Jisọs ore Ogwukaan̄ Usen Mbuban
12
Îkaan̄ mgbọ ge Jisọs mè ebi udun̄ kan̄ ekije itibi emen uko akpa ge me Usen Mbuban.
Mgbọ ema ekije,
ebi udun̄ kan̄ ekekifaan̄ akpa me uko ya itaka,
mije uraafiọọn̄.
2 Mgbọ ebi Farisi emun̄be ikeya,
egwegwen Jisọs,
mè ibe ọmọ,
“Kpọ,
ebi udun̄ kwun̄ mêkirọ inu ikatatge irọrọ me Usen Mbuban.”
3 Jisọs onenido ema ibe,
“Ìre enyi kpefuk inu Debit orọbe mgbọ uraafiọọn̄ otakabe ọmọ mè ebi melek kan̄?a
4 Debit ìjeje inin̄ Uwu Awaji,
mè isi imọnọ fituru esabe igwa ngwugwa inyi Awaji itaka,
mè iche si inyi ebi melek kan̄.
Inu ya ema erọbe îlọ me Ikan,
mije,
fituru cha ìkup inyi ebi ngwugwa gaalek.
5 Sà ìre enyi kpefuk me emen Ikan kè Mosis ibe ke ebi ngwugwa ìkisi ikwaan̄ me Uwu Mbuban mîkichaka mbuban me Usen Mbuban,
ire,
ikan geege ìkatet ema?b
6 Ire,
emi ǹkitumu inyi enyi ibe ke ogwu òmimin igak Uwu Mbuban òwa me ere keyi,
me etete kinyi.
7 Ege me Ikpa Mbuban ibe ke Awaji ìbe,
‘Ǹkiweek ejit nsan,
ǹkaweek ngwugwa.’c
Ire ibe enyi mîtet ibot me lek ikọ yi,
enyi kpemekigwen ikan ikeme ebi ekarọge ijo inu.
8 Mije,
Gwun̄ Ebilene ore Ogwukaan̄ Usen Mbuban.”
Jisọs îgwa ogwu ngọm me Usen Mbuban
9 Jisọs onenije inan̄a me ere ya,
mè isi inin̄ uwu ntitiin̄ ebi Ju òkup me ama ya.
10 Ogwu enerieen̄ ge ubọk agan̄ ge ogọmbe òwa me emen uwu ya okupbe.
Usini ebi ìkup me emen uwu ya eneniweek itetet Jisọs me ikan,
mè inido ọmọ ibe,
“Ìre Ikan kè Mosis îgban igwagwa ene me Usen Mbuban?”
11 Jisọs oneniyaka ido ema ibe,
“Ire ene ge me lek kinyi ikaan̄ arọọn̄ ge òrọrọn̄ inin̄ emen udọn̄ me Usen Mbuban,
ìre ene ya ìkpotaba arọọn̄ ya isibi me usen ya?
12 Ìre enyi kperiọọn̄ ibe ke ene înye otu ewe enenen igak arọọn̄?
Eya orọ,
Ikan ìkagban ene irọrọ ata inu inyi ebilene me Usen Mbuban.”
13 Inenitumu inyi ogwu enerieen̄ ya ibe,
“Nyana ubọk kwun̄!”
Ogwu enerieen̄ ya onyanyana ubọk.
Ubọk kan̄ onyanyana,
mè inye kubọk agan̄ keyilọ.
14 Mgbọ ebi Farisi emun̄be inu ya,
ema enanan̄a isibi isi itọt ubọk ema ebesa itet Jisọs ikpan̄.
Jisọs ore gwun̄ ikwaan̄ ogwu Awaji ogobobe
15 Jisọs orọriọọn̄ ijo otitọt kiban̄ ya,
mè inan̄a me agan̄ ya isibi.
Owuwa ene egọgọọk ọmọ ije,
igwagwa otutuuk ebi lek ikanyege me etete kiban̄,
16 mè ibe ema ekatumu ogwu ọmọ orebe ìnyi ene geege.
17 Inu yi îrọ iso ikọ Awaji otumube inan̄a me otu ogwu nriran Asaya ibe,
18 “Ogwugwu ìre gwun̄ ikwaan̄ n̄a ogwu ngobobe inyi lek n̄a.
Ọmọ ìre ogwu mmabe,
ogwu inu kan̄ okineme emi.
Mânyi ọmọ Ekwukwu n̄a,
ọmọ môlook ebi ido geelek etip ofolek unen oyerebet n̄a.
19 Ọmọ ìkpobaak ibaak,
ìkponyi okput,
ìkpotaan̄ ukpo itumu ikọ me lek oniin̄.
