2 Mgbọ yaage Jisọs osibibe me uji ikeke me ijọn̄,

enerieen̄ ge ogwu ijo erumun̄ okupbe me emen onanan̄a me oron-ekwukwu isibi inu inichichini ọmọ.

3 Ene yi ìkiluk me oron-ekwukwu.

Kpunu ene geege òkọkọt ibọp ọmọ ikam.

Ìrere mkpọn,

kpekikọt isa ibọp ọmọ.

4 Owuwa mgbọ,

mîkisa mkpọn ibọp ọmọ ubọk mè ukot,

îra ikifaan̄ mkpọn echi òkup ọmọ me ubọk,

mè osọp echi òkup ọmọ me ukot ofiin̄.

Înye lek enenen.

Kpunu ene geege òkikọt ikeme ọmọ isiki.

5 Eririeen̄ mè ikarek,

ìkije ikana me oron-ekwukwu mè inyọn̄ ogoon̄,

mè òkotaan̄ ukpo,

mè òkosa okpọkọ ewuuk òkoseke lek kan̄ obak.

6 Ene yi îkup me ujọn̄ọ ere imun̄ Jisọs,

mè ilibi isibi inu initọbọ ekpe me isi kè Jisọs,

7 mè itaan̄ nga ukpo ile ibe,

“Owu Jisọs,

Gwun̄ Awaji Ogwu Òbebene Ichit,

òkiweek emi keke me lek?

Soso,

nriaak owu,

me erieen̄ Awaji,

kasulu emi osusut.”

8 Ene yi ìtumu ikọ yi,

mije,

Jisọs îbene ikigana inyi ijo erumun̄ ya ibe isibi me emen ene ya.

9 Jisọs onenido ọmọ ibe,

“Keke ire erieen̄ kwun̄?”

Ifọfọọk ibe,

“Erieen̄ n̄a ìre ‘Urum,’

mije,

eji mîwa.”

10 Irariaak Jisọs owuwa mgbọ ibe ikalap ema ìsibi me inyọn̄ ijọn̄ agan̄ ya.

11 Me ike mgbọ ya,

îkaan̄ owuwa okodi òkukup igbet me ere ya ikirie urie me inyọn̄ ogoon̄ ya.

12 Ijo erumun̄ cha enenibeek Jisọs ibe,

“Soso,

ria eji tap me emen okodi chilọ.”

13 Jisọs ochechieek.

Ijo erumun̄ cha enanan̄a me emen ene ya isibi,

mè isi inin̄ emen okodi cha.

Otutuuk urum okodi cha,

òsoso obop okodi iba,

olilibi inan̄a me inyọn̄ ogoon̄ ya ikwala isibi igwook me okwaan̄,

mè inwọ mun̄,

mè ikwaan̄ isan̄a.

14 Ebi ìkikpọ chieen̄ me lek okodi cha elilibi ifon emen ama kiban̄ melek asabọn ama òkukup ikana me ere ya,

mè isi ikikpa inu yi òrọrọ ikana ere.

Ebi ene egbugbuku isibi inu ibenikpọ.

15 Mgbọ ema enire lek kè Jisọs,

ema eyaka inimun̄ ene ya ogwu mgbọ òkakaan̄ urum ijo erumun̄ me emen okweekbe irek,

mè ofọnti me lek,

mè iriọọn̄ lek kan̄.

Ukpook otetet otutuuk ife cha.

16 Ebi ìkukup imun̄ mgbọ inu chi orọbe enenikikpa inyi ebi ife cha inu òrọrọ ene ya melek okodi cha.

17 Mgbọ ife chi egban̄be ubọk inu cha osabe irọ isan̄a,

ema ebebene ikiriaak Jisọs ibe isibi me inyọn̄ ijọn̄ kiban̄.

18 Mgbọ Jisọs obosaba inin̄ uji,

ogwu îrieen̄be ijo erumun̄ isibi me emen ya okekiriaak Jisọs ibe itele mè ọmọ igọọk ogwugwu ije.

19 Ire,

Jisọs ojijit,

mè itumu inyi ọmọ ibe,

“Gwu kom fo gọọk ebi uwu kinyi,

mè si kpa ikpele inu Okaan̄-ene orọbe inyi owu,

mè ike îkaan̄be owu nsan me lek nyi ema.”

20 Ogwu enerieen̄ yi ogwugwu ikom,

mè isi ikikpa inu Jisọs orọbe inyi ọmọ ikana otutuuk agan̄ ya eyi ekigwen “Akọp Ama.”

Inu îkpabe otetet ebi ìnọnọ ukpook enenen.

21 9 Jisọs onenigwu ikom isaba okwaan̄ oyô ya itoon̄ me agan̄ mgbọ ema enan̄abe ya.

Owuwa ebi ene enunu,

mè igban ikana ọmọ me agba okwaan̄ ya.

22 Ene ge ekigwen Jairọs,

ogwu ibot me uwu ntitiin̄ ebi Ju,

onunu,

mè inirọn̄ lek me ijọn̄ me ukot kè Jisọs,

23 mè ikiriaak ibe,

“Sọntiik gwun̄ n̄a enenwaan̄ mônikwu.

Soso,

na si toon̄ ubọk me lek,

inyi lek kan̄ inye,

mè igat ugwem.”

