Urọk ogwu òwop mfut
4
Ofifi mgbọ Jisọs osibe agba okwaan̄ oyô Galili,
mè ibene ikijeen̄ ikọ Awaji,
ebi ene esisibi inu iwa enenen.
Mije keya,
Jisọs oninin̄ emen uji ikweek ikijeen̄ inu.
Enenibieen̄ uji ya ito me lek mun̄,
mè ida ibọkọ sọnja.
Otutuuk ene cha ekekeke me otu inyọn̄ me ere ya.
2 Jisọs onenikisa me urọk ikijeen̄ ema owuwa inu,
mè inikpa ibe,
3 “Ene ge oninan̄a isi iwop mfut me uko.
4 Mgbọ îkigwọ mfut cha ifiaak ikana,
usini orọrọn̄ me eden̄ oniin̄.
Ebi kè ofut enunu,
mè initọk imeen̄ isan̄a.
5 Usini orọrọn̄ me ijọn̄ ewuuk ere achiaan̄ ikadọkge.
Sọnja mgbọ,
ititibi isibi,
mije,
achiaan̄ òkup me ere ya ìkadọk.
6 Ire,
mgbọ ura obumbe,
unye ura ya onenitet ema ichiaak,
ikwakwaan̄ isan̄a,
mije,
ugwun̄-ijọn̄ kiban̄ ìkatibi ìnin̄ ijọn̄ ìdọk.
7 Usini orọrọn̄ me etete ukpak.
Ukpak cha otitibi ichit nsek uti cha,
mè irọ inyi ikato mfut.
8 Ire,
usini mfut orọrọn̄ me ata ijọn̄,
mè itibi imiin̄,
mè ito mfut.
Usini oto mfut iwa akọp mgbọ ita,
igak otu ifuk esabe iwop,
usini akọp mgbọ gweregwen,
usini efit mgbọ.”
9 Me ichichit ikọ kan̄,
Jisọs onenibe ema,
“Ogwu ikaan̄ utọn̄ ìbosa inọ ikọ,
inọ!”
10 Mgbọ owuwa ene eyatbe isan̄a,
ibot ene inen mè inen ìsisik,
igbaalek akọp mè ene iba ebi udun̄ kan̄,
enenikido ọmọ ibot urọk cha îtobe.
11 Jisọs onenifọọk ema ibe,
“Awaji îkpọk mbum nlelet inu ofolek mkpulu kan̄ inyi enyi.
Ire,
ebi ofifi ife ke ekijeen̄ inu geelek me urọk,
inyi,
12 “ ‘Ema mêmun̄,
ire,
kpebekọt imun̄ itet.
Ema mênọ,
ire,
kpebekọt igobo itet.
Mije,
ire ema imun̄,
mè inọ,
ema mêgwu ikom igọọk Awaji,
mè Awaji òtele ijo kiban̄ onyi ema.’a ”
13 Jisọs onenido ema ibe,
“Ire enyi kpekọt igobo sọntiik urọk keyi itet,
ìre môyaka ikaan̄ urọk eyi enyi mêkọtbe igobo itet?
14 Mfut eyi ogwu òwop mfut owopbe ìre ikọ Awaji.
15 Usini ene ekup kubọk mfut echi òrọrọn̄ me eden̄ oniin̄.
Mgbọ yaage ema enọbe ikọ Awaji,
Yọk îra inu inisan̄a ikọ ya ewopbe me ejit kiban̄ isan̄a.
16 Usini ene si ekup kubọk mfut echi òrọrọn̄ me ijọn̄ ewuuk.
Mgbọ yaage ema enọbe ikọ Awaji,
ema mîra ibọkọ itap me ubelejit.
17 Ire,
ikọ ya ìkafuk,
mije,
ìkatibi ugwun̄-ijọn̄ me emen kiban̄.
Eya orọ ufialek mè tukutuku isinu inyi ema mije ikọ ya,
mgbọ yaage ema mîra inan̄a irọn̄.
18 Usini ene ekup kubọk mfut echi òrọrọn̄ me etete ukpak.
Ebibi ere ebi ìnọnọ ikọ ya,
19 ire,
ekiket inu linyọn̄,
mè ulọk inu ubọọn̄ linyọn̄,
melek owuwa ulọk òkup esese esese îra inichit ikọ ya,
mè orọ inyi ikọ ya ikato mfut.
20 Ire,
usini ene ekup kubọk mfut echi ewopbe me ata ijọn̄.
Ebiba ere ebi ìnọnọ ikọ ya,
mè ibọkọ itap.
Ema ekup kubọk uti cha echi òtoto mfut iwa,
echi usini otobe akọp mgbọ ita,
usini akọp mgbọ gweregwen,
usini efit mgbọ,
igak otu ifuk esabe iwop.”
Urọk mkpukan̄
21 Jisọs onenitumu inyi ema ibe,
“Ìre ene mômin mkpukan̄,
mè isa okwa ikana ichit?
