Mkpa kè Jọn ògwook mun̄
14
Mgbọ etip kè Jisọs otaan̄be inire utọn̄ kè Erọdu ogwu ibot mkpulu me agan̄ Galili,
2 Erọdu okekitumu inyi ebi ikwaan̄ kan̄ ibe ke ìkpolọlọ Jọn ògwook mun̄ ojomo me mkpa inikirọ inu chi;
ke eya orọ îkaan̄be unye ikisa irọ inu ukechieen̄ cha.
3 Sabum mgbọ ya,
Erọdu înyi ida ibe etet Jọn ebọp,
mè esa esi etap me uwu mkpọn mije kè Erọdias nwa kè Filip.
Filip yi ìre ngwan̄ kè Erọdu.
4 Unaan̄-ejit kè Erọdu me lek kè Jọn ògwook mun̄ ìre ke Jọn îtumu ibe ke ìkatat ibe ọmọ Erọdu ibọkọ Erọdias nwa kè Filip ogwu ngwan̄.
5 Erọdu îweek ikpakpan̄ Jọn ògwook mun̄,
ire,
ìkifieek owot ibe ke ebi ene mêto akọn̄.
Mije,
otutuuk ebi ene mîchieek ibe ke Jọn ìre ene ge me lek ebi nriran.
6 Usen ge,
mgbọ Erọdu otobe ijọk usen iman kan̄,
gwun̄ enenwaan̄ kè Erọdias onenijop okwa me isi kè Erọdu melek ebi ichen îgwenbe me lek ijọk ya.
Okwa gwun̄ enenwaan̄ ya ojopbe onenibele Erọdu ejit enenen.
7 Erọdu onyanyan̄a ibot inyi gwun̄ ya ibe ido ọmọ inu geelek îweekbe,
ke ọmọ mônyi ogwugwu.
8 Nga gwun̄ ya onenitọt inyi gwun̄ ya ibe ido ibot kè Jọn ògwook mun̄.
Gwun̄ enenwaan̄ ya onenisi ido Erọdu ibe,
“Nyi emi ibot kè Jọn ògwook mun̄ me emen okwa mgbọ keyi.”
9 Inu yi gwun̄ ya odobe onenifieek ogwu ubọọn̄ yi me lek enenen.
Ire,
mije îwuukbe lek inyan̄a ibot me isi ebi ichen kan̄ cha,
inyinyi ida ibe enyi gwun̄ ya inu îweekbe.
10 Ikeya ke esi me uwu mkpọn isi ifieek ibot kè Jọn ògwook mun̄,
11 mè iben itap me emen okwa isa ijet gwun̄ enenwaan̄ ya.
Ibọbọkọ,
mè isa ijet ogwu uga.
12 Ebi udun̄ kè Jọn enunu iniben nkwukwu kan̄ isi ifuun̄,
mè iben inu ya orọrọ isi ikpa inyi Jisọs.
Jisọs înyi obop ene go inorie
13 Mgbọ Jisọs onọbe ukpatu ofolek kè Jọn,
ọmọ mè ebi udun̄ kan̄ enwenween̄ lek inin̄ uji,
mè ikọp isi ere ònọnọọn̄.
Ebi ene inọnọ ikeya,
egbugbuku inan̄a me ama geelek òkup me agan̄ ya ije ukot ukot igọọk ọmọ.
14 Mgbọ ema ekọpbe uji kiban̄ initoon̄ me ijọn̄,
Jisọs obebene chieen̄ imun̄ ogbogbo ife cha ejotbe ere ya.
Njijin kiban̄ otetet ọmọ,
igwagwa otutuuk ebi orukan̄ ìkup me etete kiban̄.
15 Me otu ikakwun̄ usen ya,
ebi udun̄ kan̄ enenitumu inyi ọmọ ibe,
“Egwe îjọkọ enenen,
melek si,
ere yi îjọn̄ọ ere enenen me lek ama.
Tele inyi ife chi eje esi asabọn ama òkukup igbet ere yi esi elep inorie.”
16 Jisọs ofọfọọk ema ibe,
“Ìkanwọn ibe ife chi efon ukpọk owot.
Enyi ìweek inorie ìnyi ema erie.”
17 Ebi udun̄ kan̄ ebebe ke îre owut fituru go mè ufuk irin̄ iba gaalek ke ema ekaan̄.
18 Jisọs obebe ema,
“Ìsa fituru cha mè irin̄ cha ìjet emi.”
