Urọk ogwu òwop mfut
13
Me usen yaage,
Jisọs oneninan̄a me uwu ya isibi,
mè isi isiki ikweek irek me agba okwaan̄ oyô.
2 Mije urum ebi ene ìkekeke ikana ọmọ emalek iwa,
isasaba inin̄ emen uji ge me atasuk ya isiki ikweek.
Ife cha ekekeke me otu inyọn̄ ikigban̄ ọmọ.
3 Jisọs okekisa me urọk ijeen̄ ema owuwa inu,
mè ikpa inyi ema ibe,
“Ogwu uko ge onisibi isi iwop mfut me uko.
4 Mgbọ îkigwọ mfut cha ifiaak ikana,
usini orọrọn̄ me eden̄ oniin̄.
Ebi kè ofut enunu initọk imeen̄ isan̄a.
5 Usini orọrọn̄ me ijọn̄ ewuuk ere achiaan̄ ikadọkge.
Sọnja mgbọ,
ititibi isibi,
mije,
achiaan̄ òkup me ere ya ìkadọk.
6 Ire,
mgbọ ura obumbe,
unye ura otetet ema ichiaak,
ikwakwaan̄ isan̄a,
mije ugwun̄-ijọn̄ kiban̄ ikatibige ìnin̄ ijọn̄ ìdọk.
7 Usini mfut cha orọrọn̄ me etete ukpak,
mè itibi isibi.
Ire,
ukpak cha otitibi ichit nsek uti cha,
mè irọ inyi ikatibi ìjaan̄.
8 Usini mfut orọrọn̄ me ata ijọn̄,
mè itibi isibi,
mè ito mfut.
Usini oto mfut iwa efit mgbọ,
igak otu ifuk esabe iwop,
usini akọp mgbọ gweregwen,
usini akọp mgbọ ita.”
9 Mgbọ îtobe urọk ya isan̄a,
itutumu inyi ema ibe,
“Ogwu ikaan̄ utọn̄,
inọ!”
Inu òrọrọ Jisọs okitumu ikọ me urọk
10 Mgbọ eya orakabe,
ebi udun̄ kan̄ enunu,
mè inibe ọmọ,
“Ìre keke orọ okisa urọk itumu ikọ inyi ene?”
11 Jisọs ofọfọọk ema ibe,
“Mînyi enyi ifuk-ibot isasa iriọọn̄ nlelet inu ofolek mkpulu eyi Awaji.
Ire,
kpenyi ebi ofifi ife ifuk-ibot keya.
12 Ogwu òkakaan̄ inu ke mênyi ofifi inu isọkọ me lek eyi îkaan̄be,
inyi ikaan̄ iwa igak.
Ire,
ogwu ikakaan̄ge,
mêtet sọntiik eyi îkaan̄be ibọkọ isan̄a me ubọk.
13 Ǹkisa me urọk itumu ikọ inyi ema inyi ema mêkpọ,
mè ikpọ igak,
kpebekọt imun̄.
Ema mêgban̄,
mè igban̄ igak,
kpebekọt igobo itet.
14 Sa me ikeyi,
ke ikọ Awaji otumube inan̄a me otu kè Asaya ogwu nriran orọ iso.
Asaya ìtumu ibe,
“ ‘Enyi mênọ,
ire,
enyi kpebekọt igobo itet.
Enyi mêmun̄,
ire,
enyi kpebekọt imun̄ itet.
15 Mije,
ejit ebi ife chi ìkayaka ìkọt ìkigobo inu ìtet.
Ema mînwaan̄ utọn̄ kiban̄ ichit,
mè ichọkọ chieen̄ kiban̄ igọm.
Mebe ìkare ikeya,
kè ema ekọt
esa chieen̄ kiban̄ emọọn̄ inu,
mè esa utọn̄ kiban̄ ènọ ikọ,
mè esa ejit kiban̄ egobo inu ètet,
mè ema ègwu ekom,
mè Awaji ònyan̄a ema.’a
16 Ire,
mîgbana enyi enenen,
mije,
enyi mîkisa chieen̄ kinyi imọọn̄ inu,
mè ikisa utọn̄ kinyi inọ ikọ.
