Mîjit Jisọs me Najeret
6
Jisọs oneninan̄a me ere ya ika inu me ama ere ekpukpobe ọmọ isibi.
Ebi udun̄ kan̄ egọgọọk ọmọ inu.
2 Me Usen Mbuban,
ọmọ onenisi uwu ntitiin̄ me ama ya,
mè ibene ikijeen̄ ikọ Awaji.
Ebi ene mîwa me uwu ntitiin̄ ya.
Inu îjeen̄be oririki ebi ife cha lek.
Ema ekekibe,
“Iyak,
ìre owa ke ene yi okween̄ inu kechi?
Ìre iriọọn̄-inu kechi îkaan̄be ìjeje?
Sà ikwaan̄ ukechieen̄ chi ikisi ye?
3 Ìre ìkare ogwu usọ ya,
gwun̄ kè Meri ire eyi?
Ìre ìkare ọmọ ore ngwan̄ kè Jemis mè Josefua mè Judas melek Saimọn?
Ìre ìkare ama keyi ke ebi ngwan̄ kan̄ ebibaan̄ egọọk iluk?”
Ema ebebene ikaan̄ njijọ ejit me lek kan̄.
4 Jisọs onenifọọk ema ibe,
“Ogwu nriran îkikaan̄ umin me ere geelek,
îtata me ama ere înan̄abe,
mè otoko kan̄,
mè uwu ere emanbe ọmọ gaalek ke kpekinyi ọmọ umin.”
5 Mije una ichechieek kiban̄,
Jisọs ìkakọt ìrọ inu ukechieen̄ geege me ama ya,
ita me lek ene inen mè inen îtọkọbe aran̄ me ibot,
mè irọ inyi lek inye.
6 Îke Jisọs chieen̄ enenen imumun̄ ibe ke ife cha kpekaan̄ ichechieek.
Inenikijijen̄e ikana me asabọn ama òkukup igbet ama kiban̄ ikijeen̄ inu.
Jisọs îria ebi udun̄ kan̄ isibi
7 Jisọs onigwen akọp mè ebi udun̄ kan̄ iba ititiin̄,
mè iniria ema isibi,
ene iba iba,
ibe esi etumu ikọ Awaji,
mè inyi ema unye isasa irieen̄ ijo erumun̄ isibi me emen ene.
8 Sabum ema enije,
inyinyi ema nteme ibe,
“Ikasa inu geege ìkaan̄ me ubọk ìje ije ya,
îtata mkpat.
Ikakaan̄ inorie,
ikaben akpa ubọk,
ikatap ikpoko me akpa.
9 Ìtap ikpukot me ukot,
ire,
ikamọnọ ofọnti ìso iba.
10 Ama geelek enyi enin̄be,
ire ikaan̄ uwu òbọbọkọ enyi itap,
ìkup me uwu ya ìre mgbọ enyi mênan̄abe me ama ya isibi.
11 Ikaan̄ ama geelek enyi erebe,
mè kpebọkọ enyi itap,
kpeweek si inọnọ ikọ enyi ebetumu,
ìnan̄a me ama ya ìsibi.
Enyi isisibi,
ìgen̄ achiaan̄ ukot kinyi ìgwook me ama ya,
inyi ire inu ata-ikọ ikeme ebi ama ya.”
12 Ema enanan̄a isibi,
mè ikije ikana ikitumu inyi ebi ene ibe egwu ekom,
mè etele ijo kiban̄.
13 Ema mîrieen̄ si owuwa ijo erumun̄ isibi me emen ene,
mè iken owuwa ebi orukan̄ aran̄,
mè irọ inyi lek kiban̄ inye.
Mkpa kè Jọn ògwook mun̄
14 Erieen̄ kè Jisọs mè etip otutuuk inu îkirọ otataan̄ ikana ere geelek,
mè inire utọn̄ kè Erọdu.