19 Ineninyi ida ibe mè ebi ife cha esiki ekweek me inyọn̄ mbubet,
mè inibọkọ owut fituru go mè ufuk irin̄ iba cha,
mè ibene chieen̄ ikpọ inyọn̄,
mè inyi Awaji itọn̄.
Inyinyi Awaji itọn̄ isan̄a,
igwagwaka fituru cha okpọkọ okpọkọ,
mè isa inyi ebi udun̄ kan̄.
Ema ebọbọkọ,
mè isa isi iche inyi ebi ife cha.
20 Otutuuk kiban̄ ererie,
mè irie ijot.
Ebi udun̄ kan̄ eteteen̄ okpọkọ echi ife cha etakabe isik,
ijojot akọp mè okwun iba.
21 Otu ifuk ebi ìrerie inorie ya ìre obop ebirieen̄ go,
kpefuk ebibaan̄ mè nsabọn itap me lek.
Jisọs îje ije me inyọn̄ isi mun̄
22 Mgbọ yaage ife cha eriebe inorie isan̄a,
Jisọs onenibe ebi udun̄ kan̄ esi enin̄ uji,
mè edasi kan̄ ekọp esaba agan̄ keyilọ.
Ọmọ me lek kan̄ obabia me udun̄ ikitap ife cha me oniin̄,
inyi efon.
23 Itatap ema me oniin̄ isan̄a,
ijeje inene inyọn̄ ogoon̄,
ọmọ gaalek,
isi ikup iriaak uriaak ire agan̄ ikakwun̄.
24 Ike mgbọ ya,
uji ya îjọn̄ọ ere me okwaan̄,
efet okekiwut ibieen̄ ema ikpebe,
ekoon̄ si okekisisaak ema.
25 Me ofit iwele kan̄,
me agan̄ egwe,
Jisọs onanan̄a ikije ukot ukot me inyọn̄ isi mun̄ me okwaan̄ oyô ya igọọk ema.
26 Mgbọ ebi udun̄ kan̄ emun̄be ọmọ okije me inyọn̄ isi mun̄,
ukpook otetet ema enenen.
Ema ebebe ke îre ekwukwu,
mè isan̄a ukpo ibọn̄.
27 Ire,
mgbọ yaage Jisọs obọbọkọ ema otu,
mè ibe ema,
“Ìkat ejit,
ikatet ukpook,
ke emi ke îre.”
28 Pita obebe ọmọ,
“Okaan̄-ene,
ire owu me atikọ,
gwen emi ibe emi ǹje me inyọn̄ isi mun̄ ǹnu me lek kwun̄.”
29 Jisọs obebe ọmọ,
“Na.”
Pita onanan̄a me emen uji ya isaba isibi,
mè ikije me inyọn̄ isi mun̄ ya igọọk Jisọs.
30 Ire,
mgbọ Pita oraan̄be chieen̄ ikpọ efet ya me isi mun̄,
ifefieek owot,
mè ibene ikigen.
Mgbọ îbenebe ikigen,
ibọbọn̄ ukpo ibe,
“Okaan̄-ene nyan̄a emi,
soso!”
31 Mgbọ yaage,
Jisọs onyanyana ubọk itet ọmọ,
mè ibe ọmọ,
“Owu ogwu una ichechieek keyi!
Keke orọ òbene òkaan̄ ejit iba?”
32 Mgbọ ema ene iba esababe inin̄ uji,
efet ya owọwọ.
33 Ebi ìkup me emen uji ya etọtọbọ ebum inyi Jisọs,
mè ibe ọmọ,
“Owu ìre Gwun̄ Awaji me atikọ!”
34 Ema enenikọp isaba itoon̄ me agan̄ ijọn̄ ekigwen Geneseret.
35 Ebi ìluk me inyọn̄ ijọn̄ ya erọriọọn̄ Jisọs isi,
mè ilook etip ikana ere geelek ibe ke Jisọs înu.
Ebi ene ekpukpulu otutuuk ebi orukan̄ kiban̄ ijet ọmọ,
36 mè iriaak ọmọ ibe itele inyi ebi orukan̄ cha echak ubọk me utọn̄ ofọnti kan̄.
Otutuuk ebi ìchachak ubọk me lek ofọnti kan̄,
lek kiban̄ onyenye isan̄a.
Jesus Walks on Water (Matthew 14:22-36)