Jisọs îgwa ogwu ngọm me Usen Mbuban
3
Jisọs onenikpọk isi uwu ntitiin̄.
Me emen uwu ya enerieen̄ ge òwa ogwu ubọk ge ogọmbe.
2 Usini ene me emen uwu ya ekekikpọ mè ìre Jisọs môgwa ene ya me Usen Mbuban,
inyi ema etet ọmọ me ikan.
3 Jisọs onenibe gwun̄ enerieen̄ ya,
“Sibi na me isi.”
4 Mgbọ gwun̄ enerieen̄ ya osibibe inikeke,
Jisọs onenido ebi ìkup me uwu ya ibe,
“Ìre keke ke Ikan kè Mosis onyi irek ibe erọ me Usen Mbuban?
Ìre ìbe erọ ata inu esa etap ubọk enyi ene,
sà ìre ibe erọ ene nnaan̄?
Ìre ibe enyan̄a ugwem ene,
sà ìre ibe efiat ugwem ene?”
Kpunu ene geege òbọbọkọ ọmọ otu.
5 Jisọs onanaan̄ ejit,
mè ikpọ ema siì.
Njijin kiban̄ otetet ọmọ,
mije unye-ibot mè nlilọ ifuk-ibot kiban̄.
Inenikana isi ikpọ ene ya,
mè itumu inyi ibe,
“Nyana ubọk kwun̄!”
Ogwu enerieen̄ ya onyanyana ubọk,
orukan̄ ya otata,
ubọk kan̄ okukup kubọk îkupbe me adasi mgbọ.
6 Mgbọ yaage ebi Farisi enanan̄a me uwu ntitiin̄ ya isibi,
mè isi igọọk ebi ìkigọọk Erọdu ije inin̄ oru ubọk ema mêsabe ikpan̄ Jisọs.
Jisọs mè ebi ene me agba okwaan̄ oyô Galili
7 Jisọs melek ebi udun̄ kan̄ eneninan̄a me ere ya ije ifo agba okwaan̄ oyô Galili.
Ogbogbo ene egbọgbọọk igọọk ọmọ.
Ife chi enan̄a me agan̄ Galili,
mè agan̄ Judia,
8 mè ama Jeruselem,
mè ido Idumia,
mè ido òkup me usaba agan̄ okwaan̄ Jodan,
mè agan̄ ama Taya mè Sidọn.
Otutuuk ife chi enu me lek kè Jisọs,
mije,
ema enọbe inu Jisọs okirọ.
9 Ebi ene mîkọt iwa enenen ire lek Jisọs otumube inyi ebi udun̄ kan̄ ibe etet uji ge etap me ijọn̄ enyi ọmọ inin̄ emen,
inyi ebi ene ekanwan ọmọ.
10 Me lek Jisọs ogwabe owuwa ene,
ebi orukan̄ geelek ìkup me ere ya ekekichichiki lek,
mè ikibieen̄ ene,
ikiweek oniin̄ ema mêsabe ikọt initet ubọk me lek kan̄.
11 Ene geelek ijo erumun̄ okupbe me emen isimun̄ Jisọs,
îra irọn̄ me ijọn̄ me isi kan̄,
ijo erumun̄ òkup me emen kan̄ îra itaan̄ ukpo ibe Jisọs,
“Owu ore Gwun̄ Awaji.”
12 Ire,
Jisọs îra igana inyi ijo erumun̄ cha ibe ekatumu ogwu ọmọ orebe.
Jisọs îgobo ebi otuchieen̄ kan̄
13 Jisọs onenije inene inyọn̄ orioon̄ ge,
mè igwen ebi ejit kan̄ onemebe me etete ogbogbo ene cha.
Ema enenene igọọk ọmọ.
14 Inenigobo akọp mè ene iba ebi îweekbe me etete ebi îgwenbe cha,
mè igwen ema ebi otuchieen̄ kan̄.
Ìgobo ema ibe enegọọk ọmọ ekup mgbọ geelek,
inyi ọmọ iria ema isibi,
mè ekesi etumu ikọ Awaji ekana ere,
15 mè ekaan̄ unye isasa ikirieen̄ ijo erumun̄ isibi me emen ene.