Usini ene ekekitumu ibe ke Jisọs ìre Jọn ògwook mun̄ ogwu òkwukwu;
ke îra ijomo me mkpa;
ke îre eya orọ îkaan̄be unye ikisa irọ uyeke uyeke inu chi geelek.
15 Usini ene ekibe ke îre Ilaija.
Usini ene si ebebe ke îre ogwu nriran ge onu kubọk ebi nriran ekinu me ukot ikaan̄.
16 Mgbọ Erọdu onọbe ikọ chi,
itutumu ibe,
“Jọn ògwook mun̄ ogwu nnyibe ida ibe efieek ibot,
îjomo me mkpa.”
17 Erọdu yi ore ogwu ònyinyi unye ibe etet Jọn ebọp,
mè egon me uwu mkpọn,
inyi ejit ibele Erọdias ogwu nwa.
Erọdias ìre nwa Erọdu obọkọbe me ubọk kè Filip,
ogwu ngwan̄ kan̄ gaalek.
18 Eya orọ,
Jọn okekitumu inyi Erọdu ibe,
“Owu orọn̄ ikan,
mije obọkọbe nwa ngwan̄ kwun̄.”
19 Mije ikọ yi,
Erọdias obeben Jọn me ejit,
mè ikiweek ikpakpan̄.
Ire,
irek ìkasibi ìnyi ọmọ,
mije,
Erọdu ìkachieek inyi ọmọ.
20 Erọdu îkinyi Jọn ulibi,
mije,
îriọọn̄ ibe ke Jọn ìkirọ inu òtatat,
mè ire si ene ogwu Awaji ogobobe isun̄ inyi lek kan̄.
Mije keyi ke îkikpọ Jọn chieen̄ me lek,
inyi unan geege ikasak me lek.
Erọdu îkima ikekigban̄ ikọ Jọn okitumu,
ubọk geelek owuwa ikọ cha okisisaak ọmọ enenen.
21 Usen ge,
inu yi Erọdias okiweek onenire ubọk.
Usen ya ìre usen Erọdu otobe ijọk isasa ikeek usen iman kan̄,
mè item inorie,
mè iria ikwaan̄ igwen ebi ibot mkpulu,
mè ebi ibot akọn̄,
mè ebi ilile me Galili.
22 Gwun̄ kè Erọdias enenwaan̄ osisibi inu inijop okwa me isi kè Erọdu melek ebi ichen cha.
Okwa ya îjopbe onenibele otutuuk ebi ìkup me ere ya ejit enenen.
Eya orọ,
Erọdu ogwegwen gwun̄ enenwaan̄ ya,
mè itumu inyi ibe,
“Do emi inu geelek oweekbe,
ke mânyi owu.”
23 Înyan̄a ibot igbaalek inyi gwun̄ ya ibe,
“Mânyi owu inu geelek odobe emi,
ìrere icheche ama ubọọn̄ n̄a irek iba,
mè isa agan̄ ge inyi owu.”
24 Gwun̄ enenwaan̄ ya onanan̄a isibi,
mè isi lek ogwu uga isi ikpa inyi,
mè ido ibe,
“Ìre keke ke mbado?”
Ogwu uga obebe,
“Do ibe inyi owu ibot kè Jọn ògwook mun̄.”
25 Gwun̄ yi ogwugwu ikom ugwat ugwat inu me isi ogwu ubọọn̄ Erọdu,
mè initumu inyi ibe,
“Ǹkiweek ibe owu ònyi emi ibot kè Jọn ògwook mun̄ me emen okwa mgbọ keyi.”
26 Inu yi gwun̄ enenwaan̄ ya odobe onenifieek Erọdu me lek enenen.
Ire,
ìkakọt ìjit,
mije ebi ichen kan̄ cha,
mè ubọk îwuukbe lek inyan̄a ibot me isi ebi ife cha ibe ke ọmọ mônyi gwun̄ ya inu geelek îdobe ọmọ.
27 Eya orọ,
iraria ogwu akọn̄ ge ibe isi me uwu mkpọn isi ifieek ibot kè Jọn isa inu.
