikpakpan̄ ene me unye,
mè ugan-nwa mè ijeje oyet,
mè ichichiin̄ inọ,
mè ikekeke ata-ikọ ataak,
mè ifafiat ene,
ìkinan̄a me ejit ene isibi.
20 Îre inu chi okichaka ene mbuban me lek.
Ekagwọkge ubọk sabum ènerie inorie ìkakichaka ene mbuban me lek.”
Ichechieek ogwu enenwaan̄ ikarege ogwu Ju okaan̄be
21 Jisọs oneninan̄a me ere ya ije isi agan̄ Taya mè Sidọn.
22 Ogwu enenwaan̄ Kenan ge òluk me agan̄ ya onunu me lek kan̄,
mè ibe ọmọ,
“Okaan̄-ene,
Gwun̄ kè Debit,
soso to emi nsan.
Ijo erumun̄ òkisisaak gwun̄ n̄a enenwaan̄ enenen.”
23 Ire,
Jisọs okpọkpọ iriaan̄ otu,
ìkasan̄a amọn geege.
Ebi udun̄ kan̄ etutumu inyi ibe,
“Tumu nyi ogwu enenwaan̄ ya ibe ifo,
inyi ikayaka ibọn̄ ukpo ìgọọk eji me udun̄.”
24 Jisọs onenifọọk ogwu enenwaan̄ ya ibe,
“Eria emi inu me lek arọọn̄ òchechep me otoko kè Ijeren gaalek.”
25 Ogwu enenwaan̄ ya onunu initọbọ ekpe me isi kan̄,
mè ibe ọmọ,
“Okaan̄-ene,
soso,
nye lek tap ubọk nyi emi.”
26 Jisọs ofọfọọk ọmọ ibe,
“Ìkanwọn ibe eben inorie nsabọn eberie etọp eto me ijọn̄ enyi ibo.”
27 Ogwu enenwaan̄ ya obebe ọmọ,
“Iin̄ Okaan̄-ene,
ikeya ke îre.
Ire,
ibo ìkekikup si me irak ikasi ogwu ute-uwu ikirie ngigen̄e inorie òkinan̄a me inyọn̄ ikasi ya igwook me ijọn̄.”
28 Jisọs ofọfọọk ọmọ ibe,
“Ogwu enenwaan̄,
ichechieek kwun̄ îmin.
Mîrọ inu oweekbe inyi owu.”
Me ike mgbọ yaage,
lek gwun̄ ogwu enenwaan̄ ya onyenye.
Jisọs înyi obop ene ini inorie
29 Jisọs oneninan̄a me ere ya ije isi agba okwaan̄ oyô Galili,
mè isi inene inyọn̄ ogoon̄ ge isiki ikweek.
30 Ogbogbo ebi ene ekpukpulu ebi ngọm,
mè ebi ǹnàan̄,
mè ebi akọọk,
mè ebi mbuuk,
mè ofifi ebi ìkifiak esese chieen̄ orukan̄ isa inigwook me ukot kan̄.
Igwagwa otutuuk kiban̄.
31 Mgbọ ebi ife cha emun̄be ibe ke ebi mbuuk mîbene ikitumu ikọ,
lek ebi ngọm înye,
ebi akọọk mîbene ikije ije,
ebi ǹnàan̄ mîbene ikimọọn̄ inu,
ikeke ema chieen̄ enenen.
Ema ekekitọn̄ Awaji ebi Ijeren.
32 Jisọs onenigwen ebi udun̄ kan̄ iriaak me lek kan̄,
mè itumu inyi ibe,
“Njijin ife chi îtet emi enenen.
Usen ita ire echa ife chi ekupbe melek n̄a.
Mgbọ keyi,
inorie kiban̄ îta,
kpunu inu geege ema eberie.
Eya orọ,
m̀kpatele inyi ema esa uraafiọọn̄ me owot eje efon,
inyi ema ekagak ìweek me oniin̄.”
33 Ebi udun̄ kan̄ efọfọọk ọmọ ibe,
“Ìre eji ebejeje ikaan̄ inorie òboso urum ene òmin ikup ikeyi me emen èwê yi?”
34 Jisọs onenido ema ibe,
“Ìre owut fituru inen ke enyi ekaan̄?”
Ema efọfọọk ibe ke ema ekaan̄ owut fituru jaaba gaalek mè ufuk asabọn irin̄ inen mè inen.
35 Inenitumu inyi ogbogbo ene cha ibe esiki ekweek me ijọn̄,
36 mè inibọkọ owut fituru jaaba,
mè ufuk irin̄ inen mè inen cha,
mè inyi Awaji itọn̄.
Mgbọ înyibe Awaji itọn̄ isan̄a,
ikpọkpọkọ fituru cha mè irin̄ cha itap ebi udun̄ kan̄ me ubọk ibe esa esi eche enyi ebi ife cha.
37 Otutuuk kiban̄ ererie inorie ya ijot.
Mgbọ ema eriebe isan̄a,
ebi udun̄ kan̄ eneniteen̄ echi eriebe isik itap me okwun,
ijojot okwun jaaba.
38 Otu ifuk ebi ìrerie inorie ya ìre obop ebirieen̄ ini,
kpefuk ebibaan̄ mè nsabọn itap me lek.
39 Jisọs onenitap ife cha me oniin̄ ifofo kiban̄ isan̄a,
mè inin̄ uji,
ọmọ mè ebi udun̄ kan̄ ekọkọp isaba isi agan̄ Magidala.