Akpalek kè Jisọs înwene
17
Mgbọ egwe gweregwen orakabe,
Jisọs onenisa Pita mè Jemis mè Jọn ngwan̄ kè Jemis igbaalek kan̄ ije isi inene ubene ogoon̄ ge,
ema gaalek.
The Transfiguration (Matthew 17:1-13)
2 Me ere ya,
me isi ebi udun̄ kan̄ cha,
akpalek kè Jisọs onwenwene.
Isi kan̄ okekitoon̄ kubọk ura,
ofọnti kan̄ okekitana kubọk utoon̄ egwe.
3 Mgbọ yaage,
ema emumun̄ Mosis mè Ilaija ekanabe isibi,
mè ikigọọk Jisọs ikpa ukpatu.
4 Mije Pita ikariọọn̄ge inu ìbotumu,
ikpọkpọ itumu inyi Jisọs ibe,
“Okaan̄-ene,
înwọn ubọk eji ekupbe me ere yi.
Ire ineme owu,
emi mânama uwu ọfọ ita,
ge eyi kwun̄,
ge eyi kè Mosis,
ge eyi kè Ilaija.”
5 Pita òkitumu ikọ ya me otu,
oduku inyọn̄ òtotoon̄ òkakana ema ichit bùk.
Ida ge okekitumu ikọ me emen oduku inyọn̄ ya ibe,
“Ogwugwu ìre Gwun̄ n̄a ogwu mmun̄be me chieen̄,
inu kan̄ îneme emi enenen.
Ìgban̄ ikọ kan̄!”
6 Mgbọ ebi udun̄ kè Jisọs enọbe ida ya,
ukpook otetet ema,
ema erọrọn̄ me ijọn̄,
mè ikana isi ichit.
7 Jisọs onenichak ema ubọk me lek,
mè ibe ema,
“Ìnan̄a ìkeke,
ikayaka ìfieek owot.”
8 Mgbọ ema ebenebe isi me ijọn̄,
kpeyaka imun̄ ofifi ene geege,
ilọ Jisọs gaalek.
9 Mgbọ ema ekinan̄a me inyọn̄ ogoon̄ ya isibi,
Jisọs otutumu inyi ema ibe ekakpa inu ema emun̄be ìnyi ene geege,
mege ire mgbọ ọmọ Gwun̄ Ebilene môjomobe me mkpa.
10 Ebi udun̄ kan̄ enenido ọmọ ibe,
“Tumu-nu,
ìre ebi ìjeen̄ Ikan ejeje ikitumu ibe ke Ilaija môdasi inu sabum Karais ònu?”
11 Jisọs ofọfọọk ema ibe,
“Me atikọ,
Ilaija obodasi inu ininen̄e otutuuk inu isun̄ me irek.
12 Ire,
ǹkitumu inyi enyi ibe ke Ilaija îra inunu iraka,
ire,
ebi ene kperiọọn̄ ibe ke îre ọmọ ore ogwa.
Ire,
ema mîrọ ọmọ ijo inu geelek òneneme ema.
Ikeya ke Gwun̄ Ebilene obomun̄ ufialek me ubọk kiban̄.”
13 Mgbọ ya ke ebi udun̄ kan̄ cha eniriọọn̄ ibe ke ìkitumu ikọ ya ibak Jọn ògwook mun̄.
Jisọs îgwa ogwu mkpikpi
14 Mgbọ ema ejebe inire lek ogbogbo ene cha,
ogwu enerieen̄ ge onunu,
mè initọbọ ekpe me isi kè Jisọs,
15 mè ikiriaak ọmọ ibe,
“Okaan̄-ene,
soso,
kaan̄ ejit nsan me lek gwun̄ n̄a enerieen̄.
Gwun̄ ya ìkifiak mkpikpi,
orukan̄ ya òkitutuku gwun̄ ya enenen.
Owuwa mgbọ,
isibene me lek,
ìkekirọ inyi irọn̄ inin̄ emen ukan̄,
mè ìre emen mun̄.