Ogwu akọn̄ ya osisi ifieek Jọn ibot,
28 mè iben itap me emen okwa isa ijet gwun̄ enenwaan̄ ya.
Ibọbọkọ,
mè isa ijet ogwu uga.
29 Mgbọ ebi udun̄ kè Jọn enọbe ibe ke mîkpan̄ Jọn,
ema esisi iben nkwukwu kan̄ isa ifo isi ifuun̄.
Jisọs înyi obop ene go inorie
30 Ebi otuchieen̄ kè Jisọs cha ìsisi itumu ikọ Awaji enenika,
mè inikpa inu geelek ema erọbe,
mè inu ema ejeen̄be ebi ene inyi Jisọs.
Jesus feeds 5000 (Mark 6:30-44)
31 Ike mgbọ ya,
owuwa ene ebi ìkinunu me lek kè Jisọs mêkinu,
ebi ìyayaka ikifofon mêkifon.
Mije keyi,
ebi otuchieen̄ kan̄ kpekọt ikaan̄ irek irie ukpọk ukpọk lek inorie.
Eya orọ,
Jisọs onenitumu inyi ebi udun̄ kan̄ ibe,
“Ìna,
inyi eji esi eweek ere ge ekup eji gaalek esiki efuuk sọnja.”
32 Jisọs mè ebi udun̄ kan̄ gaalek eneninin̄ uji,
mè ikọp isi ere ema ebesi isiki efuuk.
33 Owuwa ene emumun̄ ema ekikọp,
mè iriọọn̄ ibe ke îre ema,
mè igbuku isibi inan̄a me ama geelek òkup me agan̄ ya,
mè ilibi ikana inyọn̄ inyọn̄ idasi isi ire ere ya me isi kiban̄.
34 Ema enenikọp itoon̄ me ijọn̄.
Mgbọ Jisọs osibibe me uji,
mè ibene chieen̄ imun̄ ogbogbo ebi ene cha,
njijin kiban̄ otetet ọmọ enenen,
mije,
ema ekup kubọk arọọn̄ ikakaan̄ge ogwu òkekikpukpo.
Ibebene ikijeen̄ ema owuwa inu me ere ya.
35 Mgbọ egwe ojọkọbe inire otu ikakwun̄,
ebi udun̄ kan̄ enenitumu inyi ọmọ ibe,
“Egwe mônifit,
ere yi si ìre emen èwê,
kpunu ama.
36 Tumu nyi ebi ife chi ibe eje esi emen ama òkukup igbet ere yi esi elep inu ema mêriebe.”
37 Jisọs ofọfọọk ema ibe,
“Enyi me lek kinyi ìweek inorie ìnyi ife chi erie ma.”
Ebi udun̄ kan̄ ebebe ọmọ,
“Iyak!
Ìre owu òkariọọn̄ ibe ke inorie òboso ife chi môben iso efit dinari iba (òrere ikpoko ogwu ikwaan̄ uko ge oborie otutuuk onyan̄ jeeta)?”
38 Jisọs oyayaka inido ema ibe,
“Ìre owut fituru inen ke enyi ekaan̄?
Ìsi ìkpọ-nu.”
Mgbọ ema esibe isi iweek iriọọn̄,
ema enunu initumu inyi ọmọ ibe ke îre owut fituru go mè ufuk irin̄ iba gaalek ke ema ekaan̄.
39 Jisọs obebe ema etumu enyi ebi ife cha ibe esiki ekweek me inyọn̄ mbubet me irek me irek.
40 Ikeya ke ife cha enisiki ikweek me irek me irek,
usini irek efit ene,
usini akọp ene go.
41 Jisọs onenibọkọ owut fituru go mè ufuk irin̄ iba cha ikaan̄ me ubọk,
mè ibene chieen̄ ikpọ inyọn̄,
mè inyi Awaji itọn̄,
mè inikpọkọ fituru cha,
mè isa inyi ebi udun̄ kan̄ ibe esa esi eche enyi ebi ife cha.