17 Me atikọ,
emi ǹkitumu inyi enyi ibe ke owuwa ebi nriran mè ebi ata irọrọ me ukot ikaan̄ mîweek imumun̄ inu enyi ekimun̄,
ire,
kpekọt imun̄.
Mîweek si inọnọ ikọ enyi ekinọ,
ire,
kpekọt inọ.
Ibot urọk ogwu òwop mfut
18 “Eya orọ,
ìgban̄ utọn̄ me lek inu urọk ogwu òwop mfut ya osibibe.
19 Mfut echi òrọn̄ me eden̄ oniin̄ ìkeke inyi ebi ìnọnọ ikọ ofolek mkpulu eyi Awaji,
ire,
kpekọt igobo ikọ cha ema enọbe itet.
Yọk îra inu inijọk ikọ cha isan̄a me ejit kiban̄.
20 Mfut echi òrọn̄ me ijọn̄ ewuuk ìkeke inyi ebi ìnọnọ ikọ ya,
mè isa me ubelejit ibọkọ itap mgbọ yaage.
21 Ire,
mije ikọ ya ikakaan̄ge ata ugwun̄-ijọn̄ me emen kiban̄,
ìkafuk ugwem.
Eya orọ,
mgbọ uyọrọlek mè osusut isinu inyi ema mije ikọ ya,
ema mîra inan̄a irọn̄ mgbọ yaage.
22 Mfut echi òrọn̄ me etete ukpak ìkeke inyi ebi ìnọnọ ikọ ya,
ire,
saasaak eyi ugwem mè uleke eyi inu ubọọn̄ linyọn̄ îra ininwunwana ikọ ya,
mè irọ inyi ikakọt ìto mfut geege.
23 Ire,
mfut echi òrọrọn̄ me ata ijọn̄ ìkeke inyi ebi ìnọnọ ikọ ya,
mè igobo itet.
Ebibi ere ebi ìtoto mfut.
Usini me lek kiban̄ eto mfut iwa efit mgbọ,
usini akọp mgbọ gweregwen,
usini akọp mgbọ ita igak otu ifuk esabe iwop.”
Ijejeen̄ ofolek mkpulu eyi Awaji:
1. Urọk mbubet
24 Jisọs onenito ofifi urọk ibe,
“Mkpulu eyi Awaji ìkup kubọk ogwu enerieen̄ ge òwop ata mfut me emen uko kan̄.
25 Ire,
mgbọ otutuuk ene ekilaak,
ogwu ochicha kan̄ osasa mbubet isi iwop me etete akpa ogwu enerieen̄ ya owopbe me emen uko ya,
mè inan̄a ije ifo.
26 Mgbọ akpa cha otibibe isibi,
mè ibene ikito ajakajak,
mbubet cha ogọgọọk itibi isibi si.
27 “Mgbọ ebi ikwaan̄ ogwu enerieen̄ ya emun̄be mbubet cha me etete akpa me uko ya,
ema enunu lek nte uwu kiban̄,
mè inibe ọmọ,
‘Nte uwu,
ìre ìkare ata mfut gaalek ke owop me uko kwun̄?
Ìre mbubet òtitibi me emen uko ya ìnijeje?’
28 “Nte uwu kiban̄ ofọfọọk ibe ke ìkpolọlọ ogwu ochicha orọ inu ya.
Ebi ikwaan̄ cha edodo nte uwu kiban̄ ibe,
‘Ìre eji esi ejim otutuuk mbubet cha esan̄a?’
29 “Nte uwu kiban̄ obebe,
‘In̄-in̄,
ikasi,
mije,
mgbọ enyi mêkijim mbubet cha,
enyi mêlọ ubọk ijim akpa igbaalek.
30 Eya orọ,
ìtele inyi akpa cha mè mbubet cha egbaan̄ etibi.