16 Akọp mè ene iba cha ebi îgobobe ìre:
Saimọn ogwu înyibe erieen̄,
Pita,
17 mè Jemis,
mè ogwu ngwan̄ Jọn,
bọn kè Jebidi (ngwan̄ iba chi ke Jisọs ogwen Bowaneges,
eyi òsisibi “Bọn nsook-isinyọn̄”),
18 mè Anduru,
mè Filip,
mè Batolomi,
mè Matiyu,
mè Tọmọs,
mè Jemis gwun̄ kè Alifiọs,
mè Tadiọs,
mè Saimọn ogwu ulọk ama ominbe me ejit,
19 mè Judas Isikariọt ogwu ònenileke Jisọs inyi ekpan̄.
Ijo otu ikọ ebi Farisi
20 Me mgbọ Jisọs oyakabe ika inu me uwu îkikup me Kapanọm,
ebi ene egbugbuku inichit ere ya.
Mije keyi,
ọmọ mè ebi udun̄ kan̄ kpekọkọt ikaan̄ irek irie inorie.
21 Mgbọ ebi uwu kiban̄ enọbe inu ofolek kan̄,
ema enanan̄a inu ibenisak ọmọ ifo,
mije,
ebi ene ekitumu ibe ke ibot kan̄ îwuwọlọ.
22 Usini ebi ìjeen̄ Ikan ìnan̄a me Jeruselem inu ekekitumu ibe,
“Îre Bejibun ogwu ibot ijo erumun̄ okup ene yi me ibot.
Unye kè Bejibun ke îkisa irieen̄ ijo erumun̄ isibi me emen ene.”
23 Jisọs inọnọ ikọ ya,
igwegwen ife cha iriaak me lek kan̄,
mè ikitumu ikọ inyi ema me urọk ibe,
“Ìre Setan môjeje irieen̄ Setan isibi me emen ene?
24 Ido geelek ebi ìkup me emen ekitim akọn̄ me lek kiban̄,
ido ya ìbochechep.
25 Uwu geelek ebi ìluk me emen ekikpan̄ lek kiban̄,
uwu ya ìkabokeke.
26 Ikeya si,
ire ebi ìkigọọk Setan ikitim akọn̄ ikeme lek kiban̄,
mkpulu kè Setan ìkpokeke,
ìborọrọn̄ ichep.
27 Me atikọ,
kpunu ogwu òbokọt inin̄ uwu ogwu ònyenye lek isi ifum inu,
îtata ìdadasi itet ogwu unye ya ibọp sabum ònokọt òfum inu me uwu kan̄.
28 Mgbọ yi,
ǹkitumu atikọ inyi enyi,
mêkọt itele ijo inu geelek mè ijo otu usem geelek inyi ebilene.
29 Ire,
ene geelek òtutumu ijo usem ikeme Ekwukwu Mbuban,
kpebetele inyi,
mije,
îrọ ijo inu eyi òbobia me ibot kan̄ ire mgbọ ikakaan̄ge itata.”
30 Jisọs ìtumu ikọ yi,
mije,
ema cha ekitumu ibe ke ijo erumun̄ okup ọmọ me ibot.
Nga kè Jisọs melek ebi ngwan̄ kè Jisọs
31 Mgbọ ya,
ebi ngwan̄ kè Jisọs melek ogwu uga enunu inire uwu ere Jisọs okupbe,
mè ikeke me oyet iria ikwaan̄ ibe egwen Jisọs enyi ema.
32 Owuwa ene me emen uwu ya ekweekbe ikana Jisọs mgbọ etip ya onube inyi ọmọ.
Ema elolook ọmọ ibe,
“Kpọ,
nga kwun̄ mè ebi ngwan̄ kwun̄a me oyet ekekebe ikiweek imumun̄ owu.”
33 Jisọs ododo ema ibe,
“Ìre ebi owa ere nga n̄a mè ebi ngwan̄ n̄a?”