20 Ike ikanwọnge ibe efan̄a uti
akpa òkakaan̄ unan me lek efiin̄,
ikeya si,
ọmọ ìkporọ inu
unye unye me lek ebi ekakaan̄ge unye.
Ike ikagbege ibe eniin̄ ibot ukan̄ òkekibubuuk,
ikeya si,
ọmọ ìkponye ejit me lek ebi
ekakaan̄ge ikpọchieen̄ geege.
Ọmọ môkeke inye me irọrọ ata inu,
mege ire mgbọ unen oyerebet
môsobe otutuuk ere geelek.
21 Otutuuk ebi ekarege ebi Ju mêkaan̄ ikpọchieen̄
inan̄a me lek erieen̄ kan̄.”d
Ijo otu ikọ ebi Farisi
22 Ebi ene enenisa enerieen̄ ge ijo erumun̄ okupbe me emen ijet Jisọs.
Ijo erumun̄ ya îtap ene ya ǹnàan̄,
mè itap si mbuuk.
Jisọs ogwagwa ogwu enerieen̄ ya,
mè irọ inyi ikimọọn̄ inu,
mè ikitumu ikọ.
23 Inu ya okeke otutuuk ebi ìkup me ere ya chieen̄.
Ema ekekitumu ibe,
“Ìre òbe ìkpore Gwun̄ kè Debit ya ore ogwugwu mọnọ?”
24 Ire,
mgbọ ebi Farisi enọbe ikọ ebi ife cha ekitumu,
ema ebebene ikitumu ibe ke Jisọs ìkisa unye kè Bejibun,
ogwu ibot ijo erumun̄,
ilap ijo erumun̄ isibi me emen ene.
25 Jisọs orọriọọn̄ ekiket kiban̄,
mè itumu inyi ema ibe,
“Ido geelek ebi ìkup me emen ekitim akọn̄ ikeme lek kiban̄,
ido ya ìbochechep.
Ikeya si,
ama geelek,
mè ìre uwu geelek ebi ìkup me emen ekirọ ikeme lek kiban̄,
ama ya mè ìre uwu ya ìkpokọt ikeke.
26 Ikeya si,
ire Setan ikilap Setan isibi,
Setan îche lek kan̄.
Ire ikeya,
ìre mkpulu kè Setan ìbojeje ikọt ikeke inye?
27 Ire emi nkisa unye kè Bejibun ilap ijo erumun̄ isibi me emen ene,
ìre kpasi unye ke ebi kinyi ekisa ilap ijo erumun̄ isibi me emen ene?
Ire ikeya,
îre bọn kinyi gaalek ebesibi oyerebet ikeme enyi.
28 Ire,
ire unye Ekwukwu Awaji ke ǹkisa ilap ijo erumun̄ isibi,
eya ìkijeen̄ ibe ke mkpulu eyi Awaji înu me etete kinyi.
29 “Ofifi si,
enyi ìtumu-nu,
ìre ene ìbojeje ikọt ibum inin̄ uwu ogwu ònyenye lek isi ikpulu inu,
ire ìkadasi ìtet ogwu unye ya ìbọp sabum?
Isidasi itet ene ya ibọp ikam,
mgbọ ya ke ìbonikọt inin̄ uwu ene ya ikpulu inu.
30 “Eya orọ,
ogwu ikakekege ìnyi emi,
ìkijeje ikeme emi.
Ikeya si,
ogwu ikagọọkge emi ìkititiin̄,
ene ya ìkiyiyiyala.
31 Me atikọ,
ǹkitumu inyi enyi ibe ke mêtele ijo irọrọ mè ijo otu ikọ geelek inyi ene,
ire,
kpebetele inyi ogwu geelek òtutumu Ekwukwu Mbuban ilọ.
32 Ogwu itumu Gwun̄ Ebilene ilọ,
mêkọt itele inyi.
Ire,
kpebetele inyi ene geelek òtutumu Ekwukwu Mbuban ilọ,
mè ìre mgbọ keyi,
mè ìyaka ire me mgbọ òkinu me isi.”
Ata uti ìkito ata mfut, ijo uti ìkito ijo mfut
33 “Uti ekpọbe chieen̄ me lek ijaan̄ ìboto ata mfut.
Eyi ekakpọge ìjaan̄ ìboto ijo mfut.
Mije,
ekisa mfut uti iriọọn̄ uti.
34 Enyi bọn ijo ulu kechi!
Ata ikọ ìbojeje inan̄a enyi me otu isibi me ere enyi erebe ebi ijo ife?
Ìre enyi kperiọọn̄ ibe ke ikọ òkup ene me ejit ke ene okisan̄a itumu isibi?
35 Ogwu ata ene ìkisan̄a ata inu isibi inan̄a me etete ata inu òkup me emen kan̄.
Ikeya si,
ogwu ijo ene ìkisan̄a ijo inu isibi inan̄a me etete ijo inu òkup me emen kan̄.