Ubọk yaage si ke îfan̄a ufuk irin̄ iba cha inyi ibe esa eche eso otutuuk ene.
42 Otutuuk kiban̄ ererie inorie ya,
mè irie ijot owot.
43 Mgbọ eriebe isan̄a,
ebi udun̄ kè Jisọs eneniteen̄ okpọkọ fituru mè okpọkọ irin̄ echi etakabe isik,
ijojot akọp mè okwun iba.
44 Otu ifuk ebirieen̄ ebi ìrerie inorie ya ìre obop ebirieen̄ go.
Jisọs îje ije me inyọn̄ isi mun̄
45 Mgbọ yaage eriebe inorie ya isan̄a,
Jisọs obebe ebi udun̄ kan̄ enin̄ uji ekọp esaba okwaan̄ oyô ya esi Betisaida ke ọmọ gwa òkinu.
Inenikup itap ebi ife cha me oniin̄,
ema efofon isan̄a.
46 Mgbọ Jisọs otapbe ema me oniin̄ isan̄a,
inenene inyọn̄ ogoon̄ ge isi ikup ikiriaak uriaak.
47 Ike mgbọ egwe ofitbe,
ebi udun̄ kan̄ me emen uji me eden̄ okwaan̄,
Jisọs gaalek osik me ijọn̄.
48 Îkup me inyọn̄ ogoon̄ ya ibene chieen̄ imun̄ ema me eden̄ okwaan̄ ekibọkọ ufialek me lek uran̄,
mije efet okiwut ikibieen̄ ema ikpebe ifo udun̄.
Me eririeen̄,
me òfo agan̄ egwe,
Jisọs onanan̄a ikije ukot ukot me inyọn̄ isi mun̄ igọọk ema,
mè ibonije iraka ema.
49 Ema emumun̄ ọmọ okije me inyọn̄ isi mun̄,
mè ikikeek ibe ke îre ekwukwu,
mè isan̄a ukpo ibọn̄.
50 Otutuuk kiban̄ mîmun̄ ọmọ iso,
ukpook otetet ema enenen.
Mgbọ yaage,
Jisọs otutumu inyi ema ibe,
“Ìkat ejit,
ikatet ukpook,
ke emi ke îre.”
51 Inenisaba inin̄ emen uji ya,
mè igọọk ema ikweek.
Efet ya owọwọ.
Inu yi ebi udun̄ kan̄ emun̄be okeke ema chieen̄ enenen.
52 Mije,
bak me lek ema kpekikọt igwat lek igobo inu itet,
ema kpekọt isa inorie Jisọs onyibe obop ene go cha iriọọn̄ ogwu Jisọs orebe.
Jisọs îgwa ebi orukan̄ me Geneseret
53 Ema enenikọp isaba okwaan̄ ya itoon̄ me agan̄ ijọn̄ ekigwen Geneseret,
mè igwuun̄ uji.
54 Ema inanan̄a me uji isibi,
ebi ene erọriọọn̄ Jisọs isi mgbọ yaage,
55 mè ilibi ekot ekot ikana otutuuk agan̄ ya ikisi ibeen̄ ebi orukan̄ me inyọn̄ ufo isa ijet Jisọs.
Ere geelek enọbe ibe ke ọmọ òwa,
mîra isa ebi orukan̄ ijet ọmọ.
56 Ere geelek Jisọs osibe,
mè ìre ama ilile,
mè ìre sọntiik ama,
mè ìre ama ibot uwu ge ge,
ebi ene ekikpukpulu ebi orukan̄ isa isibi inu me oyet ewe,
mè inikibeek ọmọ ibe itele inyi ebi orukan̄ cha etet ubọk me utọn̄ ofọnti inyọn̄ kan̄.
Otutuuk ebi geelek ìtetet ubọk me lek ofọnti kan̄,
lek kiban̄ onyenye isan̄a kpai.