Isire mgbọ irọrọkọ inu me uko,
mâtumu inyi ebi ìkirọkọ inu me uko ibe edasi ejim mbubet cha,
mè egbaan̄ ebọp me efit me efit,
inyi ekpulu esi ewọp me ukan̄,
sabum ènefaan̄ akpa etitiin̄,
mè ekpulu èsi etap me emen uwu isun̄-akpa n̄a.’ ”
2. Urọk mfut uti mọsitadi
31 Jisọs onenito si ofifi urọk ibe,
“Mkpulu eyi Awaji ìkup kubọk ukwuuk uti ekigwen mọsitadi eyi ene omọnọbe isi iwop me uko kan̄.
32 Ukwuuk uti yi osip ichit me lek otutuuk ukwuuk uti geelek.
Ire,
isitibi isibi,
ọmọ okimin igak uti geelek ekiwop me uko,
mè okana ikpele uti ere ebi kè unọn inyọn̄ enikisọọk,
mè ikinama uwu me inyọn̄.”
3. Urọk olat
33 Jisọs okpọkpọk ito ofifi urọk ibe,
“Mkpulu eyi Awaji ìkup kubọk olat,
eyi ogwu enenwaan̄ ochibibe sọntiik igwook me lek owuwa akpa ekọkọk ìbosa irọ fituru,
mè itap mun̄ me lek,
mè igbaan̄ ema ifuku mege sọntiik olat ya îra irọ inyi otutuuk akpa ekọkọk ya iwuku.”
34 Jisọs ìtumu otutuuk ikọ chi inyi ife cha me urọk.
Kpunu inu geege îtumube inyi ema,
eyi ikasage me urọk ìtumu.
35 Ikeyi ke ikọ Awaji otumube inan̄a me otu ogwu nriran orọ iso ibe,
“Emi mâkitumu ikọ me urọk,
mâtumu owuwa ikọ òkup nlelet
bene me karake erombe linyọn̄.”b
Jisọs îbum ibot urọk mbubet
36 Mgbọ Jisọs otelebe urum ebi ene cha,
mè ije inin̄ uwu,
ebi udun̄ kan̄ enunu me lek kan̄,
mè inibeek ibe ibum ibot urọk mbubet òtibi me emen uko ya inyi ema.
37 Jisọs onenitumu inyi ema ibe,
“Ogwu òwop mfut ya ìre Gwun̄ Ebilene.
38 Uko ya ìre linyọn̄ keyi.
Ata mfut cha ìre ebi ìkup me emen mkpulu eyi Awaji.
Sà mbubet cha okeke inyi bọn eyi Yọk.
39 Ogwu ochicha ogwu òwop mbubet cha ìre Yọk.
Mgbọ irọrọkọ inu me uko ya ìre òta mgbọ eyi linyọn̄.
Ebi ìrọkọ inu me uko cha ìre ebi osat Awaji.
40 “Ike ejimbe mbubet cha,
mè itap ukan̄ iwọp itaka iriọk,
ikeya si ke ìbokup me òta mgbọ eyi linyọn̄ keyi.
41 Mgbọ ya isikem,
Gwun̄ Ebilene môria ebi osat kan̄ itap me etete ebi ọmọ okikpulu,
ibe esi esan̄a inu geelek òkirọ inyi ene irọ ijo inu,
mè esan̄a si otutuuk ebi geelek ìkirọ ijo inu esibi,
42 mè ekpulu ema etọọn̄ etap me emen unye ukan̄.
Ebi ìkup me emen ukan̄ ya mêkito uga ito,
mè ikitaka ejeek.
43 Mgbọ keya,
ebi ata irọrọ mêkitoon̄ kubọk ura me etete ebi Nte kiban̄ okikpulu.
Ogwu ikaan̄ utọn̄,
inọ.”
4. Urọk inu ubọọn̄ òlelet
44 Jisọs onenito urọk ibe,
“Mkpulu eyi Awaji ìkup kubọk inu ubọọn̄ òlelet me emen ijọn̄ ere ge.