36 Ire,
me atikọ,
emi ǹkitumu inyi enyi ibe,
me Usen Oyerebet Awaji,
ene geelek môfọọk ikọ ibot kan̄,
mije ijo otu usem geelek îtumube.
37 Mije,
mêsa ikọ otu kinyi ifieek oyerebet inwọn enyi,
mè esa si ikọ otu kinyi efieek oyerebet etip enyi.”
Inu ijejeen̄ ònan̄a me lek kè Jona
38 Usini ebi ìjeen̄ Ikan,
mè ebi Farisi enenibe Jisọs,
“Ogwu Ijejeen̄,
eji ekiweek ibe owu òrọ inu ukechieen̄ ge òjeen̄ eji nu.”
39 Jisọs ofọfọọk ema ibe,
“Ìre enyi ikpak ikpak lek ebi mgbọ kechi ekariọọn̄ge Awaji enikiweek inu ijejeen̄?
Kpunu ofifi inu ijejeen̄ geege ebejeen̄ enyi,
ilọ me lek inu ijejeen̄ ònan̄a me lek kè Jona ogwu nriran.
40 Ike Jona okupbe egwe ita mè eririeen̄ ita me emen owot utemun̄,
ikeya si ke emi Gwun̄ Ebilene mbakup egwe ita mè eririeen̄ ita me ejit ijọn̄.
41 Me Usen Oyerebet,
ebi ama Ninife mêkeke ata-ikọ ikeme enyi,
mè irọ inyi oyerebet itip enyi ebi mgbọ kechi,
mije,
ema mîgwu ikom inan̄a me emen ijo kiban̄ mgbọ Jona otumube ikọ Awaji inyi ema.
Ire,
me mgbọ yi,
ogwu òmimin igak Jona òwa me ere keyi,
me etete kinyi.
42 Ofifi si,
ogwu ubọọn̄ enenwaan̄ ogwu Sieba mônan̄a ikeke itumu ikọ ikeme enyi me Usen Oyerebet ya,
mije,
ogwu ubọọn̄ enenwaan̄ ya ìnan̄a me ido kan̄ òkup me okputut linyọn̄ itutobo inigban̄ ikọ iriọọn̄-inu me otu ogwu ubọọn̄ Solomọn.
Ire,
me mgbọ yi,
ogwu òmimin igak ogwu ubọọn̄ Solomọn òwa me ere keyi,
me etete kinyi.
43 “Ijo erumun̄ isinan̄a me emen ene isibi,
îra ikijijen̄e ikana me emen èwê ikiweek ere ìbokup isiki efuuk.
Ire ìkakọt ìweek ìmun̄,
44 îra itumu ifieek me ejit kan̄ ibe ke ọmọ môgwu ikom ifo uwu ere ọmọ osibibe itele.
Isinire uwu ya,
mè inimun̄ ibe ke kpunu ene geege òluluk me emen,
ire,
mîchan uwu ya,
mè inen̄e isun̄ ijaan̄,
45 îra igwu ikom,
mè isi isa ofifi ijo erumun̄ jaaba,
ìwawa ikpak me lek igak ọmọ,
igbaalek ika inu uwu ya iniluk ibia.
Mije keya,
bene me mgbọ ya fo isi,
ugwem ene ya îra ifieek enenen igak ubọk îkupbe me adasi mgbọ.
Ikeyi ke ìbokup inyi ebi mgbọ kechi ìrere ebi ikpak.”
Nga kè Jisọs mè ebi ngwan̄ kè Jisọs
46 Jisọs òkitumu ikọ ya me otu inyi ebi ife cha,
ebi ngwan̄ kan̄ mè ogwu uga enenikeke me isi oyet ya,
mè ikiweek itutumu ikọ melek kan̄.
47 Ene ge me lek ebi ife cha onenitumu inyi Jisọs ibe,
“Nga kwun̄,
mè ebi ngwan̄ kwun̄ me isi oyet ekekebe ikiweek itutumu ikọ melek kwun̄.”
48 Jisọs onenido ema ibe,
“Ìre ebi owa ere nga n̄a,
mè ebi ngwan̄ n̄a?”
49 Ineninyana ubọk ifo lek ebi udun̄ kan̄,
mè itumu inyi ebi ife cha ibe,
“Ebibi ere nga n̄a mè ebi ngwan̄ n̄a.
50 Ene geelek òkirọ inu Nte n̄a ogwu òkup me emen inyọn̄ okiweek,
ene ya ore ngwan̄ n̄a enerieen̄,
mè ngwan̄ n̄a enenwaan̄,
mè nga n̄a.”