24 Jisọs onenigọọk ọmọ ije.

Owuwa ene egbugbuku igọọk ije,

mè ifan̄a ichit Jisọs.

25 Me etete owuwa ene cha,

ogwu enenwaan̄ ge òwa ogwu eje okisibi me lek otutuuk akọp mè acha iba,

ìkafieek.

26 Ogwu enenwaan̄ yi îbọkọ uyọt me ubọk owuwa ebi ofia,

ire,

kpekọt igwa ọmọ itet.

Îfiat otutuuk inu îkaan̄be isa igwa lek,

kpan̄asi îbotata,

ìyaka ikitatap inu me lek.

27 Ogwu enenwaan̄ yi oneninọ ukpatu ònin̄ me lek kè Jisọs,

mè ininan̄a me agan̄ udun̄ ikije me etete owuwa ene cha inu agan̄ isi,

mè inire lek kè Jisọs,

mè itet ubọk me lek ofọnti kan̄.

28 Sabum mgbọ ya,

ogwu enenwaan̄ yi îtumu ifieek me ejit kan̄ ibe ìrere ofọnti kè Jisọs ke ọmọ okọt ichak ubọk me lek,

ke lek kan̄ mônye.

29 Mgbọ îjebe iriaak,

mè itet ubọk me lek ofọnti kè Jisọs,

eje ya ofefieek mgbọ yaage.

Ọmọ orọriọọn̄ me emen kan̄ ibe ke lek kan̄ înye;

ke orukan̄ kan̄ îta.

30 Mgbọ yaage,

Jisọs orọriọọn̄ ibe ke unye înan̄a ọmọ me emen isibi,

mè ikana chieen̄ me udun̄,

mè ikido ibe,

“Ìre ekene ochak ubọk me lek ofọnti n̄a?”

31 Ebi udun̄ kan̄ efọfọọk ọmọ ibe,

“Ìre eyi ebi ene ekanabe ichit owu ikeyi ke owu oyaka ikido ogwu òchachak owu ubọk me lek?”

32 Ire,

Jisọs okpọkpọ ikiriraan̄ chieen̄ si ikana ikiweek imumun̄ ogwu òrọrọ inu yi.

33 Ogwu enenwaan̄ ya îriọọn̄ inu òrọrọ ọmọ.

Ibebene ikifieek owot,

mè ikiran,

mè inisan̄a lek kan̄ isibi,

mè itọbọ ekpe me ijọn̄ me ukot kè Jisọs,

mè inikpa otutuuk ubọk inu ya osabe irọ inyi Jisọs.

34 Jisọs onenibe ọmọ,

“Gwun̄ n̄a enenwaan̄,

ichechieek kwun̄ îrọ mè lek kwun̄ inye.

Fo me esuuk.

Orukan̄ kwun̄ ita.”

35 Jisọs òkitumu ikọ yi me otu,

bọn ikwaan̄ enanan̄a me uwu kè Jairọs ogwu ibot uwu ntitiin̄ ebi Ju ya inilook Jairọs ibe,

“Gwun̄ kwun̄ enenwaan̄ ya îkwu.

Kayaka ìmama lek ìsisaak ogwu ijejeen̄.”

36 Jisọs ìkagban̄ utọn̄ me lek etip ema ekilook,

ire,

itutumu inyi Jairọs ibe,

“Katet ukpook,

gaalek kaan̄ ichechieek!”

37 Inenisa Pita mè Jemis mè Jọn ngwan̄ kè Jemis igbaalek kan̄ isi uwu ya,

ìkachieek ibe ofifi ene igọọk ema ije.

38 Mgbọ ema erebe uwu ogwu ibot uwu ntitiin̄ ya,

Jisọs omumun̄ ubọk ere okijijiin̄,

mè imun̄ ebi ene ekito ito,

mè ikikpukpọt ikana me ijọn̄.

39 Ijeje inin̄ uwu ya,

mè ikido ebi ife cha ibe,

“Ìre keke orọ enyi ekifan̄a ere,

mè ikito ito ikeyi?

Gwun̄ enenwaan̄ yi ìkakwukwu,

ìkilalaak.”

40 Ife cha ebebene ikichak ọmọ.

Mije keya,

Jisọs orerieen̄ otutuuk kiban̄ isibi,

mè isa nte gwun̄ ya mè nga gwun̄ ya melek ebi udun̄ kan̄ ene ita cha igbaalek inin̄ emen agwut ere emaan̄be gwun̄ ya.

41 Mgbọ ema enin̄be agwut ya,

Jisọs otetet gwun̄ ya me ubọk,

mè ibe ọmọ,

“Talita,

kum!”

eyi òsisibi,

“Gwun̄ enenwaan̄,

m̀be owu,

nan̄a keke!”

42 Mgbọ yaage,

gwun̄ ya onanan̄a ikeke,

mè ibene ikije ikana me emen agwut ya.

(Ọmọ ìre gwun̄ akọp mè acha iba).

Mgbọ ebi melek kè Jisọs emun̄be uyeke uyeke inu ya,

mbiribọ ogwogwook ema me lek enenen.

43 Jisọs orọriọọn̄ ubọk itaba ema ubọk me utọn̄ ibe ekakpa inu yi òrọrọ ìnyi ene geege,

mè ibe eweek inorie enyi gwun̄ ya irie.