Enerieen̄ ge onenikirọkọ ijọn̄ me ere ya,
mè isi itoon̄ me lek inu ubọọn̄ cha,
mè ida achiaan̄ ichit,
mè ìsa me ubelejit ifo isi ikpulu otutuuk inu îkaan̄be inyam,
mè isa ikpoko ya isi ibọkọ ijọn̄ ya ilep.
5. Urọk ewuuk unye otu ewe
45 “Ofifi si,
mkpulu eyi Awaji ìkup kubọk ogwu ewe òkiweek ewuuk unye otu ewe ìbolep.
46 Mgbọ îweekbe ge eyi atata imun̄,
igwugwu ikom ifo,
mè isi inyam otutuuk inu îkaan̄be,
mè isa ikpoko ya inilep ewuuk unye otu ewe ya.
6. Urọk àkarà
47 “Ofifi si,
mkpulu eyi Awaji ìkup kubọk àkarà eyi egwookbe ikana owuwa chieen̄ irin̄ me okwaan̄,
48 mè itaba itoon̄ me inyọn̄,
mè inikup igobo irin̄ echi atata itap ijot owuwa okwun,
mè inikpulu echi mkpukpuku òsisik itọọn̄ ifiin̄.
49 Ikeyi ke ìbokup me òta mgbọ.
Mije,
ebi osat mênu iniche ebi ijo irọrọ isan̄a me lek ebi ata irọrọ,
50 mè ikpulu ebi ijo irọrọ itọọn̄ itap me emen ukan̄.
Ebi ìkup me emen ukan̄ ya mêkito uga ito,
mè ikitaka ejeek.”
51 Jisọs onenido ema ibe,
“Ìre enyi mîtet otutuuk inu chi?”
Ema echechieek ibe iin̄,
ke ema mîtet.
52 Inenitumu inyi ema si ibe,
“Ogwu òjeen̄ Ikan geelek ejeen̄be inu igọọk me oniin̄ mkpulu eyi Awaji ìkup kubọk ogwu òkaan̄ uwu,
mè ikitibi inin̄ emen agwut ere îkisun̄ inu,
mè ikisan̄a inu ubọọn̄ echi ukot ikaan̄ mè echi ayaya isibi.”
Mîjit Jisọs me Najeret
53 Mgbọ Jisọs otumube ikọ me urọk isan̄a,
ijeje inan̄a me ere ya ifo.
54 Mgbọ îrebe ama ere ekpukpobe ọmọ isibi,
ibebene ikijeen̄ inu me uwu ntitiin̄ kiban̄.
Inu cha îkijeen̄ okpọkpọ ike ebi ene chieen̄.
Ema ebebene ikidido ibe,
“Iriọọn̄-inu keyi mè unye isasa irọ inu ukechieen̄ chi ìnan̄a ene yi me owa mọnọ?
55 Ìre ìkare gwun̄ ogwu usọ ya ire ogwu?
Sà ìre ìkare ogwu enenwaan̄ ekigwen Meri ore ogwu uga?
Sà ìre ìkare Jemis,
mè Josefu,
mè Saimọn,
mè Judas ere ebi ngwan̄ ebirieen̄?
56 Ìre ìkare ebi ngwan̄ kan̄ ebibaan̄ melek kiji egbaan̄ iluk me ama yi?
Ire ikeya,
ìre otutuuk inu chi ene yi okirọ ìnan̄a ọmọ me owa mọnọ?”
57 Ema ebebene ikaan̄ njijọ ejit me lek kan̄.
Eya orọ,
Jisọs otutumu inyi ema ibe,
“Ogwu nriran îkikaan̄ umin me ere geelek,
îtata me ama kiban̄,
mè uwu kan̄ gaalek,
ke ìkakikaan̄ umin.”
58 Jisọs ìkakọt ìrọ owuwa inu ukechieen̄ me ama kiban̄,
mije una ichechieek kiban̄.