16 Mije keya,
ke nsa gwun̄ ya ijet ebi udun̄ kwun̄ ibe egwa,
ire,
ema kpekọt igwa.”
17 Jisọs onenibe,
“Jei,
ebi mgbọ kechi,
enyi mîfieek,
mè inan ichechieek enenen!
Ìre kpa mgbọ ke mbagọọk enyi ikup ire sabum enyi ènekaan̄ ichechieek?
Sà ìre kpa mgbọ ke mbame una ichechieek kinyi isi ire?
Ìsa gwun̄ ya ìjet emi.”
18 Inenigana inyi ijo erumun̄ ya,
ijo erumun̄ ya onanan̄a me emen gwun̄ enerieen̄ ya isibi.
Mgbọ yaage,
lek gwun̄ ya onyenye.
19 Mgbọ inu ya orọbe iraka,
ebi udun̄ kan̄ enwenween̄ lek inu inido ọmọ ibe mè ire keke orọ ema kpekọt ilap ijo erumun̄ ya isibi me emen gwun̄ enerieen̄ ya?
20 Jisọs ofọfọọk ema ibe,
“Îre mije ichechieek kinyi misip.
Me atikọ,
ǹkitumu ibe,
ire ibe enyi mîkaan̄ ichechieek,
ìrere eyi òsisip ikup kubọk ukwuuk uti mọsitadi,
kpunu inu geege òboyọt igak enyi.
Enyi mêkọt itumu inyi ikpele ogoon̄ yi ibe,
‘Jibi nan̄a me ere keyi si keke me ere keyilọ!’
mè ogoon̄ yi orọ si ubọk enyi etumube. [
21 Ire,
kpekikọt ilap ojelek ijo erumun̄ keyi isibi me emen ene,
îtata me uriaak mè ijin-otu gaalek.”]
Jisọs îkpọk itumu ikọ ibak mkpa kan̄
22 Usen ge,
mgbọ ema ekigbaan̄ ije ikana me Galili,
Jisọs onenitumu inyi ebi udun̄ kan̄ ibe,
“Mêleke emi Gwun̄ Ebilene itap me ubọk ebi ene,
23 inyi ekpan̄.
Ire,
òso egwe ita,
mâjomo me mkpa.”
Mgbọ ebi udun̄ kan̄ enọbe ikọ yi,
ejit obebene ikifieek ema enenen.
Ititip otitip Uwu Mbuban
24 Mgbọ Jisọs mè ebi udun̄ kan̄ ejebe inire Kapanọm,
ebi ìkibọkọ otitip uwu Mbuban enenigwen Pita ida ibọkọ,
mè ido ibe,
“Ìre ogwu ijejeen̄ kinyi îkigọọk itip otitip Uwu Mbuban?”
Otitip yi ìkire ikpoko ekigwen darakima iba.
25 Pita obebe iin̄,
ke îkigọọk itip.
Mgbọ Pita ogwube ikom inin̄ uwu,
sabum ìbosan̄a amọn,
Jisọs odadasi ibe ọmọ,
“Saimọn,
keke ore ekiket kwun̄?
Ìre ebi owa ekikpe mkpukpe,
mè ìre otitip inyi ebi ubọọn̄ ìkikpulu ema me linyọn̄ keyi?
Ìre bọn owot,
sà ìre ebi ichen ekikpe?”
26 Pita ofọfọọk ibe ke îre ebi ichen.
Jisọs obebe ọmọ,
“Ire ikeya,
bọn owot kpekaan̄ ititip otitip keya!
27 Ire,
mọnọ ukọọk si tọp to me okwaan̄ oyô,
adasi irin̄ owu môtababe,
chili otu irin̄ ya,
ke owu mômun̄ ikpoko alata ge eyi òrere darakima ini.
Mọnọ sa nyi ife cha me lek otitip kwun̄ mè eyi n̄a,
inyi ife cha ekanaan̄ ejit ìnyi eji.”