Sà ìre môben itap me irak mkpilaak?
Ìre ìkare inyọn̄ ngugọọn̄ ke ìboben itoon̄?
22 Inu geelek eletbe môkpọk mbum.
Inu geelek echitbe si,
mêsan̄a isibi me chieen̄ otutuuk ene.
23 Ogwu ikaan̄ utọn̄ ìbosa inọ ikọ,
inọ!
24 “Ìtet ibot me lek inu eyi enyi ekinọ,
mije,
ubọk enyi etọbe inyi ene,
ubọk keya si ke Awaji obotọ inyi enyi,
mè itọ iraka.
25 Ogwu òkakaan̄ inu ke mênyi inu isọkọ me lek eyi îkaan̄be.
Ire,
ogwu ikakaan̄ge,
mêtet sọntiik eyi îkaan̄be ibọkọ isan̄a me ubọk.”
Ijejeen̄ ofolek mkpulu eyi Awaji:
1. Urọk mfut òkititibi
26 Jisọs îtumu si ibe,
“Mkpulu eyi Awaji ìkup kubọk ene owop mfut me uko,
27 mè ikinin̄ uwu ilaak me eririeen̄.
Isire ikarek,
îra inan̄a isi uyọrọlek kan̄.
Otutuuk mgbọ cha mfut cha okekitibi,
mè ikimiin̄.
Ire,
ọmọ ìkariọọn̄ ubọk îrọbe.
28 Ijọn̄ me lek kan̄ okirọ inyi mfut uti cha itibi,
mè ito mfut.
Inwan̄ okidasi itibi isibi,
sabum ajakajak,
sabum mfut onikitibi isibi me emen ajakajak cha.
29 Mgbọ mfut cha isiniren̄e,
ene ya îra isi igbeme,
mije,
mgbọ irọrọkọ inu me uko îra ikem.”
2. Urọk mfut uti Mọsitadi
30 Jisọs onenitumu ibe,
“Ìre keke ke mêsa mkpulu eyi Awaji itọ me lek?
Sà ìre kpasi urọk obotat me lek mọnọ?
31 Mkpulu eyi Awaji ìkup kubọk ukwuuk mfut uti ekigwen mọsitadi.
Ukwuuk mfut uti yi osip ichit me lek otutuuk ukwuuk mfut uti ekiwop me ijọn̄.
32 Ire,
isiwop,
îra itibi isibi,
mè okana uti òmimin igak otutuuk inu geelek ekiwop me uko,
mè òkaan̄ owuwa ikpele agọọk echi unọn òwulu me inyọn̄ okininama uwu me irak iluk.”
33 Ikeyi ke Jisọs osa owuwa asabọn urọk ijeen̄ ema ikọ Awaji,
ikpọ me ubọk ema ekọtbe igobo itet.
34 Ìkakaan̄ ikọ geege îtumube inyi ema eyi ikarege me urọk.
Ire,
mgbọ geelek ọmọ mè ebi udun̄ kan̄ gaalek isikup,
îra ikibum ibot urọk cha inyi ema.
Jisọs îrọ egwijo iwọ
35 Me ikakwun̄ usen yaage,
Jisọs obebe ebi udun̄ kan̄,
“Eji enesaba okwaan̄ oyô yi etoon̄ me usaba agan̄.”
Jesus Calms the Storm (Mark 4:35-41)
36 Ema enanan̄a itele urum ene cha,
mè isi inin̄ uji ya eyi Jisọs okweekbe me emen,
mè isa Jisọs igbaalek ikọp inan̄a.
Owuwa uji me ere ya si mîgọọk ema inan̄a.
37 Ema me okwaan̄,
uga egwijo ojijibi isoon̄ ema,
ekoon̄ obebene,
mè ibotap mun̄ ijot emen uji.
38 Ire,
ike mgbọ ya,
Jisọs îsa inu ibene ibot,
mè ikilaak me agan̄ edim uji ya.
Ebi udun̄ kan̄ esisi itimi ọmọ,
mè ibe ọmọ,
“Nte uwu,
ìre môtop owu me lek ire eji ikwaan̄ ita?”
39 Jisọs obobolo chieen̄,
mè inan̄a ikeke,
mè igana inyi efet egwijo ya,
mè itumu inyi ekoon̄ ibe,
“Kayaka ìwut!
Ikup ikeya!”
Efet ya owọwọ,
isi mun̄ olọlọkọ.
40 Jisọs onenido ebi udun̄ kan̄ ibe,
“Ìre keke orọ mè ukpook itet enyi?
Ìre enyi kpekaan̄ si ichechieek me lek n̄a?”
41 Inu yi Jisọs orọbe ogwogwook ema mbiribọ me lek enenen.
Ema ekekidido lek kiban̄ ibe,
“Ìre kpasi ene ire eyi,
ogwu efet mè ekoon̄ si okirọ ida kan̄?”